Brahma Purana · Chapter 76

maheśvarajaṭājuṭād gaṅgām ādāya gautamaḥ
āgatya brahmaṇaḥ puṇye tataḥ kim akarod girau //

ādāya gautamo gaṅgāṃ śuciḥ prayatamānasaḥ
pūjito devagandharvais tathā girinivāsibhiḥ //

girer mūrdhni jaṭāṃ sthāpya smaran devaṃ trilocanam
uvāca prāñjalir bhūtvā gaṅgāṃ sa dvijasattamaḥ //

trilocanajaṭodbhūte sarvakāmapradāyini
kṣamasva mātaḥ śāntāsi sukhaṃ yāhi hitaṃ kuru //

evam uktā gautamena gaṅgā provāca gautamam
divyarūpadharā devī divyasraganulepanā //

gaccheyaṃ devasadanam athavāpi kamaṇḍalum
rasātalaṃ vā gaccheyaṃ jātas tvaṃ satyavāg asi //

trayāṇām upakārārthaṃ lokānāṃ yācitā mayā
śaṃbhunā ca tathā dattā devi tan nānyathā bhavet //

tad gautamavacaḥ śrutvā gaṅgā mene dvijeritam
tredhātmānaṃ vibhajyātha svargamartyarasātale //

svarge caturdhā vyagamat saptadhā martyamaṇḍale
rasātale caturdhaiva saivaṃ pañcadaśākṛtiḥ //

sarvatra sarvabhūtaiva sarvapāpavināśinī
sarvakāmapradā nityaṃ saiva vede pragīyate //

martyā martyagatām eva paśyanti na talaṃ gatām
naiva svargagatāṃ martyāḥ paśyanty ajñānabuddhayaḥ //

yāvat sāgaragā devī tāvad devamayī smṛtā
utsṛṣṭā gautamenaiva prāyāt pūrvārṇavaṃ prati //

tato devarṣibhir juṣṭāṃ mātaraṃ jagataḥ śubhām
gautamo muniśārdūlaḥ pradakṣiṇam athākarot //

trilocanaṃ sureśānaṃ prathamaṃ pūjya gautamaḥ
ubhayos tīrayoḥ snānaṃ karomīti dadhe matim //

smṛtamātras tadā tatrā virāsīt karuṇārṇavaḥ
tatra snānaṃ kathaṃ sidhyed ity evaṃ śarvam abravīt //

kṛtāñjalipuṭo bhūtvā bhaktinamras trilocanam //

devadeva maheśāna tīrthasnānavidhiṃ mama
brūhi samyaṅ maheśāna lokānāṃ hitakāmyayā //

maharṣe śṛṇu sarvaṃ ca vidhiṃ godāvarībhavam
pūrvaṃ nāndīmukhaṃ kṛtvā dehaśuddhiṃ vidhāya ca //

brāhmaṇān bhojayitvā ca teṣām ājñāṃ pragṛhya ca
brahmacaryeṇa gacchanti patitālāpavarjitāḥ //

yasya hastau ca pādau ca manaś caiva susaṃyatam
vidyā tapaś ca kīrtiś ca sa tīrthaphalam aśnute //

bhāvaduṣṭiṃ parityajya svadharmapariniṣṭhitaḥ
śrāntasaṃvāhanaṃ kurvan dadyād annaṃ yathocitam //

akiṃcanebhyaḥ sādhubhyo dadyād vastrāṇi kambalān
śṛṇvan harikathāṃ divyāṃ tathā gaṅgāsamudbhavām
anena vidhinā gacchan samyak tīrthaphalaṃ labhet //