Brahma Purana · Chapter 65

kasmin kāle bhavet snānaṃ kṛṣṇasya kamalodbhava
vidhinā kena tad brūhi tato vidhividāṃ vara //

śṛṇudhvaṃ munayaḥ snānaṃ kṛṣṇasya vadato mama
rāmasya ca subhadrāyāḥ puṇyaṃ sarvāghanāśanam //

māsi jyeṣṭhe ca saṃprāpte nakṣatre candradaivate
paurṇamāsyāṃ tadā snānaṃ sarvakālaṃ harer dvijāḥ //

sarvatīrthamayaḥ kūpas tatrāste nirmalaḥ śuciḥ
tadā bhogavatī tatra pratyakṣā bhavati dvijāḥ //

tasmāj jyaiṣṭhyāṃ samuddhṛtya haimāḍhyaiḥ kalaśair jalam
kṛṣṇarāmābhiṣekārthaṃ subhadrāyāś ca bho dvijāḥ //

kṛtvā suśobhanaṃ mañcaṃ patākābhir alaṃkṛtam
sudṛḍhaṃ sukhasaṃcāraṃ vastraiḥ puṣpair alaṃkṛtam //

vistīrṇaṃ dhūpitaṃ dhūpaiḥ snānārthaṃ rāmakṛṣṇayoḥ
sitavastraparicchannaṃ muktāhārāvalambitam //

tatra nānāvidhair vādyaiḥ kṛṣṇaṃ nīlāmbaraṃ dvijāḥ
madhye subhadrāṃ cāsthāpya jayamaṅgalanisvanaiḥ //

brāhmaṇaiḥ kṣatriyair vaiśyaiḥ śūdraiś cānyaiś ca jātibhiḥ
anekaśatasāhasrair vṛtaṃ strīpuruṣair dvijāḥ //

gṛhasthāḥ snātakāś caiva yatayo brahmacāriṇaḥ
snāpayanti tadā kṛṣṇaṃ mañcasthaṃ sahalāyudham //

tathā samastatīrthāni pūrvoktāni dvijottamāḥ
svodakaiḥ puṣpamiśraiś ca snāpayanti pṛthak pṛthak //

paścāt paṭahaśaṅkhādyair bherīmurajanisvanaiḥ
kāhalais tālaśabdaiś ca mṛdaṅgair jharjharais tathā //

anyaiś ca vividhair vādyair ghaṇṭāsvanavibhūṣitaiḥ
strīṇāṃ maṅgalaśabdaiś ca stutiśabdair manoharaiḥ //

jayaśabdais tathā stotrair vīṇāveṇunināditaiḥ
śrūyate sumahāñ śabdaḥ sāgarasyeva garjataḥ //

munīnāṃ vedaśabdena mantraśabdais tathāparaiḥ
nānāstotraravaiḥ puṇyaiḥ sāmaśabdopabṛṃhitaiḥ //

yatibhiḥ snātakaiś caiva gṛhasthair brahmacāribhiḥ
snānakāle suraśreṣṭha stuvanti parayā mudā //

śyāmair veśyājanaiś caiva kucabhārāvanāmibhiḥ
pītaraktāmbarābhiś ca mālyadāmāvanāmibhiḥ //

saratnakuṇḍalair divyaiḥ suvarṇastabakānvitaiḥ
cāmarai ratnadaṇḍaiś ca vījyete rāmakeśavau //

yakṣavidyādharaiḥ siddhaiḥ kiṃnaraiś cāpsarogaṇaiḥ
parivāryāmbaragatair devagandharvacāraṇaiḥ //

ādityā vasavo rudrāḥ sādhyā viśve marudgaṇāḥ
lokapālās tathā cānye stuvanti puruṣottamam //

namas te devadeveśa purāṇa puruṣottama
sargasthityantakṛd deva lokanātha jagatpate //

trailokyadhāriṇaṃ devaṃ brahmaṇyaṃ mokṣakāraṇam
taṃ namasyāmahe bhaktyā sarvakāmaphalapradam //

stutvaivaṃ vibudhāḥ kṛṣṇaṃ rāmaṃ caiva mahābalam
subhadrāṃ ca muniśreṣṭhās tadākāśe vyavasthitāḥ //

gāyanti devagandharvā nṛtyanty apsarasas tathā
devatūryāṇy avādyanta vātā vānti suśītalāḥ //

puṣpamiśraṃ tadā meghā varṣanty ākāśagocarāḥ
jayaśabdaṃ ca kurvanti munayaḥ siddhacāraṇāḥ //

