Brahma Purana · Chapter 59

anantākhyaṃ vāsudevaṃ dṛṣṭvā bhaktyā praṇamya ca
sarvapāpavinirmukto naro yāti paraṃ padam //

mayā cārādhitaś cāsau śakreṇa tadanantaram
vibhīṣaṇena rāmeṇa kas taṃ nārādhayet pumān //

śvetagaṅgāṃ naraḥ snātvā yaḥ paśyec chvetamādhavam
matsyākhyaṃ mādhavaṃ caiva śvetadvīpaṃ sa gacchati //

śvetamādhavamāhātmyaṃ vaktum arhasy aśeṣataḥ
vistareṇa jagannātha pratimāṃ tasya vai hareḥ //

tasmin kṣetravare puṇye vikhyāte jagatītale
śvetākhyaṃ mādhavaṃ devaṃ kas taṃ sthāpitavān purā //

abhūt kṛtayuge viprāḥ śveto nāma nṛpo balī
matimān dharmavic chūraḥ satyasaṃdho dṛḍhavrataḥ //

yasya rājye tu varṣāṇāṃ sahasraṃ daśa mānavāḥ
bhavanty āyuṣmanto lokā bālas tasmin na sīdati //

vartamāne tadā rājye kiṃcit kāle gate dvijāḥ
kapālagautamo nāma ṛṣiḥ paramadhārmikaḥ //

suto 'syājātadantaś ca mṛtaḥ kālavaśād dvijāḥ
tam ādāya ṛṣir dhīmān nṛpasyāntikam ānayat //

dṛṣṭvaivaṃ nṛpatiḥ suptaṃ kumāraṃ gatacetasam
pratijñām akarod viprā jīvanārthaṃ śiśos tadā //

yāvad bālam ahaṃ tv enaṃ yamasya sadane gatam
nānaye saptarātreṇa citāṃ dīptāṃ samāruhe //

evam uktvāsitaiḥ padmaiḥ śatair daśaśatādikaiḥ
saṃpūjya ca mahādevaṃ rājā vidyāṃ punar japet //

atibhaktiṃ tu saṃcintya nṛpasya jagadīśvaraḥ
sāṃnidhyam agamat tuṣṭo śmīty uvāca sahomayā //

śrutvaivaṃ giram īśasya vilokya sahasā haram
bhasmadigdhaṃ virūpākṣaṃ śaratkundenduvarcasam //

śārdūlacarmavasanaṃ śaśāṅkāṅkitamūrdhajam
mahīṃ nipatya sahasā praṇamya sa tadābravīt //

kāruṇyaṃ yadi me dṛṣṭvā prasanno 'si prabho yadi
kālasya vaśam āpanno bālako dvijaputrakaḥ //

jīvatv eṣa punar bāla ity evaṃ vratam āhitam
akasmāc ca mṛtaṃ bālaṃ niyamya bhagavan svayam
yathoktāyuṣyasaṃyuktaṃ kṣemaṃ kuru maheśvara //

śvetasyaitad vacaḥ śrutvā mudaṃ prāpa haras tadā
kālam ājñāpayām āsa sarvabhūtabhayaṃkaram //

niyamya kālaṃ durdharṣaṃ yamasyājñākaraṃ dvijāḥ
bālaṃ saṃjīvayām āsa mṛtyor mukhagataṃ punaḥ //

kṛtvā kṣemaṃ jagat sarvaṃ muneḥ putraṃ sa taṃ dvijāḥ
devyā sahomayā devas tatraivāntaradhīyata //

evaṃ saṃjīvayām āsa muneḥ putraṃ nṛpottamaḥ //

devadeva jagannātha trailokyaprabhavāvyaya
brūhi naḥ paramaṃ tathyaṃ śvetākhyasya ca sāṃpratam //

śṛṇudhvaṃ muniśārdūlāḥ sarvasattvahitāvaham
pravakṣyāmi yathātathyaṃ yat pṛcchatha mamānaghāḥ //

mādhavasya ca māhātmyaṃ sarvapāpapraṇāśanam
yac chrutvābhimatān kāmān dhruvaṃ prāpnoti mānavaḥ //

śrutavān ṛṣibhiḥ pūrvaṃ mādhavākhyasya bho dvijāḥ
śṛṇudhvaṃ tāṃ kathāṃ divyāṃ bhayaśokārtināśinīm //

sa kṛtvā rājyam ekāgryaṃ varṣāṇāṃ ca sahasraśaḥ
vicārya laukikān dharmān vaidikān niyamāṃs tathā //

keśavārādhane viprā niścitaṃ vratam āsthitaḥ
sa gatvā paramaṃ kṣetraṃ sāgaraṃ dakṣiṇāśrayam //

taṭe tasmiñ śubhe ramye deśe kṛṣṇasya cāntike
śveto 'tha kārayām āsa prāsādaṃ śubhalakṣaṇam //

dhanvantaraśataṃ caikaṃ devadevasya dakṣiṇe
tataḥ śvetena viprendrāḥ śvetaśailamayena ca //

