Brahma Purana · Chapter 9

pitā somasya bho viprā jajñe 'trir bhagavān ṛṣiḥ
brahmaṇo mānasāt pūrvaṃ prajāsargaṃ vidhitsataḥ //

anuttaraṃ nāma tapo yena taptaṃ hi tat purā
trīṇi varṣasahasrāṇi divyānīti hi naḥ śrutam //

ūrdhvam ācakrame tasya retaḥ somatvam īyivat
netrābhyāṃ vāri susrāva daśadhā dyotayan diśaḥ //

taṃ garbhaṃ vidhinādiṣṭā daśa devyo dadhus tataḥ
sametya dhārayām āsur na ca tāḥ samaśaknuvan //

yadā na dhāraṇe śaktās tasya garbhasya tā diśaḥ
tatas tābhiḥ sa tyaktas tu nipapāta vasuṃdharām //

patitaṃ somam ālokya brahmā lokapitāmahaḥ
ratham āropayām āsa lokānāṃ hitakāmyayā //

tasmin nipatite devāḥ putre 'treḥ paramātmani
tuṣṭuvur brahmaṇaḥ putrās tathānye munisattamāḥ //

tasya saṃstūyamānasya tejaḥ somasya bhāsvataḥ
āpyāyanāya lokānāṃ bhāvayām āsa sarvataḥ //

sa tena rathamukhyena sāgarāntāṃ vasuṃdharām
triḥsaptakṛtvo 'tiyaśāś cakārābhipradakṣiṇām //

tasya yac caritaṃ tejaḥ pṛthivīm anvapadyata
oṣadhyas tāḥ samudbhūtā yābhiḥ saṃdhāryate jagat //

sa labdhatejā bhagavān saṃstavaiś ca svakarmabhiḥ
tapas tepe mahābhāgaḥ padmānāṃ darśanāya saḥ //

tatas tasmai dadau rājyaṃ brahmā brahmavidāṃ varaḥ
bījauṣadhīnāṃ viprāṇām apāṃ ca munisattamāḥ //

sa tat prāpya mahārājyaṃ somaḥ saumyavatāṃ varaḥ
samājahre rājasūyaṃ sahasraśatadakṣiṇam //

dakṣiṇām adadāt somas trīṃl lokān iti naḥ śrutam
tebhyo brahmarṣimukhyebhyaḥ sadasyebhyaś ca bho dvijāḥ //

hiraṇyagarbho brahmātrir bhṛguś ca ṛtvijo 'bhavat
sadasyo 'bhūd dharis tatra munibhir bahubhir vṛtaḥ //

taṃ sinīś ca kuhūś caiva dyutiḥ puṣṭiḥ prabhā vasuḥ
kīrtir dhṛtiś ca lakṣmīś ca nava devyaḥ siṣevire //

prāpyāvabhṛtham apy agryaṃ sarvadevarṣipūjitaḥ
virarājādhirājendro daśadhā bhāsayan diśaḥ //

tasya tat prāpya duṣprāpyam aiśvaryam ṛṣisatkṛtam
vibabhrāma matis tātā vinayād anayāhṛtā //

bṛhaspateḥ sa vai bhāryām aiśvaryamadamohitaḥ
jahāra tarasā somo vimatyāṅgirasaḥ sutam //

sa yācyamāno devaiś ca tathā devarṣibhir muhuḥ
naiva vyasarjayat tārāṃ tasmāy aṅgirase tadā //

uśanā tasya jagrāha pārṣṇim aṅgirasas tadā
rudraś ca pārṣṇiṃ jagrāha gṛhītvājagavaṃ dhanuḥ //

tena brahmaśiro nāma paramāstraṃ mahātmanā
uddiśya devān utsṛṣṭaṃ yenaiṣāṃ nāśitaṃ yaśaḥ //

tatra tad yuddham abhavat prakhyātaṃ tārakāmayam
devānāṃ dānavānāṃ ca lokakṣayakaraṃ mahat //

tatra śiṣṭās tu ye devās tuṣitāś caiva ye dvijāḥ
brahmāṇaṃ śaraṇaṃ jagmur ādidevaṃ sanātanam //

tadā nivāryośanasaṃ taṃ vai rudraṃ ca śaṃkaram
dadāv aṅgirase tārāṃ svayam eva pitāmahaḥ //

tām antaḥprasavāṃ dṛṣṭvā kruddhaḥ prāha bṛhaspatiḥ
madīyāyāṃ na te yonau garbho dhāryaḥ kathaṃcana //

iṣīkāstambam āsādya garbhaṃ sā cotsasarja ha
jātamātraḥ sa bhagavān devānām ākṣipad vapuḥ //

tataḥ saṃśayam āpannās tārām ūcuḥ surottamāḥ
satyaṃ brūhi sutaḥ kasya somasyātha bṛhaspateḥ //

pṛcchyamānā yadā devair nāha sā vibudhān kila
tadā tāṃ śaptum ārabdhaḥ kumāro dasyuhantamaḥ //

taṃ nivārya tato brahmā tārāṃ papraccha saṃśayam
yad atra tathyaṃ tad brūhi tāre kasya sutas tv ayam //

uvāca prāñjaliḥ sā taṃ somasyeti pitāmaham
tadā taṃ mūrdhni cāghrāya somo rājā sutaṃ prati //

budha ity akaron nāma tasya bālasya dhīmataḥ
pratikūlaṃ ca gagane samabhyuttiṣṭhate budhaḥ //

utpādayām āsa tadā putraṃ vairājaputrikam
tasyāpatyaṃ mahātejā babhūvailaḥ purūravāḥ //

urvaśyāṃ jajñire yasya putrāḥ sapta mahātmanaḥ
etat somasya vo janma kīrtitaṃ kīrtivardhanam //

vaṃśam asya muniśreṣṭhāḥ kīrtyamānaṃ nibodhata
dhanyam āyuṣyam ārogyaṃ puṇyaṃ saṃkalpasādhanam //

somasya janma śrutvaiva pāpebhyo vipramucyate //