બ્રહ્મ પુરાણ · અધ્યાય 84

પૈશાચં તીર્થમ્ અપરં પૂજિતં બ્રહ્મવાદિભિઃ
તસ્ય સ્વરૂપં વક્ષ્યામિ ગૌતમ્યા દક્ષિણે તટે ॥

ગિરિર્ બ્રહ્મગિરેઃ પાર્શ્વે અઞ્જનો નામ નારદ
તસ્મિઞ્ શૈલે મુનિવર શાપભ્રષ્ટા વરાપ્સરા ॥

અઞ્જના નામ તત્રાસીદ્ ઉત્તમાઙ્ગેન વાનરી
કેસરી નામ તદ્ભર્તા અદ્રિકેતિ તથાપરા ॥

સાપિ કેસરિણો ભાર્યા શાપભ્રષ્ટા વરાપ્સરા
ઉત્તમાઙ્ગેન માર્જારી સાપ્ય્ આસ્તે ઽઞ્જનપર્વતે ॥

દક્ષિણાર્ણવમ્ અભ્યાગાત્ કેસરી લોકવિશ્રુતઃ
એતસ્મિન્ન્ અન્તરે ઽગસ્ત્યો ઽઞ્જનં પર્વતમ્ અભ્યગાત્ ॥

અઞ્જના ચાદ્રિકા ચૈવ અગસ્ત્યમ્ ઋષિસત્તમમ્
પૂજયામ્ આસતુર્ ઉભે યથાન્યાયં યથાસુખમ્ ॥

તતઃ પ્રસન્નો ભગવાન્ આહોભે વ્રિયતાં વરઃ
તે આહતુર્ ઉભે ઽગસ્ત્યં પુત્રૌ દેહિ મુનીશ્વર ॥

સર્વેભ્યો બલિનૌ શ્રેષ્ઠૌ સર્વલોકોપકારકૌ
તથેત્ય્ ઉક્ત્વા મુનિશ્રેષ્ઠો જગામાશાં સ દક્ષિણામ્ ॥

તતઃ કદાચિત્ તે કાલે અઞ્જના ચાદ્રિકા તથા
ગીતં નૃત્યં ચ હાસ્યં ચ કુર્વત્યૌ ગિરિમૂર્ધનિ ॥

વાયુશ્ ચ નિરૃતિશ્ ચાપિ તે દૃષ્ટ્વા સસ્મિતૌ સુરૌ
કામાક્રાન્તધિયૌ ચોભૌ તદા સત્વરમ્ ઈયતુઃ ॥

ભાર્યે ભવેતામ્ ઉભયોર્ આવાં દેવૌ વરપ્રદૌ
તે અપ્ય્ ઊચતુર્ અસ્ત્વ્ એતદ્ રેમાતે ગિરિમૂર્ધનિ ॥

અઞ્જનાયાં તથા વાયોર્ હનુમાન્ સમજાયત
અદ્રિકાયાં ચ નિરૃતેર્ અદ્રિર્ નામ પિશાચરાટ્ ॥

પુનસ્ તે આહતુર્ ઉભે પુત્રૌ જાતૌ મુનેર્ વરાત્
આવયોર્ વિકૃતં રૂપમ્ ઉત્તમાઙ્ગેન દૂષિતમ્ ॥

શાપાચ્ છચીપતેસ્ તત્ર યુવામ્ આજ્ઞાતુમ્ અર્હથઃ
તતઃ પ્રોવાચ ભગવાન્ વાયુશ્ ચ નિરૃતિસ્ તથા ॥

ગૌતમ્યાં સ્નાનદાનાભ્યાં શાપમોક્ષો ભવિષ્યતિ
ઇત્ય્ ઉક્ત્વા તાવ્ ઉભૌ પ્રીતૌ તત્રૈવાન્તરધીયતામ્ ॥

તતો ઽઞ્જનાં સમાદાય અદ્રિઃ પૈશાચમૂર્તિમાન્
ભ્રાતુર્ હનુમતઃ પ્રીત્યૈ સ્નાપયામ્ આસ માતરમ્ ॥

તથૈવ હનુમાન્ ગઙ્ગામ્ આદાયાદ્રિમ્ અતિત્વરન્
માર્જારરૂપિણીં નીત્વા ગૌતમ્યાસ્ તીરમ્ આપ્તવાન્ ॥

તતઃ પ્રભૃતિ તત્ તીર્થં પૈશાચં ચાઞ્જનં તથા
બ્રહ્મણો ગિરિમ્ આસાદ્ય સર્વકામપ્રદં શુભમ્ ॥

યોજનાનાં ત્રિપઞ્ચાશન્ માર્જારં પૂર્વતો ભવેત્
માર્જારસંજ્ઞિતાત્ તસ્માદ્ ધનૂમન્તં વૃષાકપિમ્ ॥

ફેનાસંગમમ્ આખ્યાતં સર્વકામપ્રદં શુભમ્
તસ્ય સ્વરૂપં વ્યુષ્ટિશ્ ચ તત્રૈવ પ્રોચ્યતે શુભા ॥