Brahma Purana · Chapter 84

paiśācaṃ tīrtham aparaṃ pūjitaṃ brahmavādibhiḥ
tasya svarūpaṃ vakṣyāmi gautamyā dakṣiṇe taṭe //

girir brahmagireḥ pārśve añjano nāma nārada
tasmiñ śaile munivara śāpabhraṣṭā varāpsarā //

añjanā nāma tatrāsīd uttamāṅgena vānarī
kesarī nāma tadbhartā adriketi tathāparā //

sāpi kesariṇo bhāryā śāpabhraṣṭā varāpsarā
uttamāṅgena mārjārī sāpy āste 'ñjanaparvate //

dakṣiṇārṇavam abhyāgāt kesarī lokaviśrutaḥ
etasminn antare 'gastyo 'ñjanaṃ parvatam abhyagāt //

añjanā cādrikā caiva agastyam ṛṣisattamam
pūjayām āsatur ubhe yathānyāyaṃ yathāsukham //

tataḥ prasanno bhagavān āhobhe vriyatāṃ varaḥ
te āhatur ubhe 'gastyaṃ putrau dehi munīśvara //

sarvebhyo balinau śreṣṭhau sarvalokopakārakau
tathety uktvā muniśreṣṭho jagāmāśāṃ sa dakṣiṇām //

tataḥ kadācit te kāle añjanā cādrikā tathā
gītaṃ nṛtyaṃ ca hāsyaṃ ca kurvatyau girimūrdhani //

vāyuś ca nirṛtiś cāpi te dṛṣṭvā sasmitau surau
kāmākrāntadhiyau cobhau tadā satvaram īyatuḥ //

bhārye bhavetām ubhayor āvāṃ devau varapradau
te apy ūcatur astv etad remāte girimūrdhani //

añjanāyāṃ tathā vāyor hanumān samajāyata
adrikāyāṃ ca nirṛter adrir nāma piśācarāṭ //

punas te āhatur ubhe putrau jātau muner varāt
āvayor vikṛtaṃ rūpam uttamāṅgena dūṣitam //

śāpāc chacīpates tatra yuvām ājñātum arhathaḥ
tataḥ provāca bhagavān vāyuś ca nirṛtis tathā //

gautamyāṃ snānadānābhyāṃ śāpamokṣo bhaviṣyati
ity uktvā tāv ubhau prītau tatraivāntaradhīyatām //

tato 'ñjanāṃ samādāya adriḥ paiśācamūrtimān
bhrātur hanumataḥ prītyai snāpayām āsa mātaram //

tathaiva hanumān gaṅgām ādāyādrim atitvaran
mārjārarūpiṇīṃ nītvā gautamyās tīram āptavān //

tataḥ prabhṛti tat tīrthaṃ paiśācaṃ cāñjanaṃ tathā
brahmaṇo girim āsādya sarvakāmapradaṃ śubham //

yojanānāṃ tripañcāśan mārjāraṃ pūrvato bhavet
mārjārasaṃjñitāt tasmād dhanūmantaṃ vṛṣākapim //

phenāsaṃgamam ākhyātaṃ sarvakāmapradaṃ śubham
tasya svarūpaṃ vyuṣṭiś ca tatraiva procyate śubhā //