Brahma Purana · Chapter 81

kārttikeyaṃ paraṃ tīrthaṃ kaumāram iti viśrutam
yannāmaśravaṇād eva kulavān rūpavān bhavet //

nihate tārake daitye svasthe jāte triviṣṭape
kārttikeyaṃ sutaṃ jyeṣṭhaṃ prītyā provāca pārvatī //

yathāsukhaṃ bhuṅkṣva bhogāṃs trailokye manasaḥ priyān
mamājñayā prītamanāḥ pituś caiva prasādataḥ //

evam uktaḥ sa vai mātrā viśākho devatāstriyaḥ
yathāsukhaṃ balād reme devapatnyo 'pi remire //

tataḥ saṃbhujyamānāsu devapatnīṣu nārada
nāśaknuvan vārayituṃ kārttikeyaṃ divaukasaḥ //

tato nivedayām āsuḥ pārvatyai putrakarma tat
asakṛd vāryamāṇo 'pi mātrā devaiḥ sa śaktidhṛk //

naivāsāv akarod vākyaṃ strīṣv āsaktas tu ṣaṇmukhaḥ
abhiśāpabhayād bhītā pārvatī paryacintayat //

putrasnehāt tathaiveśā devānāṃ kāryasiddhaye
devapatnyaś ciraṃ rakṣyā iti matvā punaḥ punaḥ //

yasyāṃ tu ramate skandaḥ pārvatī tv api tādṛśī
tadrūpam ātmanaḥ kṛtvā vartayām āsa pārvatī //

indrasya varuṇasyāpi bhāryām āhūya ṣaṇmukhaḥ
yāvat paśyati tasyāṃ tu mātṛrūpam apaśyata //

tām apāsya namasyātha punar anyām athāhvayat
tasyāṃ tu mātṛrūpaṃ sa prekṣya lajjām upeyivān //

evaṃ bahvīṣu tad rūpaṃ dṛṣṭvā mātṛmayaṃ jagat
iti saṃcintya gāṅgeyo vairāgyam agamat tadā //

sa tu mātṛkṛtaṃ jñātvā pravṛttasya nivartanam
nivāryaś ced ahaṃ bhogāt kiṃtu pūrvaṃ pravartitaḥ //

tasmān mātṛkṛtaṃ sarvaṃ mama hāsyāspadaṃ tv iti
lajjayā parayā yukto gautamīm agamat tadā //

iyaṃ ca mātṛrūpā me śṛṇotu mama bhāṣitam
itaḥ strīnāmadheyaṃ yan mama mātṛsamaṃ matam //

evaṃ jñātvā lokanāthaḥ pārvatyā saha śaṃkaraḥ
putraṃ nivārayām āsa vṛttam ity abravīd guruḥ //

tataḥ surapatiḥ prītaḥ kiṃ dadāmīti cintayan
kṛtāñjalipuṭaḥ skandaḥ pitaraṃ punar abravīt //

senāpatiḥ surapatis tava putro 'ham ity api
alam etena deveśa kiṃ varaiḥ surapūjita //

athavā dātukāmo 'si lokānāṃ hitakāmyayā
yāce 'haṃ nātmanā deva tad anujñātum arhasi //

mahāpātakinaḥ kecid gurudārābhigāminaḥ
atrāplavanamātreṇa dhautapāpā bhavantu te //

āpnuvantūttamāṃ jātiṃ tiryañco 'pi sureśvara
kurūpo rūpasaṃpattim atra snānād avāpnuyāt //

evam astv iti taṃ śaṃbhuḥ pratyanandat suteritam
tataḥ prabhṛti tat tīrthaṃ kārttikeyam iti śrutam
tatra snānaṃ ca dānaṃ ca sarvakratuphalapradam //