Brahma Purana · Chapter 58

evaṃ dṛṣṭvā balaṃ kṛṣṇaṃ subhadrāṃ praṇipatya ca
dharmaṃ cārthaṃ ca kāmaṃ ca mokṣaṃ ca labhate dhruvam //

niṣkramya devatāgārāt kṛtakṛtyo bhaven naraḥ
praṇamyāyatanaṃ paścād vrajet tatra samāhitaḥ //

indranīlamayo viṣṇur yatrāste vālukāvṛtaḥ
antardhānagataṃ natvā tato viṣṇupuraṃ vrajet //

sarvadevamayo yo 'sau hatavān asurottamam
sa āste tatra bho viprāḥ siṃhārdhakṛtavigrahaḥ //

bhaktyā dṛṣṭvā tu taṃ devaṃ praṇamya narakesarīm
mucyate pātakair martyaḥ samastair nātra saṃśayaḥ //

narasiṃhasya ye bhaktā bhavanti bhuvi mānavāḥ
na teṣāṃ duṣkṛtaṃ kiṃcit phalaṃ syād yad yad īpsitam //

tasmāt sarvaprayatnena narasiṃhaṃ samāśrayet
dharmārthakāmamokṣāṇāṃ phalaṃ yasmāt prayacchati //

māhātmyaṃ narasiṃhasya sukhadaṃ bhuvi durlabham
yathā kathayase deva tena no vismayo mahān //

prabhāvaṃ tasya devasya vistareṇa jagatpate
śrotum icchāmahe brūhi paraṃ kautūhalaṃ hi naḥ //

yathā prasīded devo 'sau narasiṃho mahābalaḥ
bhaktānām upakārāya brūhi deva namo 'stu te //

prasādān narasiṃhasya yā bhavanty atra siddhayaḥ
brūhi tāḥ kuru cāsmākaṃ prasādaṃ prapitāmaha //

śṛṇudhvaṃ tasya bho viprāḥ prabhāvaṃ gadato mama
ajitasyāprameyasya bhuktimuktipradasya ca //

kaḥ śaknoti guṇān vaktuṃ samastāṃs tasya bho dvijāḥ
siṃhārdhakṛtadehasya pravakṣyāmi samāsataḥ //

yāḥ kāścit siddhayaś cātra śrūyante daivamānuṣāḥ
prasādāt tasya tāḥ sarvāḥ sidhyanti nātra saṃśayaḥ //

svarge martye ca pātāle dikṣu toye pure nage
prasādāt tasya devasya bhavaty avyāhatā gatiḥ //

asādhyaṃ tasya devasya nāsty atra sacarācare
narasiṃhasya bho viprāḥ sadā bhaktānukampinaḥ //

vidhānaṃ tasya vakṣyāmi bhaktānām upakārakam
yena prasīdec caivāsau siṃhārdhakṛtavigrahaḥ //

śṛṇudhvaṃ muniśārdūlāḥ kalparājaṃ sanātanam
narasiṃhasya tattvaṃ ca yan na jñātaṃ surāsuraiḥ //

śākayāvakamūlais tu phalapiṇyākasaktukaiḥ
payobhakṣeṇa viprendrā vartayet sādhakottamaḥ //

kośakaupīnavāsāś ca dhyānayukto jitendriyaḥ
araṇye vijane deśe parvate sindhusaṃgame //

ūṣare siddhakṣetre ca narasiṃhāśrame tathā
pratiṣṭhāpya svayaṃ vāpi pūjāṃ kṛtvā vidhānataḥ //

dvādaśyāṃ śuklapakṣasya upoṣya munipuṃgavāḥ
japel lakṣāṇi vai viṃśan manasā saṃyatendriyaḥ //

upapātakayuktaś ca mahāpātakasaṃyutaḥ
mukto bhavet tato viprāḥ sādhako nātra saṃśayaḥ //

kṛtvā pradakṣiṇaṃ tatra narasiṃhaṃ prapūjayet
puṇyagandhādibhir dhūpaiḥ praṇamya śirasā prabhum //

karpūracandanāktāni jātīpuṣpāṇi mastake
pradadyān narasiṃhasya tataḥ siddhiḥ prajāyate //

bhagavān sarvakāryeṣu na kvacit pratihanyate
tejaḥ soḍhuṃ na śaktāḥ syur brahmarudrādayaḥ surāḥ //

