Brahma Purana · Chapter 85

kṣudhātīrtham iti khyātaṃ śṛṇu nārada tanmanāḥ
kathyamānaṃ mahāpuṇyaṃ sarvakāmapradaṃ nṛṇām //

ṛṣir āsīt purā kaṇvas tapasvī vedavittamaḥ
paribhramann āśramāṇi kṣudhayā paripīḍitaḥ //

gautamasyāśramaṃ puṇyaṃ samṛddhaṃ cānnavāriṇā
ātmānaṃ ca kṣudhāyuktaṃ samṛddhaṃ cāpi gautamam //

vīkṣya kaṇvo 'tha vaiṣamyaṃ vairāgyam agamat tadā
gautamo 'pi dvijaśreṣṭho hy ahaṃ tapasi niṣṭhitaḥ //

samena yācñāyuktā syāt tasmād gautamaveśmani
na bhokṣye 'haṃ kṣudhārto 'pi pīḍite 'pi kalevare //

gaccheyaṃ gautamīṃ gaṅgām arjayeyaṃ ca saṃpadam
iti niścitya medhāvī gatvā gaṅgāṃ ca pāvanīm //

snātvā śucir yatamanā upaviśya kuśāsane
tuṣṭāva gautamīṃ gaṅgāṃ kṣudhāṃ ca paramāpadam //

namo 'stu gaṅge paramārtihāriṇi namaḥ kṣudhe sarvajanārtikāriṇi
namo maheśānajaṭodbhave śubhe namo mahāmṛtyumukhād vinisṛte

puṇyātmanāṃ śāntarūpe krodharūpe durātmanām
saridrūpeṇa sarveṣāṃ tāpapāpāpahāriṇi //

kṣudhārūpeṇa sarveṣāṃ tāpapāpaprade namaḥ
namaḥ śreyaskari devi namaḥ pāpapratardini
namaḥ śāntikari devi namo dāridryanāśini //

ity evaṃ stuvatas tasya purastād abhavad dvayam
ekaṃ gāṅgaṃ manohāri hy aparaṃ bhīṣaṇākṛti
punaḥ kṛtāñjalir bhūtvā namaskṛtvā dvijottamaḥ //

sarvamaṅgalamāṅgalye brāhmi māheśvari śubhe
vaiṣṇavi tryambake devi godāvari namo 'stu te //

tryambakasya jaṭodbhūte gautamasyāghanāśini
saptadhā sāgaraṃ yānti godāvari namo 'stu te //

sarvapāpakṛtāṃ pāpe dharmakāmārthanāśini
duḥkhalobhamayi devi kṣudhe tubhyaṃ namo namaḥ //

tat kaṇvavacanaṃ śrutvā suprīte āhatur dvijam //

abhīṣṭaṃ vada kalyāṇa varān varaya suvrata //

provāca praṇato gaṅgāṃ kaṇvaḥ kṣudhāṃ yathākramam //

dehi devi manojñāni kāmāni vibhavaṃ mama
āyur vittaṃ ca bhuktiṃ ca muktiṃ gaṅge prayaccha me //

ity uktvā gautamīṃ gaṅgāṃ kṣudhāṃ cāha dvijottamaḥ //

mayi madvaṃśaje cāpi kṣudhe tṛṣṇe daridriṇi
yāhi pāpatare rūkṣe na bhūyās tvaṃ kadācana //

anena stavena ye vai tvāṃ stuvanti kṣudhāturāḥ
teṣāṃ dāridryaduḥkhāni na bhaveyur varo 'paraḥ //

asmiṃs tīrthe mahāpuṇye snānadānajapādikam
ye kurvanti narā bhaktyā lakṣmībhājo bhavantu te //

yas tv idaṃ paṭhate stotraṃ tīrthe vā yadi vā gṛhe
tasya dāridryaduḥkhebhyo na bhayaṃ syād varo 'paraḥ //

evam astv iti coktvā te kaṇvaṃ yāte svam ālayam
tataḥ prabhṛti tat tīrthaṃ kāṇvaṃ gāṅgaṃ kṣudhābhidham
sarvapāpaharaṃ vatsa pitṝṇāṃ prītivardhanam //