Brahma Purana · Chapter 66

guḍivāmaṇḍapaṃ yāntaṃ ye paśyanti rathe sthitam
kṛṣṇaṃ balaṃ subhadrāṃ ca te yānti bhavanaṃ hareḥ //

ye paśyanti tadā kṛṣṇaṃ saptāhaṃ maṇḍape sthitam
halinaṃ ca subhadrāṃ ca viṣṇulokaṃ vrajanti te //

kena sā nirmitā yātrā dakṣiṇasyāṃ jagatpate
yātrāphalaṃ ca kiṃ tatra prāpyate brūhi mānavaiḥ //

kimarthaṃ sarasas tīre rājñas tasya jagatpate
pavitre vijane deśe gatvā tatra ca maṇḍape //

kṛṣṇaḥ saṃkarṣaṇaś caiva subhadrā ca rathena te
svasthānaṃ saṃparityajya saptarātraṃ vasanti vai //

indradyumnena bho viprāḥ purā vai prārthito hariḥ
saptāhaṃ sarasas tīre mama yātrā bhavatv iti //

guḍivā nāma deveśa bhuktimuktiphalapradā
tasmai kila varaṃ cāsau dadau sa puruṣottamaḥ //

saptāhaṃ sarasas tīre tava rājan bhaviṣyati
guḍivā nāma yātrā me sarvakāmaphalapradā //

ye māṃ tatrārcayiṣyanti śraddhayā maṇḍape sthitam
saṃkarṣaṇaṃ subhadrāṃ ca vidhivat susamāhitāḥ //

brāhmaṇāḥ kṣatriyā vaiśyāḥ striyaḥ śūdrāś ca vai nṛpa
puṣpair gandhais tathā dhūpair dīpair naivedyakair varaiḥ //

upahārair bahuvidhaiḥ praṇipātaiḥ pradakṣiṇaiḥ
jayaśabdais tathā stotrair gītair vādyair manoharaiḥ //

na teṣāṃ durlabhaṃ kiṃcit phalaṃ yasya yad īpsitam
bhaviṣyati nṛpaśreṣṭha matprasādād asaṃśayam //

evam uktvā tu taṃ devas tatraivāntaradhīyata
sa tu rājavaraḥ śrīmān kṛtakṛtyo 'bhavat tadā //

tasmāt sarvaprayatnena guḍivāyāṃ dvijottamāḥ
sarvakāmapradaṃ devaṃ paśyet taṃ puruṣottamam //

aputro labhate putrān nirdhano labhate dhanam
rogāc ca mucyate rogī kanyā prāpnoti satpatim //

āyuḥ kīrtiṃ yaśo medhāṃ balaṃ vidyāṃ dhṛtiṃ paśūn
naraḥ saṃtatim āpnoti rūpayauvanasaṃpadam //

yān yān samīhate bhogān dṛṣṭvā taṃ puruṣottamam
naro vāpy athavā nārī tāṃs tān prāpnoty asaṃśayam //

yātrāṃ kṛtvā guḍivākhyāṃ vidhivat susamāhitaḥ
āṣāḍhasya site pakṣe naro yoṣid athāpi vā //

dṛṣṭvā kṛṣṇaṃ ca rāmaṃ ca subhadrāṃ ca dvijottamāḥ
daśapañcāśvamedhānāṃ phalaṃ prāpnoti cādhikam //

saptāvarān sapta parān vaṃśān uddhṛtya cātmanaḥ
kāmagena vimānena sarvaratnair alaṃkṛtaḥ //

gandharvair apsarobhiś ca sevyamāno yathottaraiḥ
rūpavān subhagaḥ śūro naro viṣṇupuraṃ vrajet //

tatra bhuktvā varān bhogān yāvad ābhūtasaṃplavam
sarvakāmasamṛddhātmā jarāmaraṇavarjitaḥ //

puṇyakṣayād ihāgatya caturvedī dvijo bhavet
vaiṣṇavaṃ yogam āsthāya tato mokṣam avāpnuyāt //