Brahma Purana · Chapter 61

devān pitṝṃs tathā cānyān saṃtarpyācamya vāgyataḥ
hastamātraṃ catuṣkoṇaṃ caturdvāraṃ suśobhanam //

puraṃ vilikhya bho viprās tīre tasya mahodadheḥ
madhye tatra likhet padmam aṣṭapattraṃ sakarṇikam //

evaṃ maṇḍalam ālikhya pūjayet tatra bho dvijāḥ
aṣṭākṣaravidhānena nārāyaṇam ajaṃ vibhum //

ataḥ paraṃ pravakṣyāmi kāyaśodhanam uttamam
akāraṃ hṛdaye dhyātvā cakrarekhāsamanvitam //

jvalantaṃ triśikhaṃ caiva dahantaṃ pāpanāśanam
candramaṇḍalamadhyasthaṃ rākāraṃ mūrdhni cintayet //

śuklavarṇaṃ pravarṣantam amṛtaṃ plāvayan mahīm
evaṃ nirdhūtapāpas tu divyadehas tato bhavet //

aṣṭākṣaraṃ tato mantraṃ nyased evātmano budhaḥ
vāmapādaṃ samārabhya kramaśaś caiva vinyaset //

pañcāṅgaṃ vaiṣṇavaṃ caiva caturvyūhaṃ tathaiva ca
karaśuddhiṃ prakurvīta mūlamantreṇa sādhakaḥ //

ekaikaṃ caiva varṇaṃ tu aṅgulīṣu pṛthak pṛthak
oṃkāraṃ pṛthivīṃ śuklāṃ vāmapāde tu vinyaset //

nakāraḥ śāṃbhavaḥ śyāmo dakṣiṇe tu vyavasthitaḥ
mokāraṃ kālam evāhur vāmakaṭyāṃ nidhāpayet //

nākāraḥ sarvabījaṃ tu dakṣiṇasyāṃ vyavasthitaḥ
rākāras teja ity āhur nābhideśe vyavasthitaḥ //

vāyavyo 'yaṃ yakāras tu vāmaskandhe samāśritaḥ
ṇākāraḥ sarvago jñeyo dakṣiṇāṃse vyavasthitaḥ
yakāro 'yaṃ śirasthaś ca yatra lokāḥ pratiṣṭhitāḥ //

mamāgre 'vasthito viṣṇuḥ pṛṣṭhataś cāpi keśavaḥ
govindo dakṣiṇe pārśve vāme tu madhusūdanaḥ //

upariṣṭāt tu vaikuṇṭho vārāhaḥ pṛthivītale
avāntaradiśo yās tu tāsu sarvāsu mādhavaḥ //

gacchatas tiṣṭhato vāpi jāgrataḥ svapato 'pi vā
narasiṃhakṛtā guptir vāsudevamayo hy aham //

evaṃ viṣṇumayo bhūtvā tataḥ karma samārabhet
yathā dehe tathā deve sarvatattvāni yojayet //

tataś caiva prakurvīta prokṣaṇaṃ praṇavena tu
phaṭkārāntaṃ samuddiṣṭaṃ sarvavighnaharaṃ śubham //

tatrārkacandravahnīnāṃ maṇḍalāni vicintayet
padmamadhye nyased viṣṇuṃ pavanasyāmbarasya ca //

tato vicintya hṛdaya oṃkāraṃ jyotīrūpiṇam
karṇikāyāṃ samāsīnaṃ jyotīrūpaṃ sanātanam //

aṣṭākṣaraṃ tato mantraṃ vinyasec ca yathākramam
tena vyastasamastena pūjanaṃ paramaṃ smṛtam //

dvādaśākṣaramantreṇa yajed devaṃ sanātanam
tato 'vadhārya hṛdaye karṇikāyāṃ bahir nyaset //

caturbhujaṃ mahāsattvaṃ sūryakoṭisamaprabham
cintayitvā mahāyogaṃ jyotīrūpaṃ sanātanam
tataś cāvāhayen mantraṃ krameṇācintya mānase //

karṇikāyāṃ supīṭhe 'tra padmakalpitam āsanam
sarvasattvahitārthāya tiṣṭha tvaṃ madhusūdana //

oṃ pādyaṃ pādayor deva padmanābha sanātana
viṣṇo kamalapattrākṣa gṛhāṇa madhusūdana //

madhuparkaṃ mahādeva brahmādyaiḥ kalpitaṃ tava
mayā niveditaṃ bhaktyā gṛhāṇa puruṣottama //

mandākinyāḥ sitaṃ vāri sarvapāpaharaṃ śivam
gṛhāṇācamanīyaṃ tvaṃ mayā bhaktyā niveditam //

tvam āpaḥ pṛthivī caiva jyotis tvaṃ vāyur eva ca
lokeśa vṛttimātreṇa vāriṇā snāpayāmy aham //

devatattvasamāyukta yajñavarṇasamanvita
svarṇavarṇaprabhe deva vāsasī tava keśava //