kṛtaḥ sa bhagavāñ śveto mādhavaś candrasaṃnibhaḥ
pratiṣṭhāṃ vidhivac cakre yathoddiṣṭāṃ svayaṃ tu saḥ //

dattvā dānaṃ dvijātibhyo dīnānāthatapasvinām
athānantarato rājā mādhavasya ca saṃnidhau //

mahīṃ nipatya sahasā oṃkāraṃ dvādaśākṣaram
japan sa maunam āsthāya māsam ekaṃ samādhinā //

nirāhāro mahābhāgaḥ samyag viṣṇupade sthitaḥ
japānte sa tu deveśaṃ saṃstotum upacakrame //

oṃ namo vāsudevāya namaḥ saṃkarṣaṇāya ca
pradyumnāyāniruddhāya namo nārāyaṇāya ca //

namo 'stu bahurūpāya viśvarūpāya vedhase
nirguṇāyāpratarkyāya śucaye śuklakarmaṇe //

oṃ namaḥ padmanābhāya padmagarbhodbhavāya ca
namo 'stu padmavarṇāya padmahastāya te namaḥ //

oṃ namaḥ puṣkarākṣāya sahasrākṣāya mīḍhuṣe
namaḥ sahasrapādāya sahasrabhujamanyave //

oṃ namo 'stu varāhāya varadāya sumedhase
variṣṭhāya vareṇyāya śaraṇyāyācyutāya ca //

oṃ namo bālarūpāya bālapadmaprabhāya ca
bālārkasomanetrāya muñjakeśāya dhīmate //

keśavāya namo nityaṃ namo nārāyaṇāya ca
mādhavāya variṣṭhāya govindāya namo namaḥ //

oṃ namo viṣṇave nityaṃ devāya vasuretase
madhusūdanāya namaḥ śuddhāyāṃśudharāya ca //

namo anantāya sūkṣmāya namaḥ śrīvatsadhāriṇe
trivikramāya ca namo divyapītāmbarāya ca //

sṛṣṭikartre namas tubhyaṃ goptre dhātre namo namaḥ
namo 'stu guṇabhūtāya nirguṇāya namo namaḥ //

namo vāmanarūpāya namo vāmanakarmaṇe
namo vāmananetrāya namo vāmanavāhine //

namo ramyāya pūjyāya namo 'stv avyaktarūpiṇe
apratarkyāya śuddhāya namo bhayaharāya ca //

saṃsārārṇavapotāya praśāntāya svarūpiṇe
śivāya saumyarūpāya rudrāyottāraṇāya ca //

bhavabhaṅgakṛte caiva bhavabhogapradāya ca
bhavasaṃghātarūpāya bhavasṛṣṭikṛte namaḥ //

oṃ namo divyarūpāya somāgniśvasitāya ca
somasūryāṃśukeśāya gobrāhmaṇahitāya ca //

oṃ nama ṛksvarūpāya padakramasvarūpiṇe
ṛkstutāya namas tubhyaṃ nama ṛksādhanāya ca //

oṃ namo yajuṣāṃ dhātre yajūrūpadharāya ca
yajuryājyāya juṣṭāya yajuṣāṃ pataye namaḥ //

oṃ namaḥ śrīpate deva śrīdharāya varāya ca
śriyaḥ kāntāya dāntāya yogicintyāya yogine //

oṃ namaḥ sāmarūpāya sāmadhvanivarāya ca
oṃ namaḥ sāmasaumyāya sāmayogavide namaḥ //

sāmne ca sāmagītāya oṃ namaḥ sāmadhāriṇe
sāmayajñavide caiva namaḥ sāmakarāya ca //

namas tv atharvaśirase namo 'tharvasvarūpiṇe
namo 'stv atharvapādāya namo 'tharvakarāya ca //

oṃ namo vajraśīrṣāya madhukaiṭabhaghātine
mahodadhijalasthāya vedāharaṇakāriṇe //

namo dīptasvarūpāya hṛṣīkeśāya vai namaḥ
namo bhagavate tubhyaṃ vāsudevāya te namaḥ //

nārāyaṇa namas tubhyaṃ namo lokahitāya ca
oṃ namo mohanāśāya bhavabhaṅgakarāya ca //

gatipradāya ca namo namo bandhaharāya ca
trailokyatejasāṃ kartre namas tejaḥsvarūpiṇe //

yogīśvarāya śuddhāya rāmāyottaraṇāya ca
sukhāya sukhanetrāya namaḥ sukṛtadhāriṇe //

vāsudevāya vandyāya vāmadevāya vai namaḥ
dehināṃ dehakartre ca bhedabhaṅgakarāya ca //

devair vanditadehāya namas te divyamauline
namo vāsanivāsāya vāsavyavaharāya ca //

oṃ namo vasukartre ca vasuvāsapradāya ca
namo yajñasvarūpāya yajñeśāya ca yogine //

