Brahma Purana · Chapter 68

śrotum icchāmahe deva viṣṇulokam anāmayam
lokānandakaraṃ kāntaṃ sarvāścaryasamanvitam //

pramāṇaṃ tasya lokasya bhogaṃ kāntiṃ balaṃ prabho
karmaṇā kena gacchanti tatra dharmaparāyaṇāḥ //

darśanāt sparśanād vāpi tīrthasnānādināpi vā
vistarād brūhi tattvena paraṃ kautūhalaṃ hi naḥ //

śṛṇudhvaṃ munayaḥ sarve yat paraṃ paramaṃ padam
bhaktānām īhitaṃ dhanyaṃ puṇyaṃ saṃsāranāśanam //

pravaraṃ sarvalokānāṃ viṣṇvākhyaṃ vadato mama
sarvāścaryamayaṃ puṇyaṃ sthānaṃ trailokyapūjitam //

aśokaiḥ pārijātaiś ca mandāraiś campakadrumaiḥ
mālatīmallikākundair bakulair nāgakesaraiḥ //

puṃnāgair atimuktaiś ca priyaṅgutagarārjunaiḥ
pāṭalācūtakhadiraiḥ karṇikāravanojjvalaiḥ //

nāraṅgaiḥ panasair lodhrair nimbadāḍimasarjakaiḥ
drākṣālakucakharjūrair madhukendraphalair drumaiḥ //

kapitthair nārikeraiś ca tālaiḥ śrīphalasaṃbhavaiḥ
kalpavṛkṣair asaṃkhyaiś ca vanyair anyaiḥ suśobhanaiḥ //

saralaiś candanair nīpair devadāruśubhāñjanaiḥ
jātīlavaṅgakaṅkolaiḥ karpūrāmodavāsibhiḥ //

tāmbūlapattranicayais tathā pūgīphaladrumaiḥ
anyaiś ca vividhair vṛkṣaiḥ sarvartuphalaśobhitaiḥ //

puṣpair nānāvidhaiś caiva latāgucchasamudbhavaiḥ
nānājalāśayaiḥ puṇyair nānāpakṣirutair varaiḥ //

dīrghikāśatasaṃghātais toyapūrṇair manoharaiḥ
kumudaiḥ śatapattraiś ca puṣpaiḥ kokanadair varaiḥ //

raktanīlotpalaiḥ kāntaiḥ kahlāraiś ca sugandhibhiḥ
anyaiś ca jalajaiḥ puṣpair nānāvarṇaiḥ suśobhanaiḥ //

haṃsakāraṇḍavākīrṇaiś cakravākopaśobhitaiḥ
koyaṣṭikaiś ca dātyūhaiḥ kāraṇḍavaravākulaiḥ //

cātakaiḥ priyaputraiś ca jīvaṃjīvakajātibhiḥ
anyair divyair jalacarair vihāramadhurasvanaiḥ //

evaṃ nānāvidhair divyair nānāścaryasamanvitaiḥ
vṛkṣair jalāśayaiḥ puṇyair bhūṣitaṃ sumanoharaiḥ //

tatra divyair vimānaiś ca nānāratnavibhūṣitaiḥ
kāmagaiḥ kāñcanaiḥ śubhrair divyagandharvanāditaiḥ //

taruṇādityasaṃkāśair apsarobhir alaṃkṛtaiḥ
hemaśayyāsanayutair nānābhogasamanvitaiḥ //

khecaraiḥ sapatākaiś ca muktāhārāvalambibhiḥ
nānāvarṇair asaṃkhyātair jātarūpaparicchadaiḥ //

nānākusumagandhāḍhyaiś candanāgurubhūṣitaiḥ
sukhapracārabahulair nānāvāditraniḥsvanaiḥ //

manomārutatulyaiś ca kiṅkiṇīstabakākulaiḥ
viharanti pure tasmin vaiṣṇave lokapūjite //

nānāṅganābhiḥ satataṃ gandharvāpsarasādibhiḥ
candrānanābhiḥ kāntābhir yoṣidbhiḥ sumanoharaiḥ //

pīnonnatakucāgrābhiḥ sumadhyābhiḥ samantataḥ
śyāmāvadātavarṇābhir mattamātaṅgagāmibhiḥ //

parivārya naraśreṣṭhaṃ vījayanti sma tāḥ striyaḥ
cāmarai rukmadaṇḍaiś ca nānāratnavibhūṣitaiḥ //

