Brahma Purana · Chapter 57

ataḥ paraṃ pravakṣyāmi pañcatīrthavidhiṃ dvijāḥ
yat phalaṃ snānadānena devatāprekṣaṇena ca //

mārkaṇḍeyahradaṃ gatvā naraś codaṅmukhaḥ śuciḥ
nimajjet tatra vārāṃs trīn imaṃ mantram udīrayet //

saṃsārasāgare magnaṃ pāpagrastam acetanam
trāhi māṃ bhaganetraghna tripurāre namo 'stu te //

namaḥ śivāya śāntāya sarvapāpaharāya ca
snānaṃ karomi deveśa mama naśyatu pātakam //

nābhimātre jale snātvā vidhivad devatā ṛṣīn
tilodakena matimān pitṝṃś cānyāṃś ca tarpayet //

snātvā tathaiva cācamya tato gacchec chivālayam
praviśya devatāgāraṃ kṛtvā taṃ triḥ pradakṣiṇam //

mūlamantreṇa saṃpūjya mārkaṇḍeyasya ceśvaram
aghoreṇa ca bho viprāḥ praṇipatya prasādayet //

trilocana namas te 'stu namas te śaśibhūṣaṇa
trāhi māṃ tvaṃ virūpākṣa mahādeva namo 'stu te //

mārkaṇḍeyahrade tv evaṃ snātvā dṛṣṭvā ca śaṃkaram
daśānām aśvamedhānāṃ phalaṃ prāpnoti mānavaḥ //

pāpaiḥ sarvair vinirmuktaḥ śivalokaṃ sa gacchati
tatra bhuktvā varān bhogān yāvad ābhūtasaṃplavam //

ihalokaṃ samāsādya bhaved vipro bahuśrutaḥ
śāṃkaraṃ yogam āsādya tato mokṣam avāpnuyāt //

kalpavṛkṣaṃ tato gatvā kṛtvā taṃ triḥ pradakṣiṇam
pūjayet parayā bhaktyā mantreṇānena taṃ vaṭam //

oṃ namo vyaktarūpāya mahāpralayakāriṇe
mahadrasopaviṣṭāya nyagrodhāya namo 'stu te //

amaras tvaṃ sadā kalpe hareś cāyatanaṃ vaṭa
nyagrodha hara me pāpaṃ kalpavṛkṣa namo 'stu te //

bhaktyā pradakṣiṇaṃ kṛtvā natvā kalpavaṭaṃ naraḥ
sahasā mucyate pāpāj jīrṇatvaca ivoragaḥ //

chāyāṃ tasya samākramya kalpavṛkṣasya bho dvijāḥ
brahmahatyāṃ naro jahyāt pāpeṣv anyeṣu kā kathā //

dṛṣṭvā kṛṣṇāṅgasaṃbhūtaṃ brahmatejomayaṃ param
nyagrodhākṛtikaṃ viṣṇuṃ praṇipatya ca bho dvijāḥ //

rājasūyāśvamedhābhyāṃ phalaṃ prāpnoti cādhikam
tathā svavaṃśam uddhṛtya viṣṇulokaṃ sa gacchati //

vainateyaṃ namaskṛtya kṛṣṇasya purataḥ sthitam
sarvapāpavinirmuktas tato viṣṇupuraṃ vrajet //

dṛṣṭvā vaṭaṃ vainateyaṃ yaḥ paśyet puruṣottamam
saṃkarṣaṇaṃ subhadrāṃ ca sa yāti paramāṃ gatim //

praviśyāyatanaṃ viṣṇoḥ kṛtvā taṃ triḥ pradakṣiṇam
saṃkarṣaṇaṃ svamantreṇa bhaktyāpūjya prasādayet //

namas te haladhṛg rāma namas te muśalāyudha
namas te revatīkānta namas te bhaktavatsala //

namas te balināṃ śreṣṭha namas te dharaṇīdhara
pralambāre namas te 'stu trāhi māṃ kṛṣṇapūrvaja //

evaṃ prasādya cānantam ajeyaṃ tridaśārcitam
kailāsaśikharākāraṃ candrāt kāntatarānanam //

nīlavastradharaṃ devaṃ phaṇāvikaṭamastakam
mahābalaṃ haladharaṃ kuṇḍalaikavibhūṣitam //

rauhiṇeyaṃ naro bhaktyā labhed abhimataṃ phalam
sarvapāpair vinirmukto viṣṇulokaṃ sa gacchati //