yatiyogakareśāya namo yajñāṅgadhāriṇe
saṃkarṣaṇāya ca namaḥ pralambamathanāya ca //

meghaghoṣasvanottīrṇa vegalāṅgaladhāriṇe
namo 'stu jñānināṃ jñāna nārāyaṇaparāyaṇa //

na me 'sti tvām ṛte bandhur narakottāraṇe prabho
atas tvāṃ sarvabhāvena praṇato natavatsala //

malaṃ yat kāyajaṃ vāpi mānasaṃ caiva keśava
na tasyānyo 'sti deveśa kṣālakas tvām ṛte 'cyuta //

saṃsargāṇi samastāni vihāya tvām upasthitaḥ
saṅgo me 'stu tvayā sārdham ātmalābhāya keśava //

kaṣṭam āpat suduṣpāraṃ saṃsāraṃ vedmi keśava
tāpatrayaparikliṣṭas tena tvāṃ śaraṇaṃ gataḥ //

eṣaṇābhir jagat sarvaṃ mohitaṃ māyayā tava
ākarṣitaṃ ca lobhādyair atas tvām aham āśritaḥ //

nāsti kiṃcit sukhaṃ viṣṇo saṃsārasthasya dehinaḥ
yathā yathā hi yajñeśa tvayi cetaḥ pravartate //

tathā phalavihīnaṃ tu sukham ātyantikaṃ labhet
naṣṭo vivekaśūnyo 'smi dṛśyate jagad āturam //

govinda trāhi saṃsārān mām uddhartuṃ tvam arhasi
magnasya mohasalile niruttāre bhavārṇave
uddhartā puṇḍarīkākṣa tvām ṛte 'nyo na vidyate //

itthaṃ stutas tatas tena rājñā śvetena bho dvijāḥ
tasmin kṣetravare divye vikhyāte puruṣottame //

bhaktiṃ tasya tu saṃcintya devadevo jagadguruḥ
ājagāma nṛpasyāgre sarvair devair vṛto hariḥ //

nīlajīmūtasaṃkāśaḥ padmapattrāyatekṣaṇaḥ
dadhat sudarśanaṃ dhīmān karāgre dīptamaṇḍalam //

kṣīrodajalasaṃkāśo vimalaś candrasaṃnibhaḥ
rarāja vāmahaste 'sya pāñcajanyo mahādyutiḥ //

pakṣirājadhvajaḥ śrīmān gadāśārṅgāsidhṛk prabhuḥ
uvāca sādhu bho rājan yasya te matir uttamā
yad iṣṭaṃ vara bhadraṃ te prasanno 'smi tavānagha //

śrutvaivaṃ devadevasya vākyaṃ tat paramāmṛtam
praṇamya śirasovāca śvetas tadgatamānasaḥ //

yady ahaṃ bhagavan bhaktaḥ prayaccha varam uttamam
ābrahmabhavanād ūrdhvaṃ vaiṣṇavaṃ padam avyayam //

vimalaṃ virajaṃ śuddhaṃ saṃsārāsaṅgavarjitam
tat padaṃ gantum icchāmi tvatprasādāj jagatpate //

yat padaṃ vibudhāḥ sarve munayaḥ siddhayoginaḥ
nābhigacchanti yad ramyaṃ paraṃ padam anāmayam //

yāsyasi paramaṃ sthānaṃ rājyāmṛtam upāsya ca
sarvāṃl lokān atikramya mama lokaṃ gamiṣyasi //

kīrtis tavātra rājendra trīṃl lokāṃś ca gamiṣyati
sāṃnidhyaṃ mama caivātra sarvadaiva bhaviṣyati //

śvetagaṅgeti gāsyanti sarve te devadānavāḥ
kuśāgreṇāpi rājendra śvetagāṅgeyam ambu ca //

spṛṣṭvā svargaṃ gamiṣyanti madbhaktā ye samāhitāḥ
yas tv imāṃ pratimāṃ gacchen mādhavākhyāṃ śaśiprabhām //

śaṅkhagokṣīrasaṃkāśām aśeṣāghavināśinīm
tāṃ praṇamya sakṛd bhaktyā puṇḍarīkanibhekṣaṇām //

vihāya sarvalokān vai mama loke mahīyate
manvantarāṇi tatraiva devakanyābhir āvṛtaḥ //

gīyamānaś ca madhuraṃ siddhagandharvasevitaḥ
bhunakti vipulān bhogān yatheṣṭaṃ māmakaiḥ saha //

cyutas tasmād ihāgatya manuṣyo brāhmaṇo bhavet
vedavedāṅgavic chrīmān bhogavāṃś cirajīvitaḥ //

gajāśvarathayānāḍhyo dhanadhānyāvṛtaḥ śuciḥ
rūpavān bahubhāgyaś ca putrapautrasamanvitaḥ //

puruṣottamaṃ punaḥ prāpya vaṭamūle 'tha sāgare
tyaktvā dehaṃ hariṃ smṛtvā tataḥ śāntapadaṃ vrajet //