Brahma Purana · Chapter 67

ekaikasyās tu yātrāyāḥ phalaṃ brūhi pṛthak pṛthak
yat prāpnoti naraḥ kṛtvā nārī vā tatra saṃyatā //

pratiyātrāphalaṃ viprāḥ śṛṇudhvaṃ gadato mama
yat prāpnoti naraḥ kṛtvā tasmin kṣetre susaṃyataḥ //

guḍivāyāṃ tathotthāne phālgunyāṃ viṣuve tathā
yātrāṃ kṛtvā vidhānena dṛṣṭvā kṛṣṇaṃ praṇamya ca //

saṃkarṣaṇaṃ subhadrāṃ ca labhet sarvatra vai phalam
naro gacched viṣṇuloke yāvad indrāś caturdaśa //

yāvad yātrāṃ jyeṣṭhamāse karoti vidhivan naraḥ
tāvat kalpaṃ viṣṇuloke sukhaṃ bhuṅkte na saṃśayaḥ //

tasmin kṣetravare puṇye ramye śrīpuruṣottame
bhuktimuktiprade nṝṇāṃ sarvasattvasukhāvahe //

jyeṣṭhe yātrāṃ naraḥ kṛtvā nārī vā saṃyatendriyaḥ
yathoktena vidhānena daśa dve ca samāhitaḥ //

pratiṣṭhāṃ kurute yas tu śāṭhyadambhavivarjitaḥ
sa bhuktvā vividhān bhogān mokṣaṃ cānte labhed dhruvam //

śrotum icchāmahe deva pratiṣṭhāṃ vadatas tava
vidhānaṃ cārcanaṃ dānaṃ phalaṃ tatra jagatpateḥ //

śṛṇudhvaṃ muniśārdūlāḥ pratiṣṭhāṃ vidhicoditām
yāṃ kṛtvā tu naro bhaktyā nārī vā labhate phalam //

yātrā dvādaśa saṃpūrṇā yadā syāt tu dvijottamāḥ
tadā kurvīta vidhivat pratiṣṭhāṃ pāpanāśinīm //

jyeṣṭhe māsi site pakṣe tv ekādaśyāṃ samāhitaḥ
gatvā jalāśayaṃ puṇyam ācamya prayataḥ śuciḥ //

āvāhya sarvatīrthāni dhyātvā nārāyaṇaṃ tathā
tataḥ snānaṃ prakurvīta vidhivat susamāhitaḥ //

yasya yo vidhir uddiṣṭa ṛṣibhiḥ snānakarmaṇi
tenaiva tu vidhānena snānaṃ tasya vidhīyate //

snātvā samyag vidhānena tato devān ṛṣīn pitṝn
saṃtarpayet tathānyāṃś ca nāmagotravidhānavit //

uttīrya vāsasī dhaute nirmale paridhāya vai
upaspṛśya vidhānena bhāskarābhimukhas tataḥ //

gāyatrīṃ pāvanīṃ devīṃ manasā vedamātaram
sarvapāpaharāṃ puṇyāṃ japed aṣṭottaraṃ śatam //

puṇyāṃś ca sauramantrāṃś ca śraddhayā susamāhitaḥ
triḥ pradakṣiṇam āvṛtya bhāskaraṃ praṇamet tataḥ //

vedoktaṃ triṣu varṇeṣu snānaṃ jāpyam udāhṛtam
strīśūdrayoḥ snānajāpyaṃ vedoktavidhivarjitam //

tato gacched gṛhaṃ maunī pūjayet puruṣottamam
prakṣālya hastau pādau ca upaspṛśya yathāvidhi //

ghṛtena snāpayed devaṃ kṣīreṇa tadanantaram
madhugandhodakenaiva tīrthacandanavāriṇā //

tato vastrayugaṃ śreṣṭhaṃ bhaktyā taṃ paridhāpayet
candanāgarukarpūraiḥ kuṅkumena vilepayet //

pūjayet parayā bhaktyā padmaiś ca puruṣottamam
anyaiś ca vaiṣṇavaiḥ puṣpair arcayen mallikādibhiḥ //

saṃpūjyaivaṃ jagannāthaṃ bhuktimuktipradaṃ harim
dhūpaṃ cāgurusaṃyuktaṃ dahed devasya cāgrataḥ //

guggulaṃ ca muniśreṣṭhā dahed gandhasamanvitam
dīpaṃ prajvālayed bhaktyā yathāśaktyā ghṛtena vai //

anyāṃś ca dīpakān dadyād dvādaśaiva samāhitaḥ
ghṛtena ca muniśreṣṭhās tilatailena vā punaḥ //