śarīraṃ te na jānāmi ceṣṭāṃ caiva ca keśava
mayā nivedito gandhaḥ pratigṛhya vilipyatām //

ṛgyajuḥsāmamantreṇa trivṛtaṃ padmayoninā
sāvitrīgranthisaṃyuktam upavītaṃ tavārpaye //

divyaratnasamāyukta vahnibhānusamaprabha
gātrāṇi tava śobhantu sālaṃkārāṇi mādhava //

oṃ nama iti pratyakṣaraṃ samastena mūlamantreṇa vā pūjayet ||

vanaspatiraso divyo gandhāḍhyaḥ surabhiś ca te
mayā nivedito bhaktyā dhūpo 'yaṃ pratigṛhyatām //

sūryacandrasamo jyotir vidyudagnyos tathaiva ca
tvam eva jyotiṣāṃ deva dīpo 'yaṃ pratigṛhyatām //

annaṃ caturvidhaṃ caiva rasaiḥ ṣaḍbhiḥ samanvitam
mayā niveditaṃ bhaktyā naivedyaṃ tava keśava //

pūrve dale vāsudevaṃ yāmye saṃkarṣaṇaṃ nyaset
pradyumnaṃ paścime kuryād aniruddhaṃ tathottare //

vārāhaṃ ca tathāgneye narasiṃhaṃ ca nairṛte
vāyavye mādhavaṃ caiva tathaiśāne trivikramam //

tathāṣṭākṣaradevasya garuḍaṃ purato nyaset
vāmapārśve tathā cakraṃ śaṅkhaṃ dakṣiṇato nyaset //

tathā mahāgadāṃ caiva nyased devasya dakṣiṇe
tataḥ śārṅgaṃ dhanur vidvān nyased devasya vāmataḥ //

dakṣiṇeneṣudhī divye khaḍgaṃ vāme ca vinyaset
śriyaṃ dakṣiṇataḥ sthāpya puṣṭim uttarato nyaset //

vanamālāṃ ca puratas tataḥ śrīvatsakaustubhau
vinyased dhṛdayādīni pūrvādiṣu caturdiśam //

tato 'straṃ devadevasya koṇe caiva tu vinyaset
indram agniṃ yamaṃ caiva nairṛtaṃ varuṇaṃ tathā //

vāyuṃ dhanadam īśānam anantaṃ brahmaṇā saha
pūjayet tāntrikair mantrair adhaś cordhvaṃ tathaiva ca //

evaṃ saṃpūjya deveśaṃ maṇḍalasthaṃ janārdanam
labhed abhimatān kāmān naro nāsty atra saṃśayaḥ //

anenaiva vidhānena maṇḍalasthaṃ janārdanam
pūjitaṃ yaḥ saṃpaśyeta sa viśed viṣṇum avyayam //

sakṛd apy arcito yena vidhinānena keśavaḥ
janmamṛtyujarāṃ tīrtvā sa viṣṇoḥ padam āpnuyāt //

yaḥ smaret satataṃ bhaktyā nārāyaṇam atandritaḥ
anvahaṃ tasya vāsāya śvetadvīpaḥ prakalpitaḥ //

oṃkārādisamāyuktaṃ namaḥkārāntadīpitam
tannāma sarvatattvānāṃ mantra ity abhidhīyate //

anenaiva vidhānena gandhapuṣpaṃ nivedayet
ekaikasya prakurvīta yathoddiṣṭaṃ krameṇa tu //

mudrās tato nibadhnīyād yathoktakramacoditāḥ
japaṃ caiva prakurvīta mūlamantreṇa mantravit //

aṣṭāviṃśatim aṣṭau vā śatam aṣṭottaraṃ tathā
kāmeṣu ca yathāproktaṃ yathāśakti samāhitaḥ //

padmaṃ śaṅkhaś ca śrīvatso gadā garuḍa eva ca
cakraṃ khaḍgaś ca śārṅgaṃ ca aṣṭau mudrāḥ prakīrtitāḥ //

gaccha gaccha paraṃ sthānaṃ purāṇapuruṣottama
yatra brahmādayo devā vindanti paramaṃ padam //

arcanaṃ ye na jānanti harer mantrair yathoditam
te tatra mūlamantreṇa pūjayantv acyutaṃ sadā //