Brahma Purana · Chapter 62

evaṃ saṃpūjya vidhivad bhaktyā taṃ puruṣottamam
praṇamya śirasā paścāt sāgaraṃ ca prasādayet //

prāṇas tvaṃ sarvabhūtānāṃ yoniś ca saritāṃ pate
tīrtharāja namas te 'stu trāhi mām acyutapriya //

snātvaivaṃ sāgare samyak tasmin kṣetravare dvijāḥ
tīre cābhyarcya vidhivan nārāyaṇam anāmayam //

rāmaṃ kṛṣṇaṃ subhadrāṃ ca praṇipatya ca sāgaram
śatānām aśvamedhānāṃ phalaṃ prāpnoti mānavaḥ //

sarvapāpavinirmuktaḥ sarvaduḥkhavivarjitaḥ
vṛndāraka iva śrīmān rūpayauvanagarvitaḥ //

vimānenārkavarṇena divyagandharvanādinā
kulaikaviṃśam uddhṛtya viṣṇulokaṃ sa gacchati //

bhuktvā tatra varān bhogān krīḍitvā cāpsaraiḥ saha
manvantaraśataṃ sāgraṃ jarāmṛtyuvivarjitaḥ //

puṇyakṣayād ihāyātaḥ kule sarvaguṇānvite
rūpavān subhagaḥ śrīmān satyavādī jitendriyaḥ //

vedaśāstrārthavid vipro bhaved yajvā tu vaiṣṇavaḥ
yogaṃ ca vaiṣṇavaṃ prāpya tato mokṣam avāpnuyāt //

grahoparāge saṃkrāntyām ayane viṣuve tathā
yugādiṣu ṣaḍaśītyāṃ vyatīpāte dinakṣaye //

āṣāḍhyāṃ caiva kārttikyāṃ māghyāṃ vānye śubhe tithau
ye tatra dānaṃ viprebhyaḥ prayacchanti sumedhasaḥ //

phalaṃ sahasraguṇitam anyatīrthāl labhanti te
pitṝṇāṃ ye prayacchanti piṇḍaṃ tatra vidhānataḥ //

akṣayāṃ pitaras teṣāṃ tṛptiṃ saṃprāpnuvanti vai
evaṃ snānaphalaṃ samyak sāgarasya mayoditam //

dānasya ca phalaṃ viprāḥ piṇḍadānasya caiva hi
dharmārthamokṣaphaladam āyuṣkīrtiyaśaskaram //

bhuktimuktiphalaṃ nṝṇāṃ dhanyaṃ duḥsvapnanāśanam
sarvapāpaharaṃ puṇyaṃ sarvakāmaphalapradam //

nāstikāya na vaktavyaṃ purāṇaṃ ca dvijottamāḥ
tāvad garjanti tīrthāni māhātmyaiḥ svaiḥ pṛthak pṛthak //

yāvan na tīrtharājasya māhātmyaṃ varṇyate dvijāḥ
puṣkarādīni tīrthāni prayacchanti svakaṃ phalam //

tīrtharājas tu sa punaḥ sarvatīrthaphalapradaḥ
bhūtale yāni tīrthāni saritaś ca sarāṃsi ca //

viśanti sāgare tāni tenāsau śreṣṭhatāṃ gataḥ
rājā samastatīrthānāṃ sāgaraḥ saritāṃ patiḥ //

tasmāt samastatīrthebhyaḥ śreṣṭho 'sau sarvakāmadaḥ
tamo nāśaṃ yathābhyeti bhāskare 'bhyudite dvijāḥ //

snānena tīrtharājasya tathā pāpasya saṃkṣayaḥ
tīrtharājasamaṃ tīrthaṃ na bhūtaṃ na bhaviṣyati //

adhiṣṭhānaṃ yadā yatra prabhor nārāyaṇasya vai
kaḥ śaknoti guṇān vaktuṃ tīrtharājasya bho dvijāḥ //

koṭyo navanavatyas tu yatra tīrthāni santi vai
tasmāt snānaṃ ca dānaṃ ca homaṃ japyaṃ surārcanam
yat kiṃcit kriyate tatra cākṣayaṃ kriyate dvijāḥ //