Brahma Purana · Chapter 82

yat khyātaṃ kṛttikātīrthaṃ kārttikeyād anantaram
tasya śravaṇamātreṇa somapānaphalaṃ labhet //

purā tārakanāśāya bhavareto 'pibat kaviḥ
retogarbhaṃ kaviṃ dṛṣṭvā ṛṣipatnyo 'spṛhan mune //

saptarṣīṇām ṛtusnātāṃ varjayitvā tv arundhatīm
tāsu garbhaḥ samabhavat ṣaṭsu strīṣu tadāgnitaḥ //

tapyamānās tu śobhiṣṭhā ṛtusnātās tu tā mune
kiṃ kurmaḥ kva nu gacchāmaḥ kiṃ kṛtvā sukṛtaṃ bhavet //

ity uktvā tā mitho gaṅgāṃ vyagrā gatvā vyapīḍayan
tābhyas te niḥsṛtā garbhāḥ phenarūpās tadāmbhasi //

ambhasā tv ekatāṃ prāptā vāyunā sarva eva hi
ekarūpas tadā tābhyaḥ ṣaṇmukhaḥ samajāyata //

srāvayitvā tu tān garbhān ṛṣipatnyo gṛhān yayuḥ
tāsāṃ vikṛtarūpāṇi dṛṣṭvā te ṛṣayo 'bruvan //

gamyatāṃ gamyatāṃ śīghraṃ svairī vṛttir na yujyate
strīṇām iti tato vatsa nirastāḥ patibhis tu tāḥ //

tato duḥkhaṃ samāviṣṭās tyaktāḥ svapatibhiś ca ṣaṭ
tā dṛṣṭvā nāradaḥ prāha kārttikeyo harodbhavaḥ //

gāṅgeyo 'gnibhavaś ceti vikhyātas tārakāntakaḥ
taṃ yāntu na cirād eva prīto bhogaṃ pradāsyati //

devarṣer vacanād eva samabhyetya ca ṣaṇmukham
kṛttikāḥ svayam evaitad yathāvṛttaṃ nyavedayat //

tābhyo vākyaṃ kṛttikābhyaḥ kārttikeyo 'numanya ca
gautamīṃ yāntu sarvāś ca snātvāpūjya maheśvaram //

eṣyāmi cāhaṃ tatraiva yāsyāmi suramandiram
tathety uktvā kṛttikāś ca snātvā gaṅgāṃ ca gautamīm //

deveśvaraṃ ca saṃpūjya kārttikeyānuśāsanāt
deveśvaraprasādena prayayuḥ suramandiram //

tataḥ prabhṛti tat tīrthaṃ kṛttikātīrtham ucyate
kārttikyāṃ kṛttikāyoge tatra yaḥ snānam ācaret //

sarvakratuphalaṃ prāpya rājā bhavati dhārmikaḥ
tattīrthasmaraṇaṃ vāpi yaḥ karoti śṛṇoti ca
sarvapāpavinirmukto dīrgham āyur avāpnuyāt //