બ્રહ્મ પુરાણ · અધ્યાય 62

એવં સંપૂજ્ય વિધિવદ્ ભક્ત્યા તં પુરુષોત્તમમ્
પ્રણમ્ય શિરસા પશ્ચાત્ સાગરં ચ પ્રસાદયેત્ ॥

પ્રાણસ્ ત્વં સર્વભૂતાનાં યોનિશ્ ચ સરિતાં પતે
તીર્થરાજ નમસ્ તે ઽસ્તુ ત્રાહિ મામ્ અચ્યુતપ્રિય ॥

સ્નાત્વૈવં સાગરે સમ્યક્ તસ્મિન્ ક્ષેત્રવરે દ્વિજાઃ
તીરે ચાભ્યર્ચ્ય વિધિવન્ નારાયણમ્ અનામયમ્ ॥

રામં કૃષ્ણં સુભદ્રાં ચ પ્રણિપત્ય ચ સાગરમ્
શતાનામ્ અશ્વમેધાનાં ફલં પ્રાપ્નોતિ માનવઃ ॥

સર્વપાપવિનિર્મુક્તઃ સર્વદુઃખવિવર્જિતઃ
વૃન્દારક ઇવ શ્રીમાન્ રૂપયૌવનગર્વિતઃ ॥

વિમાનેનાર્કવર્ણેન દિવ્યગન્ધર્વનાદિના
કુલૈકવિંશમ્ ઉદ્ધૃત્ય વિષ્ણુલોકં સ ગચ્છતિ ॥

ભુક્ત્વા તત્ર વરાન્ ભોગાન્ ક્રીડિત્વા ચાપ્સરૈઃ સહ
મન્વન્તરશતં સાગ્રં જરામૃત્યુવિવર્જિતઃ ॥

પુણ્યક્ષયાદ્ ઇહાયાતઃ કુલે સર્વગુણાન્વિતે
રૂપવાન્ સુભગઃ શ્રીમાન્ સત્યવાદી જિતેન્દ્રિયઃ ॥

વેદશાસ્ત્રાર્થવિદ્ વિપ્રો ભવેદ્ યજ્વા તુ વૈષ્ણવઃ
યોગં ચ વૈષ્ણવં પ્રાપ્ય તતો મોક્ષમ્ અવાપ્નુયાત્ ॥

ગ્રહોપરાગે સંક્રાન્ત્યામ્ અયને વિષુવે તથા
યુગાદિષુ ષડશીત્યાં વ્યતીપાતે દિનક્ષયે ॥

આષાઢ્યાં ચૈવ કાર્ત્તિક્યાં માઘ્યાં વાન્યે શુભે તિથૌ
યે તત્ર દાનં વિપ્રેભ્યઃ પ્રયચ્છન્તિ સુમેધસઃ ॥

ફલં સહસ્રગુણિતમ્ અન્યતીર્થાલ્ લભન્તિ તે
પિતૄણાં યે પ્રયચ્છન્તિ પિણ્ડં તત્ર વિધાનતઃ ॥

અક્ષયાં પિતરસ્ તેષાં તૃપ્તિં સંપ્રાપ્નુવન્તિ વૈ
એવં સ્નાનફલં સમ્યક્ સાગરસ્ય મયોદિતમ્ ॥

દાનસ્ય ચ ફલં વિપ્રાઃ પિણ્ડદાનસ્ય ચૈવ હિ
ધર્માર્થમોક્ષફલદમ્ આયુષ્કીર્તિયશસ્કરમ્ ॥

ભુક્તિમુક્તિફલં નૄણાં ધન્યં દુઃસ્વપ્નનાશનમ્
સર્વપાપહરં પુણ્યં સર્વકામફલપ્રદમ્ ॥

નાસ્તિકાય ન વક્તવ્યં પુરાણં ચ દ્વિજોત્તમાઃ
તાવદ્ ગર્જન્તિ તીર્થાનિ માહાત્મ્યૈઃ સ્વૈઃ પૃથક્ પૃથક્ ॥

યાવન્ ન તીર્થરાજસ્ય માહાત્મ્યં વર્ણ્યતે દ્વિજાઃ
પુષ્કરાદીનિ તીર્થાનિ પ્રયચ્છન્તિ સ્વકં ફલમ્ ॥

તીર્થરાજસ્ તુ સ પુનઃ સર્વતીર્થફલપ્રદઃ
ભૂતલે યાનિ તીર્થાનિ સરિતશ્ ચ સરાંસિ ચ ॥

વિશન્તિ સાગરે તાનિ તેનાસૌ શ્રેષ્ઠતાં ગતઃ
રાજા સમસ્તતીર્થાનાં સાગરઃ સરિતાં પતિઃ ॥

તસ્માત્ સમસ્તતીર્થેભ્યઃ શ્રેષ્ઠો ઽસૌ સર્વકામદઃ
તમો નાશં યથાભ્યેતિ ભાસ્કરે ઽભ્યુદિતે દ્વિજાઃ ॥

સ્નાનેન તીર્થરાજસ્ય તથા પાપસ્ય સંક્ષયઃ
તીર્થરાજસમં તીર્થં ન ભૂતં ન ભવિષ્યતિ ॥

અધિષ્ઠાનં યદા યત્ર પ્રભોર્ નારાયણસ્ય વૈ
કઃ શક્નોતિ ગુણાન્ વક્તું તીર્થરાજસ્ય ભો દ્વિજાઃ ॥

કોટ્યો નવનવત્યસ્ તુ યત્ર તીર્થાનિ સન્તિ વૈ
તસ્માત્ સ્નાનં ચ દાનં ચ હોમં જપ્યં સુરાર્ચનમ્
યત્ કિંચિત્ ક્રિયતે તત્ર ચાક્ષયં ક્રિયતે દ્વિજાઃ ॥