naivedye pāyasāpūpa śaṣkulīvaṭakaṃ tathā
modakaṃ phāṇitaṃ vālpaṃ phalāni ca nivedayet //

evaṃ pañcopacāreṇa saṃpūjya puruṣottamam
namaḥ puruṣottamāyeti japed aṣṭottaraṃ śatam //

tataḥ prasādayed devaṃ bhaktyā taṃ puruṣottamam
namas te sarvalokeśa bhaktānām abhayaprada //

saṃsārasāgare magnaṃ trāhi māṃ puruṣottama
yās te mayā kṛtā yātrā dvādaśaiva jagatpate //

prasādāt tava govinda saṃpūrṇās tā bhavantu me
evaṃ prasādya taṃ devaṃ daṇḍavat praṇipatya ca //

tato 'rcayed guruṃ bhaktyā puṣpavastrānulepanaiḥ
nānayor antaraṃ yasmād vidyate munisattamāḥ //

devasyopari kurvīta śraddhayā susamāhitaḥ
nānāpuṣpair muniśreṣṭhā vicitraṃ puṣpamaṇḍapam //

kṛtvāvadhāraṇaṃ paścāj jāgaraṃ kārayen niśi
kathāṃ ca vāsudevasya gītikāṃ cāpi kārayet //

dhyāyan paṭhan stuvan devaṃ praṇayed rajanīṃ budhaḥ
tataḥ prabhāte vimale dvādaśyāṃ dvādaśaiva tu //

nimantrayed vratasnātān brāhmaṇān vedapāragān
itihāsapurāṇajñāñ śrotriyān saṃyatendriyān //

snātvā samyag vidhānena dhautavāsā jitendriyaḥ
snāpayet pūrvavat tatra pūjayet puruṣottamam //

gandhaiḥ puṣpair upahārair naivedyair dīpakais tathā
upacārair bahuvidhaiḥ praṇipātaiḥ pradakṣiṇaiḥ //

jāpyaiḥ stutinamaskārair gītavādyair manoharaiḥ
saṃpūjyaivaṃ jagannāthaṃ brāhmaṇān pūjayet tataḥ //

dvādaśaiva tu gās tebhyo dattvā kanakam eva ca
chattropānadyugaṃ caiva śraddhābhaktisamanvitaḥ //

bhaktyā tu sadhanaṃ tebhyo dadyād vastrādikaṃ dvijāḥ
sadbhāvena tu govindas toṣyate pūjito yataḥ //

ācāryāya tato dadyād govastraṃ kanakaṃ tathā
chattropānadyugaṃ cānyat kāṃsyapātraṃ ca bhaktitaḥ //

tatas tān bhojayed viprān bhojyaṃ pāyasapūrvakam
pakvānnaṃ bhakṣyabhojyaṃ ca guḍasarpiḥsamanvitam //

tatas tān annatṛptāṃś ca brāhmaṇān svasthamānasān
dvādaśaivodakumbhāṃś ca dadyāt tebhyaḥ samodakān //

dakṣiṇāṃ ca yathāśaktyā dadyāt tebhyo vimatsaraḥ
kumbhaṃ ca dakṣiṇāṃ caiva ācāryāya nivedayet //

evaṃ saṃpūjya tān viprān guruṃ jñānapradāyakam
pūjayet parayā bhaktyā viṣṇutulyaṃ dvijottamāḥ //

suvarṇavastragodhānyair dravyaiś cānyair varair budhaḥ
saṃpūjya taṃ namaskṛtya imaṃ mantram udīrayet //

sarvavyāpī jagannāthaḥ śaṅkhacakragadādharaḥ
anādinidhano devaḥ prīyatāṃ puruṣottamaḥ //

ity uccārya tato viprāṃs triḥ kṛtvā ca pradakṣiṇām
praṇamya śirasā bhaktyā ācāryaṃ tu visarjayet //

tatas tān brāhmaṇān bhaktyā cāsīmāntam anuvrajet
anuvrajya tu tān sarvān namaskṛtya nivartayet //

bāndhavaiḥ svajanair yuktas tato bhuñjīta vāgyataḥ
anyaiś copāsakair dīnair bhikṣukaiś cānnakāṅkṣibhiḥ //

evaṃ kṛtvā naraḥ samyaṅ nārī vā labhate phalam
aśvamedhasahasrāṇāṃ rājasūyaśatasya ca //

atītaṃ śatam ādāya puruṣāṇāṃ narottamāḥ
bhaviṣyaṃ ca śataṃ viprāḥ svargatyā divyarūpadhṛk //

sarvalakṣaṇasaṃpannaḥ sarvālaṃkārabhūṣitaḥ
sarvakāmasamṛddhātmā devavad vigatajvaraḥ //

