બ્રહ્મ પુરાણ · અધ્યાય 63

તતો ગચ્છેદ્ દ્વિજશ્રેષ્ઠાસ્ તીર્થં યજ્ઞાઙ્ગસંભવમ્
ઇન્દ્રદ્યુમ્નસરો નામ યત્રાસ્તે પાવનં શુભમ્ ॥

ગત્વા તત્ર શુચિર્ ધીમાન્ આચમ્ય મનસા હરિમ્
ધ્યાત્વોપસ્થાય ચ જલમ્ ઇમં મન્ત્રમ્ ઉદીરયેત્ ॥

અશ્વમેધાઙ્ગસંભૂત તીર્થ સર્વાઘનાશન
સ્નાનં ત્વયિ કરોમ્ય્ અદ્ય પાપં હર નમો ઽસ્તુ તે ॥

એવમ્ ઉચ્ચાર્ય વિધિવત્ સ્નાત્વા દેવાન્ ઋષીન્ પિતૄન્
તિલોદકેન ચાન્યાંશ્ ચ સંતર્પ્યાચમ્ય વાગ્યતઃ ॥

દત્ત્વા પિતૄણાં પિણ્ડાંશ્ ચ સંપૂજ્ય પુરુષોત્તમમ્
દશાશ્વમેધિકં સમ્યક્ ફલં પ્રાપ્નોતિ માનવઃ ॥

સપ્તાવરાન્ સપ્ત પરાન્ વંશાન્ ઉદ્ધૃત્ય દેવવત્
કામગેન વિમાનેન વિષ્ણુલોકં સ ગચ્છતિ ॥

ભુક્ત્વા તત્ર સુખાન્ ભોગાન્ યાવચ્ ચન્દ્રાર્કતારકમ્
ચ્યુતસ્ તસ્માદ્ ઇહાયાતો મોક્ષં ચ લભતે ધ્રુવમ્ ॥

એવં કૃત્વા પઞ્ચતીર્થીમ્ એકાદશ્યામ્ ઉપોષિતઃ
જ્યેષ્ઠશુક્લપઞ્ચદશ્યાં યઃ પશ્યેત્ પુરુષોત્તમમ્ ॥

સ પૂર્વોક્તં ફલં પ્રાપ્ય ક્રીડિત્વા વાચ્યુતાલયે
પ્રયાતિ પરમં સ્થાનં યસ્માન્ નાવર્તતે પુનઃ ॥

માસાન્ અન્યાન્ પરિત્યજ્ય માઘાદીન્ પ્રપિતામહ
પ્રશંસસિ કથં જ્યેષ્ઠં બ્રૂહિ તત્કારણં પ્રભો ॥

શૃણુધ્વં મુનિશાર્દૂલાઃ પ્રવક્ષ્યામિ સમાસતઃ
જ્યેષ્ઠં માસં યથા તેભ્યઃ પ્રશંસામિ પુનઃ પુનઃ ॥

પૃથિવ્યાં યાનિ તીર્થાનિ સરિતશ્ ચ સરાંસિ ચ
પુષ્કરિણ્યસ્ તડાગાનિ વાપ્યઃ કૂપાસ્ તથા હ્રદાઃ ॥

નાનાનદ્યઃ સમુદ્રાશ્ ચ સપ્તાહં પુરુષોત્તમે
જ્યેષ્ઠશુક્લદશમ્યાદિ પ્રત્યક્ષં યાન્તિ સર્વદા ॥

સ્નાનદાનાદિકં તસ્માદ્ દેવતાપ્રેક્ષણં દ્વિજાઃ
યત્ કિંચિત્ ક્રિયતે તત્ર તસ્મિન્ કાલે ઽક્ષયં ભવેત્ ॥

શુક્લપક્ષસ્ય દશમી જ્યેષ્ઠે માસિ દ્વિજોત્તમાઃ
હરતે દશ પાપાનિ તસ્માદ્ દશહરા સ્મૃતા ॥

યસ્ તસ્યાં હલિનં કૃષ્ણં પશ્યેદ્ ભદ્રાં સુસંયતઃ
સર્વપાપવિનિર્મુક્તો વિષ્ણુલોકં વ્રજેન્ નરઃ ॥

ઉત્તરે દક્ષિણે વિપ્રાસ્ ત્વ્ અયને પુરુષોત્તમમ્
દૃષ્ટ્વા રામં સુભદ્રાં ચ વિષ્ણુલોકં વ્રજેન્ નરઃ ॥

નરો દોલાગતં દૃષ્ટ્વા ગોવિન્દં પુરુષોત્તમમ્
ફાલ્ગુન્યાં પ્રયતો ભૂત્વા ગોવિન્દસ્ય પુરં વ્રજેત્ ॥

વિષુવદ્દિવસે પ્રાપ્તે પઞ્ચતીર્થીં વિધાનતઃ
કૃત્વા સંકર્ષણં કૃષ્ણં દૃષ્ટ્વા ભદ્રાં ચ ભો દ્વિજાઃ ॥

નરઃ સમસ્તયજ્ઞાનાં ફલં પ્રાપ્નોતિ દુર્લભમ્
વિમુક્તઃ સર્વપાપેભ્યો વિષ્ણુલોકં ચ ગચ્છતિ ॥

યઃ પશ્યતિ તૃતીયાયાં કૃષ્ણં ચન્દનરૂષિતમ્
વૈશાખસ્યાસિતે પક્ષે સ યાત્ય્ અચ્યુતમન્દિરમ્ ॥

જ્યૈષ્ઠ્યાં જ્યેષ્ઠર્ક્ષયુક્તાયાં યઃ પશ્યેત્ પુરુષોત્તમમ્
કુલૈકવિંશમ્ ઉદ્ધૃત્ય વિષ્ણુલોકં સ ગચ્છતિ ॥