gītanṛtyais tathā vādyair modamānair madālasaiḥ
yakṣavidyādharaiḥ siddhair gandharvair apsarogaṇaiḥ //

surasaṃghaiś ca ṛṣibhiḥ śuśubhe bhuvanottamam
tatra prāpya mahābhogān prāpnuvanti manīṣiṇaḥ //

vaṭarājasamīpe tu dakṣiṇasyodadhes taṭe
dṛṣṭo yair bhagavān kṛṣṇaḥ puṣkarākṣo jagatpatiḥ //

krīḍanty apsarasaiḥ sārdhaṃ yāvad dyauś candratārakam
prataptahemasaṃkāśā jarāmaraṇavarjitāḥ //

sarvaduḥkhavihīnāś ca tṛṣṇāglānivivarjitāḥ
caturbhujā mahāvīryā vanamālāvibhūṣitāḥ //

śrīvatsalāñchanair yuktāḥ śaṅkhacakragadādharāḥ
kecin nīlotpalaśyāmāḥ kecit kāñcanasaṃnibhāḥ //

kecin marakataprakhyāḥ kecid vaidūryasaṃnibhāḥ
śyāmavarṇāḥ kuṇḍalinas tathānye vajrasaṃnibhāḥ //

na tādṛk sarvadevānāṃ bhānti lokā dvijottamāḥ
yādṛg bhāti harer lokaḥ sarvāścaryasamanvitaḥ //

na tatra punarāvṛttir gamanāj jāyate dvijāḥ
prabhāvāt tasya devasya yāvad ābhūtasaṃplavam //

vicaranti pure divye rūpayauvanagarvitāḥ
kṛṣṇaṃ rāmaṃ subhadrāṃ ca paśyanti puruṣottame //

prataptahemasaṃkāśaṃ taruṇādityasaṃnibham
puramadhye harer bhāti mandiraṃ ratnabhūṣitam //

anekaśatasāhasraiḥ patākaiḥ samalaṃkṛtam
yojanāyutavistīrṇaṃ hemaprākāraveṣṭitam //

nānāvarṇair dhvajaiś citraiḥ kalpitaiḥ sumanoharaiḥ
vibhāti śārado yadvan nakṣatraiḥ saha candramāḥ //

caturdvāraṃ suvistīrṇaṃ kañcukibhiḥ surakṣitam
purasaptakasaṃyuktaṃ mahotsekaṃ manoharam //

prathamaṃ kāñcanaṃ tatra dvitīyaṃ marakatair yutam
indranīlaṃ tṛtīyaṃ tu mahānīlaṃ tataḥ param //

puraṃ tu pañcamaṃ dīptaṃ padmarāgamayaṃ puram
ṣaṣṭhaṃ vajramayaṃ viprā vaidūryaṃ saptamaṃ puram //

nānāratnamayair hema pravālāṅkurabhūṣitaiḥ
stambhair adbhutasaṃkāśair bhāti tad bhavanaṃ mahat //

dṛśyante tatra siddhāś ca bhāsayanti diśo daśa
paurṇamāsyāṃ sanakṣatro yathā bhāti niśākaraḥ //

ārūḍhas tatra bhagavān salakṣmīko janārdanaḥ
pītāmbaradharaḥ śyāmaḥ śrīvatsalakṣmasaṃyutaḥ //

jvalat sudarśanaṃ cakraṃ ghoraṃ sarvāstranāyakam
dadhāra dakṣiṇe haste sarvatejomayaṃ hariḥ //

kundendurajataprakhyaṃ hāragokṣīrasaṃnibham
ādāya taṃ muniśreṣṭhāḥ savyahastena keśavaḥ //

yasya śabdena sakalaṃ saṃkṣobhaṃ jāyate jagat
viśrutaṃ pāñcajanyeti sahasrāvartabhūṣitam //

duṣkṛtāntakarīṃ raudrāṃ daityadānavanāśinīm
jvaladvahniśikhākārāṃ duḥsahāṃ tridaśair api //

kaumodakīṃ gadāṃ cāsau dhṛtavān dakṣiṇe kare
vāme visphurati hy asya śārṅgaṃ sūryasamaprabham //