ābhūtasaṃplavaṃ yāvad bhuktvā tatra sukhaṃ naraḥ
puṇyakṣayād ihāgatya pravare yogināṃ kule //

brāhmaṇapravaro bhūtvā sarvaśāstrārthapāragaḥ
jñānaṃ tatra samāsādya muktiṃ prāpnoti durlabhām //

evam abhyarcya halinaṃ tataḥ kṛṣṇaṃ vicakṣaṇaḥ
dvādaśākṣaramantreṇa pūjayet susamāhitaḥ //

dviṣaṭkavarṇamantreṇa bhaktyā ye puruṣottamam
pūjayanti sadā dhīrās te mokṣaṃ prāpnuvanti vai //

na tāṃ gatiṃ surā yānti yogino naiva somapāḥ
yāṃ gatiṃ yānti bho viprā dvādaśākṣaratatparāḥ //

tasmāt tenaiva mantreṇa bhaktyā kṛṣṇaṃ jagadgurum
saṃpūjya gandhapuṣpādyaiḥ praṇipatya prasādayet //

jaya kṛṣṇa jagannātha jaya sarvāghanāśana
jaya cāṇūrakeśighna jaya kaṃsaniṣūdana //

jaya padmapalāśākṣa jaya cakragadādhara
jaya nīlāmbudaśyāma jaya sarvasukhaprada //

jaya deva jagatpūjya jaya saṃsāranāśana
jaya lokapate nātha jaya vāñchāphalaprada //

saṃsārasāgare ghore niḥsāre duḥkhaphenile
krodhagrāhākule raudre viṣayodakasaṃplave //

nānārogormikalile mohāvartasudustare
nimagno 'haṃ suraśreṣṭha trāhi māṃ puruṣottama //

evaṃ prasādya deveśaṃ varadaṃ bhaktavatsalam
sarvapāpaharaṃ devaṃ sarvakāmaphalapradam //

pīnāṃsaṃ dvibhujaṃ kṛṣṇaṃ padmapattrāyatekṣaṇam
mahoraskaṃ mahābāhuṃ pītavastraṃ śubhānanam //

śaṅkhacakragadāpāṇiṃ mukuṭāṅgadabhūṣaṇam
sarvalakṣaṇasaṃyuktaṃ vanamālāvibhūṣitam //

dṛṣṭvā naro 'ñjaliṃ kṛtvā daṇḍavat praṇipatya ca
aśvamedhasahasrāṇāṃ phalaṃ prāpnoti vai dvijāḥ //

yat phalaṃ sarvatīrtheṣu snāne dāne prakīrtitam
naras tat phalam āpnoti dṛṣṭvā kṛṣṇaṃ praṇamya ca //

yat phalaṃ sarvaratnādyair iṣṭe bahusuvarṇake
naras tat phalam āpnoti dṛṣṭvā kṛṣṇaṃ praṇamya ca //

yat phalaṃ sarvavedeṣu sarvayajñeṣu yat phalam
tat phalaṃ samavāpnoti naraḥ kṛṣṇaṃ praṇamya ca //

yat phalaṃ sarvadānena vratena niyamena ca
naras tat phalam āpnoti dṛṣṭvā kṛṣṇaṃ praṇamya ca //

tapobhir vividhair ugrair yat phalaṃ samudāhṛtam
naras tat phalam āpnoti dṛṣṭvā kṛṣṇaṃ praṇamya ca //

yat phalaṃ brahmacaryeṇa samyak cīrṇena tatkṛtam
naras tat phalam āpnoti dṛṣṭvā kṛṣṇaṃ praṇamya ca //

yat phalaṃ ca gṛhasthasya yathoktācāravartinaḥ
naras tat phalam āpnoti dṛṣṭvā kṛṣṇaṃ praṇamya ca //

yat phalaṃ vanavāsena vānaprasthasya kīrtitam
naras tat phalam āpnoti dṛṣṭvā kṛṣṇaṃ praṇamya ca //

saṃnyāsena yathoktena yat phalaṃ samudāhṛtam
naras tat phalam āpnoti dṛṣṭvā kṛṣṇaṃ praṇamya ca //

kiṃ cātra bahunoktena māhātmye tasya bho dvijāḥ
dṛṣṭvā kṛṣṇaṃ naro bhaktyā mokṣaṃ prāpnoti durlabham //

pāpair vimuktaḥ śuddhātmā kalpakoṭisamudbhavaiḥ
śriyā paramayā yuktaḥ sarvaiḥ samudito guṇaiḥ //

sarvakāmasamṛddhena vimānena suvarcasā
trisaptakulam uddhṛtya naro viṣṇupuraṃ vrajet //

tatra kalpaśataṃ yāvad bhuktvā bhogān manoramān
gandharvāpsarasaiḥ sārdhaṃ yathā viṣṇuś caturbhujaḥ //

cyutas tasmād ihāyāto viprāṇāṃ pravare kule
sarvajñaḥ sarvavedī ca jāyate gatamatsaraḥ //

svadharmanirataḥ śānto dātā bhūtahite rataḥ
āsādya vaiṣṇavaṃ jñānaṃ tato muktim avāpnuyāt //

tataḥ saṃpūjya mantreṇa subhadrāṃ bhaktavatsalām
prasādayet tato viprāḥ praṇipatya kṛtāñjaliḥ //

namas te sarvage devi namas te śubhasaukhyade
trāhi māṃ padmapattrākṣi kātyāyani namo 'stu te //

evaṃ prasādya tāṃ devīṃ jagaddhātrīṃ jagaddhitām
baladevasya bhaginīṃ subhadrāṃ varadāṃ śivām //

kāmagena vimānena naro viṣṇupuraṃ vrajet
ābhūtasaṃplavaṃ yāvat krīḍitvā tatra devavat //

iha mānuṣatāṃ prāpto brāhmaṇo vedavid bhavet
prāpya yogaṃ hares tatra mokṣaṃ ca labhate dhruvam //