kiṃ punar dānavā loke siddhagandharvamānuṣāḥ
vidyādharā yakṣagaṇāḥ sakiṃnaramahoragāḥ //

mantraṃ yān āsurān hantuṃ japanty eke 'nyasādhakāḥ
te sarve pralayaṃ yānti dṛṣṭvādityāgnivarcasaḥ //

sakṛjjaptaṃ tu kavacaṃ rakṣet sarvam upadravam
dvirjaptaṃ kavacaṃ divyaṃ rakṣate devadānavāt //

gandharvāḥ kiṃnarā yakṣā vidyādharamahoragāḥ
bhūtāḥ piśācā rakṣāṃsi ye cānye paripanthinaḥ //

trirjaptaṃ kavacaṃ divyam abhedyaṃ ca surāsuraiḥ
dvādaśābhyantare caiva yojanānāṃ dvijottamāḥ //

rakṣate bhagavān devo narasiṃho mahābalaḥ
tato gatvā biladvāram upoṣya rajanītrayam //

palāśakāṣṭhaiḥ prajvālya bhagavantaṃ hutāśanam
palāśasamidhas tatra juhuyāt trimadhuplutāḥ //

dve śate dvijaśārdūlā vaṣaṭkāreṇa sādhakaḥ
tato vivaradvāraṃ tu prakaṭaṃ jāyate kṣaṇāt //

tato viśet tu niḥśaṅkaṃ kavacī vivaraṃ budhaḥ
gacchataḥ saṃkaṭaṃ tasya tamomohaś ca naśyati //

rājamārgaḥ suvistīrṇo dṛśyate bhramarājitaḥ
narasiṃhaṃ smaraṃs tatra pātālaṃ viśate dvijāḥ //

gatvā tatra japet tattvaṃ narasiṃhākhyam avyayam
tataḥ strīṇāṃ sahasrāṇi vīṇāvādanakarmaṇām //

nirgacchanti puro viprāḥ svāgataṃ tā vadanti ca
praveśayanti tā haste gṛhītvā sādhakeśvaram //

tato rasāyanaṃ divyaṃ pāyayanti dvijottamāḥ
pītamātre divyadeho jāyate sumahābalaḥ //

krīḍate saha kanyābhir yāvad ābhūtasaṃplavam
bhinnadeho vāsudeve līyate nātra saṃśayaḥ //

yadā na rocate vāsas tasmān nirgacchate punaḥ
paṭṭaṃ śūlaṃ ca khaḍgaṃ ca rocanāṃ ca maṇiṃ tathā //

rasaṃ rasāyanaṃ caiva pādukāñjanam eva ca
kṛṣṇājinaṃ muniśreṣṭhā guṭikāṃ ca manoharām //

kamaṇḍaluṃ cākṣasūtraṃ yaṣṭiṃ saṃjīvanīṃ tathā
siddhavidyāṃ ca śāstrāṇi gṛhītvā sādhakeśvaraḥ //

jvaladvahnisphuliṅgormi veṣṭitaṃ triśikhaṃ hṛdi
sakṛn nyastaṃ dahet sarvaṃ vṛjinaṃ janmakoṭijam //

viṣe nyastaṃ viṣaṃ hanyāt kuṣṭhaṃ hanyāt tanau sthitam
svadehe bhrūṇahatyādi kṛtvā divyena śudhyati //

mahāgrahagṛhīteṣu jvalamānaṃ vicintayet
hṛdante vai tataḥ śīghraṃ naśyeyur dāruṇā grahāḥ //

bālānāṃ kaṇṭhake baddhaṃ rakṣā bhavati nityaśaḥ
gaṇḍapiṇḍakalūtānāṃ nāśanaṃ kurute dhruvam //

vyādhijāte samidbhiś ca ghṛtakṣīreṇa homayet
trisaṃdhyaṃ māsam ekaṃ tu sarvarogān vināśayet //

asādhyaṃ tu na paśyāmi trailokye sacarācare
yāṃ yāṃ kāmayate siddhiṃ tāṃ tāṃ prāpnoti sa dhruvam //

aṣṭottaraśataṃ tv eke pūjayitvā mṛgādhipam
mṛttikāḥ sapta valmīke śmaśāne ca catuṣpathe //

raktacandanasaṃmiśrā gavāṃ kṣīreṇa loḍayet
siṃhasya pratimāṃ kṛtvā pramāṇena ṣaḍaṅgulām //

