Brahma Purana · Chapter 69

bahvāścaryas tvayā prokto viṣṇuloko jagatpate
nityānandakaraḥ śrīmān bhuktimuktiphalapradaḥ //

kṣetraṃ ca durlabhaṃ loke kīrtitaṃ puruṣottamam
tyaktvā yatra naro dehaṃ yāti sālokyatāṃ hareḥ //

samyak kṣetrasya māhātmyaṃ tvayā samyak prakīrtitam
yatra svadehasaṃtyāgād viṣṇulokaṃ vrajen naraḥ //

aho mokṣasya mārgo 'yaṃ dehatyāgas tvayoditaḥ
narāṇām upakārāya puruṣākhye na saṃśayaḥ //

anāyāsena deveśa dehaṃ tyaktvā narottamāḥ
tasmin kṣetre paraṃ viṣṇoḥ padaṃ yānti nirāmayam //

śrutvā kṣetrasya māhātmyaṃ vismayo no mahān abhūt
prayāgapuṣkarādīni kṣetrāṇy āyatanāni ca //

pṛthivyāṃ sarvatīrthāni saritaś ca sarāṃsi ca
na tathā tāni sarvāṇi praśaṃsasi surottama //

yathā praśaṃsasi kṣetraṃ puruṣākhyaṃ punaḥ punaḥ
jñāto 'smābhir abhiprāyas tavedānīṃ pitāmaha //

yena praśaṃsasi kṣetraṃ muktidaṃ puruṣottamam
puruṣākhyasamaṃ nūnaṃ kṣetraṃ nāsti mahītale
tena tvaṃ vibudhaśreṣṭha praśaṃsasi punaḥ punaḥ //

satyaṃ satyaṃ muniśreṣṭhā bhavadbhiḥ samudāhṛtam
puruṣākhyasamaṃ kṣetraṃ nāsty atra pṛthivītale //

santi yāni tu tīrthāni puṇyāny āyatanāni ca
tāni śrīpuruṣākhyasya kalāṃ nārhanti ṣoḍaśīm //

yathā sarveśvaro viṣṇuḥ sarvalokottamottamaḥ
tathā samastatīrthānāṃ variṣṭhaṃ puruṣottamam //

ādityānāṃ yathā viṣṇuḥ śreṣṭhatve samudāhṛtaḥ
tathā samastatīrthānāṃ variṣṭhaṃ puruṣottamam //

nakṣatrāṇāṃ yathā somaḥ sarasāṃ sāgaro yathā
tathā samastatīrthānāṃ variṣṭhaṃ puruṣottamam //

vasūnāṃ pāvako yadvad rudrāṇāṃ śaṃkaro yathā
tathā samastatīrthānāṃ variṣṭhaṃ puruṣottamam //

varṇānāṃ brāhmaṇo yadvad vainateyaś ca pakṣiṇām
tathā samastatīrthānāṃ variṣṭhaṃ puruṣottamam //

śikhariṇāṃ yathā meruḥ parvatānāṃ himālayaḥ
tathā samastatīrthānāṃ variṣṭhaṃ puruṣottamam //

pramadānāṃ yathā lakṣmīḥ saritāṃ jāhnavī yathā
tathā samastatīrthānāṃ variṣṭhaṃ puruṣottamam //

airāvato gajendrāṇāṃ maharṣīṇāṃ bhṛgur yathā
tathā samastatīrthānāṃ variṣṭhaṃ puruṣottamam //

senānīnāṃ yathā skandaḥ siddhānāṃ kapilo yathā
tathā samastatīrthānāṃ variṣṭhaṃ puruṣottamam //

uccaiḥśravā yathāśvānāṃ kavīnām uśanā kaviḥ
tathā samastatīrthānāṃ variṣṭhaṃ puruṣottamam //

munīnāṃ ca yathā vyāsaḥ kubero yakṣarakṣasām
tathā samastatīrthānāṃ variṣṭhaṃ puruṣottamam //