śakrādyā vibudhāḥ sarva ṛṣayaḥ pitaras tathā
prajānāṃ patayo nāgā ye cānye svargavāsinaḥ //

tato maṅgalasaṃbhārair vidhimantrapuraskṛtam
ābhiṣecanikaṃ dravyaṃ gṛhītvā devatāgaṇāḥ //

indro viṣṇur mahāvīryaḥ sūryācandramasau tathā
dhātā caiva vidhātā ca tathā caivānilānalau //

pūṣā bhago 'ryamā tvaṣṭā aṃśunaiva vivasvatā
patnībhyāṃ sahito dhīmān mitreṇa varuṇena ca //

rudrair vasubhir ādityair aśvibhyāṃ ca vṛtaḥ prabhuḥ
viśvair devair marudbhiś ca sādhyaiś ca pitṛbhiḥ saha //

gandharvair apsarobhiś ca yakṣarākṣasapannagaiḥ
devarṣibhir asaṃkhyeyais tathā brahmarṣibhir varaiḥ //

vaikhānasair vālakhilyair vāyvāhārair marīcipaiḥ
bhṛgubhiś cāṅgirobhiś ca sarvavidyāsuniṣṭhitaiḥ //

sarvavidyādharaiḥ puṇyair yogasiddhibhir āvṛtaḥ
pitāmahaḥ pulastyaś ca pulahaś ca mahātapāḥ //

aṅgirāḥ kaśyapo 'triś ca marīcir bhṛgur eva ca
kratur haraḥ pracetāś ca manur dakṣas tathaiva ca //

ṛtavaś ca grahāś caiva jyotīṃṣi ca dvijottamāḥ
mūrtimatyaś ca sarito devāś caiva sanātanāḥ //

samudrāś ca hradāś caiva tīrthāni vividhāni ca
pṛthivī dyaur diśaś caiva pādapāś ca dvijottamāḥ //

aditir devamātā ca hrīḥ śrīḥ svāhā sarasvatī
umā śacī sinīvālī tathā cānumatiḥ kuhūḥ //

rākā ca dhiṣaṇā caiva patnyaś cānyā divaukasām
himavāṃś caiva vindhyaś ca meruś cānekaśṛṅgavān //

airāvataḥ sānucaraḥ kalākāṣṭhās tathaiva ca
māsārdhaṃ māsa-ṛtavas tathā rātryahanī samāḥ //

uccaiḥśravā hayaśreṣṭho nāgarājaś ca vāmanaḥ
aruṇo garuḍaś caiva vṛkṣāś cauṣadhibhiḥ saha //

dharmaś ca bhagavān devaḥ samājagmur hi saṃgatāḥ
kālo yamaś ca mṛtyuś ca yamasyānucarāś ca ye //

bahulatvāc ca noktā ye vividhā devatāgaṇāḥ
te devasyābhiṣekārthaṃ samāyānti tatas tataḥ //

gṛhītvā te tadā viprāḥ sarve devā divaukasaḥ
ābhiṣecanikaṃ dravyaṃ maṅgalāni ca sarvaśaḥ //

divyasaṃbhārasaṃyuktaiḥ kalaśaiḥ kāñcanair dvijāḥ
sārasvatībhiḥ puṇyābhir divyatoyābhir eva ca //

toyenākāśagaṅgāyāḥ kṛṣṇaṃ rāmeṇa saṃgatam
sapuṣpaiḥ kāñcanaiḥ kumbhaiḥ snāpayanty avanisthitāḥ //

saṃcaranti vimānāni devānām ambare tathā
uccāvacāni divyāni kāmagāni sthirāṇi ca //

divyaratnavicitrāṇi sevitāny apsarogaṇaiḥ
gītair vādyaiḥ patākābhiḥ śobhitāni samantataḥ //