śarair ādityasaṃkāśair jvālāmālākulair varaiḥ
yo 'sau saṃharate devas trailokyaṃ sacarācaram //

sarvānandakaraḥ śrīmān sarvaśāstraviśāradaḥ
sarvalokagurur devaḥ sarvair devair namaskṛtaḥ //

sahasramūrdhā deveśaḥ sahasracaraṇekṣaṇaḥ
sahasrākhyaḥ sahasrāṅgaḥ sahasrabhujavān prabhuḥ //

siṃhāsanagato devaḥ padmapattrāyatekṣaṇaḥ
vidyudvispaṣṭasaṃkāśo jagannātho jagadguruḥ //

parītaḥ surasiddhaiś ca gandharvāpsarasāṃ gaṇaiḥ
yakṣavidyādharair nāgair munisiddhaiḥ sacāraṇaiḥ //

suparṇair dānavair daityai rākṣasair guhyakiṃnaraiḥ
anyair devagaṇair divyaiḥ stūyamāno virājate //

tatrasthā satataṃ kīrtiḥ prajñā medhā sarasvatī
buddhir matis tathā kṣāntiḥ siddhimūrtis tathā dyutiḥ //

gāyatrī caiva sāvitrī maṅgalā sarvamaṅgalā
prabhā matis tathā kāntis tatra nārāyaṇī sthitā //

śraddhā ca kauśikī devī vidyut saudāminī tathā
nidrā rātris tathā māyā tathānyāmarayoṣitaḥ //

vāsudevasya sarvās tā bhavane saṃpratiṣṭhitāḥ
atha kiṃ bahunoktena sarvaṃ tatra pratiṣṭhitam //

ghṛtācī menakā rambhā sahajanyā tilottamā
urvaśī caiva nimlocā tathānyā vāmanā parā //

mandodarī ca subhagā viśvācī vipulānanā
bhadrāṅgī citrasenā ca pramlocā sumanoharā //

munisaṃmohinī rāmā candramadhyā śubhānanā
sukeśī nīlakeśā ca tathā manmathadīpinī //

alambuṣā miśrakeśī tathānyā muñjikasthalā
kratusthalā varāṅgī ca pūrvacittis tathā parā //

parāvatī mahārūpā śaśilekhā śubhānanā
haṃsalīlānugāminyo mattavāraṇagāminī //

bimbauṣṭhī navagarbhā ca vikhyātāḥ surayoṣitaḥ
etāś cānyā apsaraso rūpayauvanagarvitāḥ //

sumadhyāś cāruvadanāḥ sarvālaṃkārabhūṣitāḥ
gītamādhuryasaṃyuktāḥ sarvalakṣaṇasaṃyutāḥ //

gītavādye ca kuśalāḥ suragandharvayoṣitaḥ
nṛtyanty anudinaṃ tatra yatrāsau puruṣottamaḥ //

na tatra rogo no glānir na mṛtyur na himātapau
na kṣut pipāsā na jarā na vairūpyaṃ na cāsukham //

paramānandajananaṃ sarvakāmaphalapradam
viṣṇulokāt paraṃ lokaṃ nātra paśyāmi bho dvijāḥ //

ye lokāḥ svargaloke tu śrūyante puṇyakarmaṇām
viṣṇulokasya te viprāḥ kalāṃ nārhanti ṣoḍaśīm //

evaṃ hareḥ purasthānaṃ sarvabhogaguṇānvitam
sarvasaukhyakaraṃ puṇyaṃ sarvāścaryamayaṃ dvijāḥ //

na tatra nāstikā yānti puruṣā viṣayātmakāḥ
na kṛtaghnā na piśunā no stenā nājitendriyāḥ //

ye 'rcayanti sadā bhaktyā vāsudevaṃ jagadgurum
te tatra vaiṣṇavā yānti viṣṇulokaṃ na saṃśayaḥ //

dakṣiṇasyodadhes tīre kṣetre paramadurlabhe
dṛṣṭvā kṛṣṇaṃ ca rāmaṃ ca subhadrāṃ ca dvijottamāḥ //

kalpavṛkṣasamīpe tu ye tyajanti kalevaram
te tatra manujā yānti mṛtā ye puruṣottame //

vaṭasāgarayor madhye yaḥ smaret puruṣottamam
te 'pi tatra narā yānti ye mṛtāḥ puruṣottame //

te 'pi tatra paraṃ sthānaṃ yānti nāsty atra saṃśayaḥ
evaṃ mayā muniśreṣṭhā viṣṇulokaḥ sanātanaḥ
sarvānandakaraḥ prokto bhuktimuktiphalapradaḥ //