Brahma Purana · Chapter 64

yadā bhaven mahājyaiṣṭhī rāśinakṣatrayogataḥ
prayatnena tadā martyair gantavyaṃ puruṣottamam //

kṛṣṇaṃ dṛṣṭvā mahājyaiṣṭhyāṃ rāmaṃ bhadrāṃ ca bho dvijāḥ
naro dvādaśayātrāyāḥ phalaṃ prāpnoti cādhikam //

prayāge ca kurukṣetre naimiṣe puṣkare gaye
gaṅgādvāre kuśāvarte gaṅgāsāgarasaṃgame //

kokāmukhe śūkare ca mathurāyāṃ marusthale
śālagrāme vāyutīrthe mandare sindhusāgare //

piṇḍārake citrakūṭe prabhāse kanakhale dvijāḥ
śaṅkhoddhāre dvārakāyāṃ tathā badarikāśrame //

lohakuṇḍe cāśvatīrthe sarvapāpapramocane
kāmālaye koṭitīrthe tathā cāmarakaṇṭake //

lohārgale jambumārge somatīrthe pṛthūdake
utpalāvartake caiva pṛthutuṅge sukubjake //

ekāmrake ca kedāre kāśyāṃ ca viraje dvijāḥ
kālañjare ca gokarṇe śrīśaile gandhamādane //

mahendre malaye vindhye pāriyātre himālaye
sahye ca śuktimante ca gomante cārbude tathā //

gaṅgāyāṃ sarvatīrtheṣu yāmuneṣu ca bho dvijāḥ
sārasvateṣu gomatyāṃ brahmaputreṣu saptasu //

godāvarī bhīmarathī tuṅgabhadrā ca narmadā
tāpī payouṣṇī kāverī śiprā carmaṇvatī dvijāḥ //

vitastā candrabhāgā ca śatadrur bāhudā tathā
ṛṣikulyā kumārī ca vipāśā ca dṛṣadvatī //

śarayūr nākagaṅgā ca gaṇḍakī ca mahānadī
kauśikī karatoyā ca trisrotā madhuvāhinī //

mahānadī vaitaraṇī yāś cānyā nānukīrtitāḥ
athavā kiṃ bahūktena bhāṣitena dvijottamāḥ //

pṛthivyāṃ sarvatīrtheṣu sarveṣv āyataneṣu ca
sāgareṣu ca śaileṣu nadīṣu ca saraḥsu ca //

yat phalaṃ snānadānena rāhugraste divākare
tat phalaṃ kṛṣṇam ālokya mahājyaiṣṭhyāṃ labhen naraḥ //

tasmāt sarvaprayatnena gantavyaṃ puruṣottame
mahājyaiṣṭhyāṃ muniśreṣṭhā sarvakāmaphalepsubhiḥ //

dṛṣṭvā rāmaṃ mahājyeṣṭhaṃ kṛṣṇaṃ subhadrayā saha
viṣṇulokaṃ naro yāti samuddhṛtya samaṃ kulam //

bhuktvā tatra varān bhogān yāvad ābhūtasaṃplavam
puṇyakṣayād ihāgatya caturvedī dvijo bhavet //

svadharmanirataḥ śāntaḥ kṛṣṇabhakto jitendriyaḥ
vaiṣṇavaṃ yogam āsthāya tato mokṣam avāpnuyāt //