evaṃ tadā muniśreṣṭhāḥ kṛṣṇaṃ rāmeṇa saṃgatam
snāpayitvā subhadrāṃ ca saṃstuvanti mudānvitāḥ //

jaya kṛṣṇa jagannātha jaya saṃkarṣaṇānuja
jaya padmapalāśākṣa jaya vāñchāphalaprada //

jaya mālāvṛtoraska jaya cakragadādhara
jaya padmālayākānta jaya viṣṇo namo 'stu te //

evaṃ stutvā tadā devāḥ śakrādyā hṛṣṭamānasāḥ
siddhacāraṇasaṃghāś ca ye cānye svargavāsinaḥ //

munayo vālakhilyāś ca kṛṣṇaṃ rāmeṇa saṃgatam
subhadrāṃ ca muniśreṣṭhāḥ praṇipatyāmbare sthitāḥ //

dṛṣṭvā stutvā namaskṛtvā tadā te tridivaukasaḥ
kṛṣṇaṃ rāmaṃ subhadrāṃ ca yānti svaṃ svaṃ niveśanam //

saṃcaranti vimānāni devānām ambare tadā
uccāvacāni divyāni kāmagāni sthirāṇi ca //

divyaratnavicitrāṇi sevitāny apsarogaṇaiḥ
gītair vādyaiḥ patākābhiḥ śobhitāni samantataḥ //

tasmin kāle tu ye martyāḥ paśyanti puruṣottamam
balabhadraṃ subhadrāṃ ca te yānti padam avyayam //

subhadrārāmasahitaṃ mañcasthaṃ puruṣottamam
dṛṣṭvā nirāmayaṃ sthānaṃ yānti nāsty atra saṃśayaḥ //

kapilāśatadānena yat phalaṃ puṣkare smṛtam
tat phalaṃ kṛṣṇam ālokya mañcasthaṃ sahalāyudham
subhadrāṃ ca muniśreṣṭhāḥ prāpnoti śubhakṛn naraḥ //

kanyāśatapradānena yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

suvarṇaśataniṣkāṇāṃ dānena yat phalaṃ smṛtam
tat phalaṃ kṛṣṇam ālokya mañcasthaṃ labhate naraḥ //

gosahasrapradānena yat phalaṃ parikīrtitam
tat phalaṃ kṛṣṇam ālokya mañcasthaṃ labhate naraḥ //

bhūmidānena vidhivad yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

yat phalaṃ cānnadānena arghātithyena kīrtitam
tat phalaṃ kṛṣṇam ālokya mañcasthaṃ labhate naraḥ //

vṛṣotsargeṇa vidhivad yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

yat phalaṃ toyadānena grīṣme vānyatra kīrtitam
tat phalaṃ kṛṣṇam ālokya mañcasthaṃ labhate naraḥ //

tiladhenupradānena yat phalaṃ saṃprakīrtitam
tat phalaṃ kṛṣṇam ālokya mañcasthaṃ labhate naraḥ //

gajāśvarathadānena yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

suvarṇaśṛṅgīdānena yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

jaladhenupradānena yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

dānena ghṛtadhenvāś ca phalaṃ yat samudāhṛtam
tat phalaṃ kṛṣṇam ālokya mañcasthaṃ labhate naraḥ //

cāndrāyaṇena cīrṇena yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

māsopavāsair vidhivad yat phalaṃ samudāhṛtam
tat phalaṃ kṛṣṇam ālokya mañcasthaṃ labhate naraḥ //

atha kiṃ bahunoktena bhāṣitena punaḥ punaḥ
tasya devasya māhātmyaṃ mañcasthasya dvijottamāḥ //

yat phalaṃ sarvatīrtheṣu vratair dānaiś ca kīrtitam
tat phalaṃ kṛṣṇam ālokya mañcasthaṃ sahalāyudham //

subhadrāṃ ca muniśreṣṭhāḥ prāpnoti śubhakṛn naraḥ
tasmān naro 'thavā nārī paśyet taṃ puruṣottamam //

tataḥ samastatīrthānāṃ labhet snānādikaṃ phalam
snānaśeṣeṇa kṛṣṇasya toyenātmābhiṣicyate //

