Brahma Purana · Chapter 90

gāruḍaṃ nāma yat tīrthaṃ sarvavighnapraśāntidam
tasya prabhāvaṃ vakṣyāmi śṛṇu nārada yatnataḥ //

maṇināga iti tv āsīc cheṣaputro mahābalaḥ
garuḍasya bhayād bhaktyā toṣayām āsa śaṃkaram //

tataḥ prasanno bhagavān parameṣṭhī maheśvaraḥ
tam uvāca mahānāgaṃ varaṃ varaya pannaga //

nāgaḥ prāha prabho mahyaṃ dehi me garuḍābhayam
tathety āha ca taṃ śaṃbhur garuḍād abhayaṃ bhavet //

nirgato nirbhayo nāgo garuḍād aruṇānujāt
kṣīrodaśāyī yatrāste kṣīrārṇavasamīpataḥ //

itaś cetaś ca carati nāgo 'sau sukhaśītale
garuḍo 'pi ca yatrāste taṃ deśam api yāty asau //

garuḍaḥ pannagaṃ dṛṣṭvā carantaṃ nirbhayena tu
taṃ gṛhītvā mahānāgaṃ prākṣipat svasya veśmani //

taṃ baddhvā gāruḍaiḥ pāśair garuḍo nāgasattamam
etasminn antare nandī provāceśaṃ jagatprabhum //

nūnaṃ nāgo na cāyāti bhakṣito baddha eva vā
garuḍena sureśāna jīvan nāgo na saṃvrajet //

nandino vacanaṃ śrutvā jñātvā śaṃbhur athābravīt //

garuḍasya gṛhe nāgo baddhas tiṣṭhati satvaram
gatvā taṃ jagatām īśaṃ viṣṇuṃ stuhi janārdanam //

baddhaṃ nāgaṃ kāśyapena madvākyād ānaya svayam
tat prabhor vacanaṃ śrutvā nandī gatvā śriyaḥ patim //

vyajñāpayat svayaṃ vākyaṃ viṣṇuṃ lokaparāyaṇam
nārāyaṇaḥ prītamanā garuḍaṃ vākyam abravīt //

vinatātmaja me vākyān nandine dehi pannagam
kampamānas tad ākarṇya nety uvāca vihaṃgamaḥ
viṣṇum apy abravīt kopāt suparṇo nandino 'ntike //

yad yat priyatamaṃ kiṃcid bhṛtyebhyaḥ prabhaviṣṇavaḥ
dāsyanty anye bhavān naiva mayānītaṃ hariṣyati //

paśya devaṃ trinayanaṃ nāgaṃ mokṣyati nandinā
mayopapāditaṃ nāgaṃ tvaṃ tu dāsyasi nandine //

tvāṃ vahāmi sadā svāmin mama deyaṃ sadā tvayā
mayopapāditaṃ nāgaṃ vaktuṃ dehīti nocitam //

satāṃ prabhūṇāṃ neyaṃ syād vṛttiḥ sadvṛttikāriṇām
santo dāsyanti bhṛtyebhyo madupāttaharo bhavān //

daityāñ jayasi saṃgrāme madbalenaiva keśava
ahaṃ mahābalīty evaṃ mudhaiva ślāghate bhavān //

garuḍasyeti tad vākyaṃ śrutvā cakragadādharaḥ
vihasya nandinaḥ pārśve paśyadbhir lokapālakaiḥ //

idam āha mahābuddhir māṃ samuhya kṛśo bhavān
tvadbalād asurān sarvāñ jeṣye 'haṃ khagasattama //

ity uktvā śrīpatir brahmañ śāntakopo 'bravīd idam
vahāṅguliṃ karasyāśu kaniṣṭhāṃ nandino 'ntike //

garuḍasya tato mūrdhni nyasyedaṃ punar abravīt
satyaṃ māṃ vahase nityaṃ paśya dharmaṃ vihaṃgama //

nyastāyāṃ ca tato 'ṅgulyāṃ śiraḥ kukṣau samāviśat
kukṣiś ca caraṇasyāntaḥ prāviśac cūrṇito 'bhavat
tataḥ kṛtāñjalir dīno vyathito lajjayānvitaḥ //

trāhi trāhi jagannātha bhṛtyaṃ mām aparādhinam
tvaṃ prabhuḥ sarvalokānāṃ dhartā dhāryas tvam eva ca //

aparādhasahasrāṇi kṣamante prabhaviṣṇavaḥ
kṛtāparādhe 'pi jane mahatī yasya vai kṛpā //

vadanti munayaḥ sarve tvām eva karuṇākaram
rakṣasvārtaṃ jaganmātar mām ambujanivāsini
kamale bālakaṃ dīnam ārtaṃ tanayavatsale //

tataḥ kṛpānvitā devī śrīr apy āha janārdanam //

rakṣa nātha svakaṃ bhṛtyaṃ garuḍaṃ vipadaṃ gatam
janārdana uvācedaṃ nandinaṃ śaṃbhuvāhanam //

naya nāgaṃ sagaruḍaṃ śaṃbhor antikam eva ca
tatprasādāc ca garuḍo maheśvaranirīkṣitaḥ
ātmīyaṃ ca punā rūpaṃ garuḍaḥ samavāpsyati //

tathety uktvā ca vṛṣabho nāgena garuḍena ca
śanaiḥ sa śaṃkaraṃ gatvā sarvaṃ tasmai nyavedayat
śaṃkaro 'pi garutmantaṃ provāca śaśiśekharaḥ //

yāhi gaṅgāṃ mahābāho gautamīṃ lokapāvanīm
sarvakāmapradāṃ śāntāṃ tām āplutya punar vapuḥ //

prāpsyase sarvakāmāṃś ca śatadhātha sahasradhā
sarvapāpopataptā ye durdaivonmūlitodyamāḥ
prāṇino 'bhīṣṭadā teṣāṃ śaraṇaṃ khaga gautamī //

tadvākyaṃ praṇato bhūtvā śrutvā tu garuḍo 'bhyagāt
gaṅgām āplutya garuḍaḥ śivaṃ viṣṇuṃ nanāma saḥ //

tataḥ svarṇamayaḥ pakṣī vajradeho mahābalaḥ
vegī bhavan muniśreṣṭha punar viṣṇum iyāt sudhīḥ //

tataḥ prabhṛti tat tīrthaṃ gāruḍaṃ sarvakāmadam
tatra snānādi yat kiṃcit karoti prayato naraḥ
sarvaṃ tad akṣayaṃ vatsa śivaviṣṇupriyāvaham //