Brahma Purana · Chapter 72

himavatparvate śreṣṭhe nānāratnavicitrite
nānāvṛkṣalatākīrṇe nānādvijaniṣevite //

nadīnadasaraḥkūpa taḍāgādibhir āvṛte
devagandharvayakṣādi siddhacāraṇasevite //

śubhamārutasaṃpanne harṣotkarṣaikakāraṇe
merumandarakailāsa mainākādinagair vṛte //

vasiṣṭhāgastyapaulastya lomaśādibhir āvṛte
mahotsave vartamāne vivāhaḥ samajāyata //

tatra vedī ratnamayī śobhitā svarṇabhūṣitā
vajramāṇikyavaidūrya tanmayastambhaśobhitā //

jayālakṣmīśubhākṣānti kīrtipuṣṭyādisaṃvṛtā
merumandarakailāsa raivataiḥ pariśobhitaiḥ //

pūjito lokanāthena viṣṇunā prabhaviṣṇunā
mainākaḥ parvataśreṣṭho reje 'tīva hiraṇmayaḥ //

ṛṣayo lokapālāś ca ādityāḥ samarudgaṇāḥ
vivāhe vedikāṃ cakrur devadevasya śūlinaḥ //

viśvakarmā svayaṃ tvaṣṭā vedīṃ cakre satoraṇām
surabhī nandinī nandā sunandā kāmadohinī //

ābhis tu śobhiteśānyā vivāhaḥ samajāyata
samudrāḥ sarito nāgā oṣadhyo lokamātaraḥ //

savanaspatibījāś ca sarve tatra samāyayuḥ
bhuvaḥ karma ilā cakre oṣadhyas tv annakarma ca //

varuṇaḥ pānakarmāṇi dānakarma dhanādhipaḥ
agniś cakāra tatrānnaṃ yac ceṣṭaṃ lokanāthayoḥ //

tatra tatra pṛthak pūjāṃ cakre viṣṇuḥ sanātanaḥ
vedāś ca sarahasyā vai gāyanti ca hasanti ca //

nṛtyanty apsarasaḥ sarvā jagur gandharvakiṃnarāḥ
lājādhṛk cāpi maināko babhūva munisattama //

puṇyāhavācanaṃ vṛttam antarveśmani nārada
vedikāyām upāviṣṭau daṃpatī surasattamau //

pratiṣṭhāpyāgniṃ vidhivad aśmānaṃ cāpi putraka
hutvā lājāṃś ca vidhivat pradakṣiṇam athākarot //

aśmanaḥ sparśahetoś ca devyaṅguṣṭhaṃ kare 'spṛśat
viṣṇunā preritaḥ śaṃbhur dakṣiṇasya padasya ca //

tām adarśam ahaṃ tatra homaṃ kurvan harāntike
dṛṣṭe 'ṅguṣṭhe duṣṭabuddhyā vīryaṃ susrāva me tadā //

lajjayā kaluṣībhūtaḥ skannaṃ vīryam acūrṇayam
madvīryāc cūrṇitāt sūkṣmād vālakhilyās tu jajñire //

tato mahān abhūt tatra hāhākāraḥ suroditaḥ
lajjayā paribhūto 'haṃ nirgatas tu tadāsanāt //

paśyatsu devasaṃgheṣu tūṣṇīṃbhūteṣu nārada
gacchantaṃ māṃ mahādevo dṛṣṭvā nandinam abravīt //

brahmāṇam āhvayasveha gatapāpaṃ karomy aham
kṛtāparādhe 'pi jane santaḥ sakṛpamānasāḥ
mohayanty api vidvāṃsaṃ viṣayāṇām iyaṃ sthitiḥ //

evam uktvā sa bhagavān umayā sahitaḥ śivaḥ
mamānukampayā caiva lokānāṃ hitakāmyayā //

etac cakāra lokeśaḥ śṛṇu nārada yatnataḥ
pāpināṃ pāpamokṣāya bhūmir āpo bhaviṣyati //

tayoś ca sārasarvasvam āhariṣyāmi pāvanam
evaṃ niścitya bhagavāṃs tayoḥ sāraṃ samāharat //

bhūmiṃ kamaṇḍaluṃ kṛtvā tatrāpaḥ saṃniveśya ca
pāvamānyādibhiḥ sūktair abhimantrya ca yatnataḥ //

trijagatpāvanīṃ śaktiṃ tatra sasmāra pāpahā
mām uvāca sa lokeśo gṛhāṇemaṃ kamaṇḍalum //

āpo vai mātaro devyo bhūmir mātā tathāparā
sthityutpattivināśānāṃ hetutvam ubhayoḥ sthitam //

atra pratiṣṭhito dharmo hy atra yajñaḥ sanātanaḥ
atra bhuktiś ca muktiś ca sthāvaraṃ jaṅgamaṃ tathā //

smaraṇān mānasaṃ pāpaṃ vacanād vācikaṃ tathā
snānapānābhiṣekāc ca praṇaśyaty api kāyikam //

etad evāmṛtaṃ loke naitasmāt pāvanaṃ param
mayābhimantritaṃ brahman gṛhāṇemaṃ kamaṇḍalum //

atratyaṃ vāri yaḥ kaścit smared api paṭhed api
sa sarvakāmān āpnoti gṛhāṇemaṃ kamaṇḍalum //

bhūtebhyaś cāpi pañcabhya āpo bhūtaṃ mahoditam
tāsām utkṛṣṭam etasmād gṛhāṇemaṃ kamaṇḍalum //

atra yad vāri śobhiṣṭhaṃ puṇyaṃ pāvanam eva ca
spṛṣṭvā smṛtvā ca dṛṣṭvā ca brahman pāpād vimokṣyase //

evam uktvā mahādevaḥ prādān mama kamaṇḍalum
tataḥ suragaṇāḥ sarve bhaktyā procuḥ sureśvaram
āhlādaś ca mahāṃs tatra jayaśabdo vyavartata //

devotsave mātur ajaḥ padāgraṃ samīkṣya pāpāt patitatvam āpa
prādāt kṛpāluḥ smaraṇāt pavitrāṃ gaṅgāṃ pitā puṇyakamaṇḍalusthām