બ્રહ્મ પુરાણ · અધ્યાય 82

યત્ ખ્યાતં કૃત્તિકાતીર્થં કાર્ત્તિકેયાદ્ અનન્તરમ્
તસ્ય શ્રવણમાત્રેણ સોમપાનફલં લભેત્ ॥

પુરા તારકનાશાય ભવરેતો ઽપિબત્ કવિઃ
રેતોગર્ભં કવિં દૃષ્ટ્વા ઋષિપત્ન્યો ઽસ્પૃહન્ મુને ॥

સપ્તર્ષીણામ્ ઋતુસ્નાતાં વર્જયિત્વા ત્વ્ અરુન્ધતીમ્
તાસુ ગર્ભઃ સમભવત્ ષટ્સુ સ્ત્રીષુ તદાગ્નિતઃ ॥

તપ્યમાનાસ્ તુ શોભિષ્ઠા ઋતુસ્નાતાસ્ તુ તા મુને
કિં કુર્મઃ ક્વ નુ ગચ્છામઃ કિં કૃત્વા સુકૃતં ભવેત્ ॥

ઇત્ય્ ઉક્ત્વા તા મિથો ગઙ્ગાં વ્યગ્રા ગત્વા વ્યપીડયન્
તાભ્યસ્ તે નિઃસૃતા ગર્ભાઃ ફેનરૂપાસ્ તદામ્ભસિ ॥

અમ્ભસા ત્વ્ એકતાં પ્રાપ્તા વાયુના સર્વ એવ હિ
એકરૂપસ્ તદા તાભ્યઃ ષણ્મુખઃ સમજાયત ॥

સ્રાવયિત્વા તુ તાન્ ગર્ભાન્ ઋષિપત્ન્યો ગૃહાન્ યયુઃ
તાસાં વિકૃતરૂપાણિ દૃષ્ટ્વા તે ઋષયો ઽબ્રુવન્ ॥

ગમ્યતાં ગમ્યતાં શીઘ્રં સ્વૈરી વૃત્તિર્ ન યુજ્યતે
સ્ત્રીણામ્ ઇતિ તતો વત્સ નિરસ્તાઃ પતિભિસ્ તુ તાઃ ॥

તતો દુઃખં સમાવિષ્ટાસ્ ત્યક્તાઃ સ્વપતિભિશ્ ચ ષટ્
તા દૃષ્ટ્વા નારદઃ પ્રાહ કાર્ત્તિકેયો હરોદ્ભવઃ ॥

ગાઙ્ગેયો ઽગ્નિભવશ્ ચેતિ વિખ્યાતસ્ તારકાન્તકઃ
તં યાન્તુ ન ચિરાદ્ એવ પ્રીતો ભોગં પ્રદાસ્યતિ ॥

દેવર્ષેર્ વચનાદ્ એવ સમભ્યેત્ય ચ ષણ્મુખમ્
કૃત્તિકાઃ સ્વયમ્ એવૈતદ્ યથાવૃત્તં ન્યવેદયત્ ॥

તાભ્યો વાક્યં કૃત્તિકાભ્યઃ કાર્ત્તિકેયો ઽનુમન્ય ચ
ગૌતમીં યાન્તુ સર્વાશ્ ચ સ્નાત્વાપૂજ્ય મહેશ્વરમ્ ॥

એષ્યામિ ચાહં તત્રૈવ યાસ્યામિ સુરમન્દિરમ્
તથેત્ય્ ઉક્ત્વા કૃત્તિકાશ્ ચ સ્નાત્વા ગઙ્ગાં ચ ગૌતમીમ્ ॥

દેવેશ્વરં ચ સંપૂજ્ય કાર્ત્તિકેયાનુશાસનાત્
દેવેશ્વરપ્રસાદેન પ્રયયુઃ સુરમન્દિરમ્ ॥

તતઃ પ્રભૃતિ તત્ તીર્થં કૃત્તિકાતીર્થમ્ ઉચ્યતે
કાર્ત્તિક્યાં કૃત્તિકાયોગે તત્ર યઃ સ્નાનમ્ આચરેત્ ॥

સર્વક્રતુફલં પ્રાપ્ય રાજા ભવતિ ધાર્મિકઃ
તત્તીર્થસ્મરણં વાપિ યઃ કરોતિ શૃણોતિ ચ
સર્વપાપવિનિર્મુક્તો દીર્ઘમ્ આયુર્ અવાપ્નુયાત્ ॥