બ્રહ્મ પુરાણ · અધ્યાય 77

ત્ર્યમ્બકશ્ ચ ઇતિ પ્રાહ ગૌતમં મુનિભિર્ વૃતમ્ ॥

દ્વિહસ્તમાત્રે તીર્થાનિ સંભવિષ્યન્તિ ગૌતમ
સર્વત્રાહં સંનિહિતઃ સર્વકામપ્રદસ્ તથા ॥

નર્મદા તુ સરિચ્છ્રેષ્ઠા પર્વતે ઽમરકણ્ટકે
યમુના સંગતા તત્ર પ્રભાસે તુ સરસ્વતી ॥

કૃષ્ણા ભીમરથી ચૈવ તુઙ્ગભદ્રા તુ નારદ
તિસૃણાં સંગમો યત્ર તત્ તીર્થં મુક્તિદં નૃણામ્ ॥

પયોઉષ્ણી સંગતા યત્ર તત્રત્યા તચ્ ચ મુક્તિદમ્
ઇયં તુ ગૌતમી વત્સ યત્ર ક્વાપિ મમાજ્ઞયા ॥

સર્વેષાં સર્વદા નૄણાં સ્નાનાન્ મુક્તિં પ્રદાસ્યતિ
કિંચિત્કાલે પુણ્યતમં કિંચિત્તીર્થં સુરાગમે ॥

સર્વેષાં સર્વદા તીર્થં ગૌતમી નાત્ર સંશયઃ
તિસ્રઃ કોટ્યો ઽર્ધકોટી ચ યોજનાનાં શતદ્વયે ॥

તીર્થાનિ મુનિશાર્દૂલ સંભવિષ્યન્તિ ગૌતમ
ઇયં માહેશ્વરી ગઙ્ગા ગૌતમી વૈષ્ણવીતિ ચ ॥

બ્રાહ્મી ગોદાવરી નન્દા સુનન્દા કામદાયિની
બ્રહ્મતેજઃસમાનીતા સર્વપાપપ્રણાશની ॥

સ્મરણાદ્ એવ પાપૌઘ હન્ત્રી મમ સદા પ્રિયા
પઞ્ચાનામ્ અપિ ભૂતાનામ્ આપઃ શ્રેષ્ઠત્વમ્ આગતાઃ ॥

તત્રાપિ તીર્થભૂતાસ્ તુ તસ્માદ્ આપઃ પરાઃ સ્મૃતાઃ
તાસાં ભાગીરથી શ્રેષ્ઠા તાભ્યો ઽપિ ગૌતમી તથા ॥

આનીતા સજટા ગઙ્ગા અસ્યા નાન્યચ્ છુભાવહમ્
સ્વર્ગે ભુવિ તલે વાપિ તીર્થં સર્વાર્થદં મુને ॥

ઇત્ય્ એતત્ કથિતં પુત્ર ગૌતમાય મહાત્મને
સાક્ષાદ્ ધરેણ તુષ્ટેન મયા તવ નિવેદિતમ્ ॥

એવં સા ગૌતમી ગઙ્ગા સર્વેભ્યો ઽપ્ય્ અધિકા મતા
તત્સ્વરૂપં ચ કથિતં કુતો ઽન્યા શ્રવણસ્પૃહા ॥