Brahma Purana · Chapter 88

tasmād apy aparaṃ tīrthaṃ janasthānam iti śrutam
caturyojanavistīrṇaṃ smaraṇān muktidaṃ nṛṇām //

vaivasvatānvaye jāto rājābhūj janakaḥ purā
so 'pāṃpates tu tanujām upayeme guṇārṇavām //

dharmārthakāmamokṣāṇāṃ janakāṃ janako nṛpaḥ
anurūpaguṇatvāc ca tasya bhāryā guṇārṇavā //

yājñavalkyaś ca viprendras tasya rājñaḥ purohitaḥ
tam apṛcchan nṛpaśreṣṭho yājñavalkyaṃ purohitam //

bhuktimuktī ubhe śreṣṭhe nirṇīte munisattamaiḥ
dāsīdāsebhaturaga rathādyair bhuktir uttamā //

kiṃtv antavirasā bhuktir muktir ekā niratyayā
bhukter muktiḥ śreṣṭhatamā bhuktyā muktiṃ kathaṃ vrajet //

sarvasaṅgaparityāgān muktiprāptiḥ suduḥkhataḥ
tad brūhi dvijaśārdūla sukhān muktiḥ kathaṃ bhavet //

apāṃpatis tava guruḥ śvaśuraḥ priyakṛt tathā
taṃ gatvā pṛccha nṛpate upadekṣyati te hitam //

yājñavalkyaś ca janako rājānaṃ varuṇaṃ tadā
gatvā cocatur avyagrau muktimārgaṃ yathākramam //

dvidhā tu saṃsthitā muktiḥ karmadvāre 'py akarmaṇi
vede ca niścito mārgaḥ karma jyāyo hy akarmaṇaḥ //

sarvaṃ ca karmaṇā baddhaṃ puruṣārthacatuṣṭayam
akarmaṇaivāpyata iti muktimārgo mṛṣocyate //

karmaṇā sarvadhānyāni setsyanti nṛpasattama
tasmāt sarvātmanā karma kartavyaṃ vaidikaṃ nṛbhiḥ //

tena bhuktiṃ ca muktiṃ ca prāpnuvantīha mānavāḥ
akarmaṇaḥ karma puṇyaṃ karma cāpy āśrameṣu ca //

jātyāśritaṃ ca rājendra tatrāpi śṛṇu dharmavit
āśramāṇi ca catvāri karmadvārāṇi mānada //

caturṇām āśramāṇāṃ ca gārhasthyaṃ puṇyadaṃ smṛtam
tasmād bhuktiś ca muktiś ca bhavatīti matir mama //

etac chrutvā tu janako yājñavalkyaś ca buddhimān
varuṇaṃ pūjayitvā tu punar vacanam ūcatuḥ //

ko deśaḥ kiṃ ca tīrthaṃ syād bhuktimuktipradāyakam
tad vadasva suraśreṣṭha sarvajño 'si namo 'stu te //

pṛthivyāṃ bhārataṃ varṣaṃ daṇḍakaṃ tatra puṇyadam
tasmin kṣetre kṛtaṃ karma bhuktimuktipradaṃ nṛṇām //

tīrthānāṃ gautamī gaṅgā śreṣṭhā muktipradā nṛṇām
tatra yajñena dānena bhogān muktim avāpsyati //

yājñavalkyaś ca janako vācaṃ śrutvā hy apāṃpateḥ
varuṇena hy anujñātau svapurīṃ jagmatus tadā //

aśvamedhādikaṃ karma cakāra janako nṛpaḥ
yājayām āsa viprendro yājñavalkyaś ca taṃ nṛpam //

gaṅgātīraṃ samāśritya yajñān muktim avāpa rāṭ
tathā janakarājāno bahavas tatra karmaṇā //

muktiṃ prāpur mahābhāgā gautamyāś ca prasādataḥ
tataḥ prabhṛti tat tīrthaṃ janasthāneti viśrutam //

janakānāṃ yajñasado janasthānaṃ prakīrtitam
caturyojanavistīrṇaṃ smaraṇāt sarvapāpanut //

tatra snānena dānena pitṝṇāṃ tarpaṇena tu
tīrthasya smaraṇād vāpi gamanād bhaktisevanāt //

sarvān kāmān avāpnoti muktiṃ ca samavāpnuyāt //