Brahma Purana · Chapter 77

tryambakaś ca iti prāha gautamaṃ munibhir vṛtam //

dvihastamātre tīrthāni saṃbhaviṣyanti gautama
sarvatrāhaṃ saṃnihitaḥ sarvakāmapradas tathā //

narmadā tu saricchreṣṭhā parvate 'marakaṇṭake
yamunā saṃgatā tatra prabhāse tu sarasvatī //

kṛṣṇā bhīmarathī caiva tuṅgabhadrā tu nārada
tisṛṇāṃ saṃgamo yatra tat tīrthaṃ muktidaṃ nṛṇām //

payouṣṇī saṃgatā yatra tatratyā tac ca muktidam
iyaṃ tu gautamī vatsa yatra kvāpi mamājñayā //

sarveṣāṃ sarvadā nṝṇāṃ snānān muktiṃ pradāsyati
kiṃcitkāle puṇyatamaṃ kiṃcittīrthaṃ surāgame //

sarveṣāṃ sarvadā tīrthaṃ gautamī nātra saṃśayaḥ
tisraḥ koṭyo 'rdhakoṭī ca yojanānāṃ śatadvaye //

tīrthāni muniśārdūla saṃbhaviṣyanti gautama
iyaṃ māheśvarī gaṅgā gautamī vaiṣṇavīti ca //

brāhmī godāvarī nandā sunandā kāmadāyinī
brahmatejaḥsamānītā sarvapāpapraṇāśanī //

smaraṇād eva pāpaugha hantrī mama sadā priyā
pañcānām api bhūtānām āpaḥ śreṣṭhatvam āgatāḥ //

tatrāpi tīrthabhūtās tu tasmād āpaḥ parāḥ smṛtāḥ
tāsāṃ bhāgīrathī śreṣṭhā tābhyo 'pi gautamī tathā //

ānītā sajaṭā gaṅgā asyā nānyac chubhāvaham
svarge bhuvi tale vāpi tīrthaṃ sarvārthadaṃ mune //

ity etat kathitaṃ putra gautamāya mahātmane
sākṣād dhareṇa tuṣṭena mayā tava niveditam //

evaṃ sā gautamī gaṅgā sarvebhyo 'py adhikā matā
tatsvarūpaṃ ca kathitaṃ kuto 'nyā śravaṇaspṛhā //