vandhyā mṛtaprajā yā tu durbhagā grahapīḍitā
rākṣasādyair gṛhītā vā tathā rogaiś ca saṃhatāḥ //

sadyas tāḥ snānaśeṣeṇa udakenābhiṣecitāḥ
prāpnuvantīpsitān kāmān yān yān vāñchanti cepsitān //

putrārthinī labhet putrān saubhāgyaṃ ca sukhārthinī
rogārtā mucyate rogād dhanaṃ ca dhanakāṅkṣiṇī //

puṇyāni yāni toyāni tiṣṭhanti dharaṇītale
tāni snānāvaśeṣasya kalāṃ nārhanti ṣoḍaśīm //

tasmāt snānāvaśeṣaṃ yat kṛṣṇasya salilaṃ dvijāḥ
tenābhiṣiñced gātrāṇi sarvakāmapradaṃ hi tat //

snātaṃ paśyanti ye kṛṣṇaṃ vrajantaṃ dakṣiṇāmukham
brahmahatyādibhiḥ pāpair mucyante te na saṃśayaḥ //

śāstreṣu yat phalaṃ proktaṃ pṛthiv-yas tripradakṣiṇaiḥ
dṛṣṭvā naro labhet kṛṣṇaṃ vrajantaṃ dakṣiṇāmukham //

tīrthayātrāphalaṃ yat tu pṛthivyāṃ samudāhṛtam
dṛṣṭvā naro labhet kṛṣṇaṃ tat phalaṃ dakṣiṇāmukham //

badaryāṃ yat phalaṃ proktaṃ dṛṣṭvā nārāyaṇaṃ naram
dṛṣṭvā naro labhet kṛṣṇaṃ tat phalaṃ dakṣiṇāmukham //

gaṅgādvāre kurukṣetre snānadānena yat phalam
dṛṣṭvā naro labhet kṛṣṇaṃ tat phalaṃ dakṣiṇāmukham //

prayāge ca mahāmāghyāṃ yat phalaṃ samudāhṛtam
dṛṣṭvā naro labhet kṛṣṇaṃ tat phalaṃ dakṣiṇāmukham //

śālagrāme mahācaitryāṃ snānadānena yat phalam
dṛṣṭvā naro labhet kṛṣṇaṃ tat phalaṃ dakṣiṇāmukham //

mahābhidhānakārttikyāṃ puṣkare yat phalaṃ smṛtam
dṛṣṭvā naro labhet kṛṣṇaṃ tat phalaṃ dakṣiṇāmukham //

yat phalaṃ snānadānena gaṅgāsāgarasaṃgame
dṛṣṭvā naro labhet kṛṣṇaṃ tat phalaṃ dakṣiṇāmukham //

graste sūrye kurukṣetre snānadānena yat phalam
dṛṣṭvā naro labhet kṛṣṇaṃ tat phalaṃ dakṣiṇāmukham //

gaṅgāyāṃ sarvatīrtheṣu yāmuneṣu ca bho dvijāḥ
sārasvateṣu tīrtheṣu tathānyeṣu saraḥsu ca //

yat phalaṃ snānadānena vidhivat samudāhṛtam
dṛṣṭvā naro labhet kṛṣṇaṃ tat phalaṃ dakṣiṇāmukham //

puṣkare cātha tīrtheṣu gaye cāmarakaṇṭake
naimiṣādiṣu tīrtheṣu kṣetreṣv āyataneṣu ca //

yat phalaṃ snānadānena rāhugraste divākare
dṛṣṭvā naro labhet kṛṣṇaṃ tat phalaṃ dakṣiṇāmukham //

atha kiṃ punar uktena bhāṣitena punaḥ punaḥ
yat kiṃcit kathitaṃ cātra phalaṃ puṇyasya karmaṇaḥ //

vedaśāstre purāṇe ca bhārate ca dvijottamāḥ
dharmaśāstreṣu sarveṣu tathānyatra manīṣibhiḥ //

dṛṣṭvā naro labhet kṛṣṇaṃ tat phalaṃ sahalāyudham
sakalaṃ bhadrayā sārdhaṃ vrajantaṃ dakṣiṇāmukham //