indriyāṇāṃ mano yadvad bhūtānām avanī yathā
tathā samastatīrthānāṃ variṣṭhaṃ puruṣottamam //

aśvatthaḥ sarvavṛkṣāṇāṃ pavanaḥ plavatāṃ yathā
tathā samastatīrthānāṃ variṣṭhaṃ puruṣottamam //

bhūṣaṇānāṃ tu sarveṣāṃ yathā cūḍāmaṇir dvijāḥ
tathā samastatīrthānāṃ variṣṭhaṃ puruṣottamam //

gandharvāṇāṃ citrarathaḥ śastrāṇāṃ kuliśo yathā
tathā samastatīrthānāṃ variṣṭhaṃ puruṣottamam //

akāraḥ sarvavarṇānāṃ gāyatrī chandasāṃ yathā
tathā samastatīrthānāṃ variṣṭhaṃ puruṣottamam //

sarvāṅgebhyo yathā śreṣṭham uttamāṅgaṃ dvijottamāḥ
tathā samastatīrthānāṃ variṣṭhaṃ puruṣottamam //

arundhatī yathā strīṇāṃ satīnāṃ śreṣṭhatāṃ gatā
tathā samastatīrthānāṃ śreṣṭhaṃ tat puruṣottamam //

yathā samastavidyānāṃ mokṣavidyā parā smṛtā
tathā samastatīrthānāṃ śreṣṭhaṃ tat puruṣottamam //

manuṣyāṇāṃ yathā rājā dhenūnām api kāmadhuk
tathā samastatīrthānāṃ variṣṭhaṃ puruṣottamam //

suvarṇaṃ sarvaratnānāṃ sarpāṇāṃ vāsukir yathā
tathā samastatīrthānāṃ variṣṭhaṃ puruṣottamam //

prahlādaḥ sarvadaityānāṃ rāmaḥ śastrabhṛtāṃ yathā
tathā samastatīrthānāṃ variṣṭhaṃ puruṣottamam //

jhaṣāṇāṃ makaro yadvan mṛgāṇāṃ mṛgarāḍ yathā
tathā samastatīrthānāṃ variṣṭhaṃ puruṣottamam //

samudrāṇāṃ yathā śreṣṭhaḥ kṣīrodaḥ saritāṃ patiḥ
tathā samastatīrthānāṃ variṣṭhaṃ puruṣottamam //

varuṇo yādasāṃ yadvad yamaḥ saṃyamināṃ yathā
tathā samastatīrthānāṃ variṣṭhaṃ puruṣottamam //

devarṣīṇāṃ yathā śreṣṭho nārado munisattamāḥ
tathā samastatīrthānāṃ variṣṭhaṃ puruṣottamam //

dhātūnāṃ kāñcanaṃ yadvat pavitrāṇāṃ ca dakṣiṇā
tathā samastatīrthānāṃ variṣṭhaṃ puruṣottamam //

prajāpatir yathā dakṣa ṛṣīṇāṃ kaśyapo yathā
tathā samastatīrthānāṃ variṣṭhaṃ puruṣottamam //

grahāṇāṃ bhāskaro yadvan mantrāṇāṃ praṇavo yathā
tathā samastatīrthānāṃ variṣṭhaṃ puruṣottamam //

aśvamedhas tu yajñānāṃ yathā śreṣṭhaḥ prakīrtitaḥ
tathā samastatīrthānāṃ kṣetraṃ ca tad dvijottamāḥ //

oṣadhīnāṃ yathā dhānyaṃ tṛṇeṣu tṛṇarāḍ yathā
tathā samastatīrthānām uttamaṃ puruṣottamam //

yathā samastatīrthānāṃ dharmaḥ saṃsāratārakaḥ
tathā samastatīrthānāṃ śreṣṭhaṃ tat puruṣottamam //