limpet tathā bhūrjapattre rocanayā samālikhet
narasiṃhasya kaṇṭhe tu baddhvā caiva hi mantravit //

japet saṃkhyāvihīnaṃ tu pūjayitvā jalāśaye
yāvat saptāhamātraṃ tu japet saṃyamitendriyaḥ //

jalākīrṇā muhūrtena jāyate sarvamedinī
athavā śuṣkavṛkṣāgre narasiṃhaṃ tu pūjayet //

japtvā cāṣṭaśataṃ tattvaṃ varṣantaṃ vinivārayet
tam evaṃ piñjake baddhvā bhrāmayet sādhakottamaḥ //

mahāvāto muhūrtena āgacchen nātra saṃśayaḥ
punaś ca dhārayet kṣipraṃ saptasaptena vāriṇā //

atha tāṃ pratimāṃ dvāri nikhaned yasya sādhakaḥ
gotrotsādo bhavet tasya uddhṛte caiva śāntidaḥ //

tasmāt taṃ muniśārdūlā bhaktyā saṃpūjayet sadā
mṛgarājaṃ mahāvīryaṃ sarvakāmaphalapradam //

vimuktaḥ sarvapāpebhyo viṣṇulokaṃ sa gacchati
brāhmaṇāḥ kṣatriyā vaiśyāḥ striyaḥ śūdrāntyajātayaḥ //

saṃpūjya taṃ suraśreṣṭhaṃ bhaktyā siṃhavapurdharam
mucyante cāśubhair duḥkhair janmakoṭisamudbhavaiḥ //

saṃpūjya taṃ suraśreṣṭhaṃ prāpnuvanty abhivāñchitam
devatvam amareśatvaṃ gandharvatvaṃ ca bho dvijāḥ //

yakṣavidyādharatvaṃ ca tathānyac cābhivāñchitam
dṛṣṭvā stutvā namaskṛtvā saṃpūjya narakesarīm //

prāpnuvanti narā rājyaṃ svargaṃ mokṣaṃ ca durlabham
narasiṃhaṃ naro dṛṣṭvā labhed abhimataṃ phalam //

nirmuktaḥ sarvapāpebhyo viṣṇulokaṃ sa gacchati
sakṛd dṛṣṭvā tu taṃ devaṃ bhaktyā siṃhavapurdharam //

mucyate cāśubhair duḥkhair janmakoṭisamudbhavaiḥ
saṃgrāme saṃkaṭe durge coravyāghrādipīḍite //

kāntāre prāṇasaṃdehe viṣavahnijaleṣu ca
rājādibhyaḥ samudrebhyo graharogādipīḍite //

smṛtvā taṃ puruṣaḥ sarvai rājagrāmair vimucyate
sūryodaye yathā nāśaṃ tamo 'bhyeti mahattaram //

tathā saṃdarśane tasya vināśaṃ yānty upadravāḥ
guṭikāñjanapātāla pāduke ca rasāyanam //

narasiṃhe prasanne tu prāpnoty anyāṃś ca vāñchitān
yān yān kāmān abhidhyāyan bhajate narakesarīm //

tāṃs tān kāmān avāpnoti naro nāsty atra saṃśayaḥ
dṛṣṭvā taṃ devadeveśaṃ bhaktyāpūjya praṇamya ca //

daśānām aśvamedhānāṃ phalaṃ daśaguṇaṃ labhet
pāpaiḥ sarvair vinirmukto guṇaiḥ sarvair alaṃkṛtaḥ //

sarvakāmasamṛddhātmā jarāmaraṇavarjitaḥ
sauvarṇena vimānena kiṅkiṇījālamālinā //

sarvakāmasamṛddhena kāmagena suvarcasā
taruṇādityavarṇena muktāhārāvalambinā //

divyastrīśatayuktena divyagandharvanādinā
kulaikaviṃśam uddhṛtya devavan muditaḥ sukhī //

stūyamāno 'psarobhiś ca viṣṇulokaṃ vrajen naraḥ
bhuktvā tatra varān bhogān viṣṇuloke dvijottamāḥ //

gandharvair apsarair yuktaḥ kṛtvā rūpaṃ caturbhujam
manohlādakaraṃ saukhyaṃ yāvad ābhūtasaṃplavam //

puṇyakṣayād ihāyātaḥ pravare yogināṃ kule
caturvedī bhaved vipro vedavedāṅgapāragaḥ
vaiṣṇavaṃ yogam āsthāya tato mokṣam avāpnuyāt //