Brahma Purana · Chapter 63

tato gacched dvijaśreṣṭhās tīrthaṃ yajñāṅgasaṃbhavam
indradyumnasaro nāma yatrāste pāvanaṃ śubham //

gatvā tatra śucir dhīmān ācamya manasā harim
dhyātvopasthāya ca jalam imaṃ mantram udīrayet //

aśvamedhāṅgasaṃbhūta tīrtha sarvāghanāśana
snānaṃ tvayi karomy adya pāpaṃ hara namo 'stu te //

evam uccārya vidhivat snātvā devān ṛṣīn pitṝn
tilodakena cānyāṃś ca saṃtarpyācamya vāgyataḥ //

dattvā pitṝṇāṃ piṇḍāṃś ca saṃpūjya puruṣottamam
daśāśvamedhikaṃ samyak phalaṃ prāpnoti mānavaḥ //

saptāvarān sapta parān vaṃśān uddhṛtya devavat
kāmagena vimānena viṣṇulokaṃ sa gacchati //

bhuktvā tatra sukhān bhogān yāvac candrārkatārakam
cyutas tasmād ihāyāto mokṣaṃ ca labhate dhruvam //

evaṃ kṛtvā pañcatīrthīm ekādaśyām upoṣitaḥ
jyeṣṭhaśuklapañcadaśyāṃ yaḥ paśyet puruṣottamam //

sa pūrvoktaṃ phalaṃ prāpya krīḍitvā vācyutālaye
prayāti paramaṃ sthānaṃ yasmān nāvartate punaḥ //

māsān anyān parityajya māghādīn prapitāmaha
praśaṃsasi kathaṃ jyeṣṭhaṃ brūhi tatkāraṇaṃ prabho //

śṛṇudhvaṃ muniśārdūlāḥ pravakṣyāmi samāsataḥ
jyeṣṭhaṃ māsaṃ yathā tebhyaḥ praśaṃsāmi punaḥ punaḥ //

pṛthivyāṃ yāni tīrthāni saritaś ca sarāṃsi ca
puṣkariṇyas taḍāgāni vāpyaḥ kūpās tathā hradāḥ //

nānānadyaḥ samudrāś ca saptāhaṃ puruṣottame
jyeṣṭhaśukladaśamyādi pratyakṣaṃ yānti sarvadā //

snānadānādikaṃ tasmād devatāprekṣaṇaṃ dvijāḥ
yat kiṃcit kriyate tatra tasmin kāle 'kṣayaṃ bhavet //

śuklapakṣasya daśamī jyeṣṭhe māsi dvijottamāḥ
harate daśa pāpāni tasmād daśaharā smṛtā //

yas tasyāṃ halinaṃ kṛṣṇaṃ paśyed bhadrāṃ susaṃyataḥ
sarvapāpavinirmukto viṣṇulokaṃ vrajen naraḥ //

uttare dakṣiṇe viprās tv ayane puruṣottamam
dṛṣṭvā rāmaṃ subhadrāṃ ca viṣṇulokaṃ vrajen naraḥ //

naro dolāgataṃ dṛṣṭvā govindaṃ puruṣottamam
phālgunyāṃ prayato bhūtvā govindasya puraṃ vrajet //

viṣuvaddivase prāpte pañcatīrthīṃ vidhānataḥ
kṛtvā saṃkarṣaṇaṃ kṛṣṇaṃ dṛṣṭvā bhadrāṃ ca bho dvijāḥ //

naraḥ samastayajñānāṃ phalaṃ prāpnoti durlabham
vimuktaḥ sarvapāpebhyo viṣṇulokaṃ ca gacchati //

yaḥ paśyati tṛtīyāyāṃ kṛṣṇaṃ candanarūṣitam
vaiśākhasyāsite pakṣe sa yāty acyutamandiram //

jyaiṣṭhyāṃ jyeṣṭharkṣayuktāyāṃ yaḥ paśyet puruṣottamam
kulaikaviṃśam uddhṛtya viṣṇulokaṃ sa gacchati //