બ્રહ્મ પુરાણ · અધ્યાય 64

યદા ભવેન્ મહાજ્યૈષ્ઠી રાશિનક્ષત્રયોગતઃ
પ્રયત્નેન તદા મર્ત્યૈર્ ગન્તવ્યં પુરુષોત્તમમ્ ॥

કૃષ્ણં દૃષ્ટ્વા મહાજ્યૈષ્ઠ્યાં રામં ભદ્રાં ચ ભો દ્વિજાઃ
નરો દ્વાદશયાત્રાયાઃ ફલં પ્રાપ્નોતિ ચાધિકમ્ ॥

પ્રયાગે ચ કુરુક્ષેત્રે નૈમિષે પુષ્કરે ગયે
ગઙ્ગાદ્વારે કુશાવર્તે ગઙ્ગાસાગરસંગમે ॥

કોકામુખે શૂકરે ચ મથુરાયાં મરુસ્થલે
શાલગ્રામે વાયુતીર્થે મન્દરે સિન્ધુસાગરે ॥

પિણ્ડારકે ચિત્રકૂટે પ્રભાસે કનખલે દ્વિજાઃ
શઙ્ખોદ્ધારે દ્વારકાયાં તથા બદરિકાશ્રમે ॥

લોહકુણ્ડે ચાશ્વતીર્થે સર્વપાપપ્રમોચને
કામાલયે કોટિતીર્થે તથા ચામરકણ્ટકે ॥

લોહાર્ગલે જમ્બુમાર્ગે સોમતીર્થે પૃથૂદકે
ઉત્પલાવર્તકે ચૈવ પૃથુતુઙ્ગે સુકુબ્જકે ॥

એકામ્રકે ચ કેદારે કાશ્યાં ચ વિરજે દ્વિજાઃ
કાલઞ્જરે ચ ગોકર્ણે શ્રીશૈલે ગન્ધમાદને ॥

મહેન્દ્રે મલયે વિન્ધ્યે પારિયાત્રે હિમાલયે
સહ્યે ચ શુક્તિમન્તે ચ ગોમન્તે ચાર્બુદે તથા ॥

ગઙ્ગાયાં સર્વતીર્થેષુ યામુનેષુ ચ ભો દ્વિજાઃ
સારસ્વતેષુ ગોમત્યાં બ્રહ્મપુત્રેષુ સપ્તસુ ॥

ગોદાવરી ભીમરથી તુઙ્ગભદ્રા ચ નર્મદા
તાપી પયોઉષ્ણી કાવેરી શિપ્રા ચર્મણ્વતી દ્વિજાઃ ॥

વિતસ્તા ચન્દ્રભાગા ચ શતદ્રુર્ બાહુદા તથા
ઋષિકુલ્યા કુમારી ચ વિપાશા ચ દૃષદ્વતી ॥

શરયૂર્ નાકગઙ્ગા ચ ગણ્ડકી ચ મહાનદી
કૌશિકી કરતોયા ચ ત્રિસ્રોતા મધુવાહિની ॥

મહાનદી વૈતરણી યાશ્ ચાન્યા નાનુકીર્તિતાઃ
અથવા કિં બહૂક્તેન ભાષિતેન દ્વિજોત્તમાઃ ॥

પૃથિવ્યાં સર્વતીર્થેષુ સર્વેષ્વ્ આયતનેષુ ચ
સાગરેષુ ચ શૈલેષુ નદીષુ ચ સરઃસુ ચ ॥

યત્ ફલં સ્નાનદાનેન રાહુગ્રસ્તે દિવાકરે
તત્ ફલં કૃષ્ણમ્ આલોક્ય મહાજ્યૈષ્ઠ્યાં લભેન્ નરઃ ॥

તસ્માત્ સર્વપ્રયત્નેન ગન્તવ્યં પુરુષોત્તમે
મહાજ્યૈષ્ઠ્યાં મુનિશ્રેષ્ઠા સર્વકામફલેપ્સુભિઃ ॥

દૃષ્ટ્વા રામં મહાજ્યેષ્ઠં કૃષ્ણં સુભદ્રયા સહ
વિષ્ણુલોકં નરો યાતિ સમુદ્ધૃત્ય સમં કુલમ્ ॥

ભુક્ત્વા તત્ર વરાન્ ભોગાન્ યાવદ્ આભૂતસંપ્લવમ્
પુણ્યક્ષયાદ્ ઇહાગત્ય ચતુર્વેદી દ્વિજો ભવેત્ ॥

સ્વધર્મનિરતઃ શાન્તઃ કૃષ્ણભક્તો જિતેન્દ્રિયઃ
વૈષ્ણવં યોગમ્ આસ્થાય તતો મોક્ષમ્ અવાપ્નુયાત્ ॥