rūpayauvanasaṃpanno guṇaiḥ sarvair alaṃkṛtaḥ
stūyamāno 'psarobhiś ca gandharvaiḥ samalaṃkṛtaḥ //

vimānenārkavarṇena kāmagena sthireṇa ca
patākādhvajayuktena sarvaratnair alaṃkṛtaḥ //

udyotayan diśaḥ sarvā ākāśe vigataklamaḥ
yuvā mahābalo dhīmān viṣṇulokaṃ sa gacchati //

tatra kalpaśataṃ yāvad bhuṅkte bhogān yathepsitān
siddhāpsarobhir gandharvaiḥ suravidyādharoragaiḥ //

stūyamāno munivarais tiṣṭhate vigatajvaraḥ
yathā devo jagannāthaḥ śaṅkhacakragadādharaḥ //

tathāsau mudito viprāḥ kṛtvā rūpaṃ caturbhujam
bhuktvā tatra varān bhogān krīḍāṃ kṛtvā suraiḥ saha //

tadante brahmasadanam āyāti sarvakāmadam
siddhavidyādharaiś cāpi śobhitaṃ surakiṃnaraiḥ //

kālaṃ navatikalpaṃ tu tatra bhuktvā sukhaṃ naraḥ
tasmād āyāti viprendrāḥ sarvakāmaphalapradam //

rudralokaṃ suragaṇaiḥ sevitaṃ sukhamokṣadam
anekaśatasāhasrair vimānaiḥ samalaṃkṛtam //

siddhavidyādharair yakṣair bhūṣitaṃ daityadānavaiḥ
aśītikalpakālaṃ tu tatra bhuktvā sukhaṃ naraḥ //

tadante yāti golokaṃ sarvabhogasamanvitam
surasiddhāpsarobhiś ca śobhitaṃ sumanoharam //

tatra saptatikalpāṃs tu bhuktvā bhogam anuttamam
durlabhaṃ triṣu lokeṣu svasthacitto yathāmaraḥ //

tasmād āgacchate lokaṃ prājāpatyam anuttamam
gandharvāpsarasaiḥ siddhair munividyādharair vṛtaḥ //

ṣaṣṭikalpān sukhaṃ tatra bhuktvā nānāvidhaṃ mudā
tadante śakrabhavanaṃ nānāścaryasamanvitam //

gandharvaiḥ kiṃnaraiḥ siddhaiḥ suravidyādharoragaiḥ
guhyakāpsarasaiḥ sādhyair vṛtaiś cānyaiḥ surottamaiḥ //

āgatya tatra pañcāśat kalpān bhuktvā sukhaṃ naraḥ
suralokaṃ tato gatvā vimānaiḥ samalaṃkṛtaḥ //

catvāriṃśat tu kalpāṃs tu bhuktvā bhogān sudurlabhān
āgacchate tato lokaṃ nakṣatrākhyaṃ sudurlabham //

tato bhogān varān bhuṅkte triṃśat kalpān yathepsitān
tasmād āgacchate lokaṃ śaśāṅkasya dvijottamāḥ //

yatrāsau tiṣṭhate somaḥ sarvair devair alaṃkṛtaḥ
tatra viṃśatikalpāṃs tu bhuktvā bhogaṃ sudurlabham //

ādityasya tato lokam āyāti surapūjitam
nānāścaryamayaṃ puṇyaṃ gandharvāpsaraḥsevitam //

tatra bhuktvā śubhān bhogān daśa kalpān dvijottamāḥ
tasmād āyāti bhuvanaṃ gandharvāṇāṃ sudurlabham //

tatra bhogān samastāṃś ca kalpam ekaṃ yathāsukham
bhuktvā cāyāti medinyāṃ rājā bhavati dhārmikaḥ //

cakravartī mahāvīryo guṇaiḥ sarvair alaṃkṛtaḥ
kṛtvā rājyaṃ svadharmeṇa yajñair iṣṭvā sudakṣiṇaiḥ //

tadante yogināṃ lokaṃ gatvā mokṣapradaṃ śivam
tatra bhuktvā varān bhogān yāvad ābhūtasaṃplavam //

tasmād āgacchate cātra jāyate yogināṃ kule
pravare vaiṣṇave viprā durlabhe sādhusaṃmate //

caturvedī vipravaro yajñair iṣṭvāptadakṣiṇaiḥ
vaiṣṇavaṃ yogam āsthāya tato mokṣam avāpnuyāt //

evaṃ yātrāphalaṃ viprā mayā samyag udāhṛtam
bhuktimuktipradaṃ nṝṇāṃ kim anyac chrotum icchatha //