Brahma Purana · Chapter 55

sa niṣkramyodarāt tasya bālasya munisattamāḥ
punaś caikārṇavām urvīm apaśyaj janavarjitām //

pūrvadṛṣṭaṃ ca taṃ devaṃ dadarśa śiśurūpiṇam
śākhāyāṃ vaṭavṛkṣasya paryaṅkopari saṃsthitam //

śrīvatsavakṣasaṃ devaṃ pītavastraṃ caturbhujam
jagad ādāya tiṣṭhantaṃ padmapattrāyatekṣaṇam //

so 'pi taṃ munim āyāntaṃ plavamānam acetanam
dṛṣṭvā mukhād viniṣkrāntaṃ provāca prahasann iva //

kaccit tvayoṣitaṃ vatsa viśrāntaṃ ca mamodare
bhramamāṇaś ca kiṃ tatra āścaryaṃ dṛṣṭavān asi //

bhakto 'si me muniśreṣṭha śrānto 'si ca mamāśritaḥ
tena tvām upakārāya saṃbhāṣe paśya mām iha //

śrutvā sa vacanaṃ tasya saṃprahṛṣṭatanūruhaḥ
dadarśa taṃ suduṣprekṣaṃ ratnair divyair alaṃkṛtam //

prasannā nirmalā dṛṣṭir muhūrtāt tasya bho dvijāḥ
prasādāt tasya devasya prādurbhūtā punar navā //

raktāṅgulitalau pādau tatas tasya surārcitau
praṇamya śirasā viprā harṣagadgadayā girā //

kṛtāñjalis tadā hṛṣṭo vismitaś ca punaḥ punaḥ
dṛṣṭvā taṃ paramātmānaṃ saṃstotum upacakrame //

devadeva jagannātha māyābālavapurdhara
trāhi māṃ cārupadmākṣa duḥkhitaṃ śaraṇāgatam //

saṃtapto 'smi suraśreṣṭha saṃvartākhyena vahninā
aṅgāravarṣabhītaṃ ca trāhi māṃ puruṣottama //

śoṣitaś ca pracaṇḍena vāyunā jagadāyunā
vihvalo 'haṃ tathā śrāntas trāhi māṃ puruṣottama //

tāpitaś ca taśāmātyaiḥ pralayāvartakādibhiḥ
na śāntim adhigacchāmi trāhi māṃ puruṣottama //

tṛṣitaś ca kṣudhāviṣṭo duḥkhitaś ca jagatpate
trātāraṃ nātra paśyāmi trāhi māṃ puruṣottama //

asminn ekārṇave ghore vinaṣṭe sacarācare
na cāntam adhigacchāmi trāhi māṃ puruṣottama //

tavodare ca deveśa mayā dṛṣṭaṃ carācaram
vismito 'haṃ viṣaṇṇaś ca trāhi māṃ puruṣottama //

saṃsāre 'smin nirālambe prasīda puruṣottama
prasīda vibudhaśreṣṭha prasīda vibudhapriya //

prasīda vibudhāṃ nātha prasīda vibudhālaya
prasīda sarvalokeśa jagatkāraṇakāraṇa //

prasīda sarvakṛd deva prasīda mama bhūdhara
prasīda salilāvāsa prasīda madhusūdana //

prasīda kamalākānta prasīda tridaśeśvara
prasīda kaṃsakeśīghna prasīdāriṣṭanāśana //

prasīda kṛṣṇa daityaghna prasīda danujāntaka
prasīda mathurāvāsa prasīda yadunandana //

prasīda śakrāvaraja prasīda varadāvyaya
tvaṃ mahī tvaṃ jalaṃ deva tvam agnis tvaṃ samīraṇaḥ //

tvaṃ nabhas tvaṃ manaś caiva tvam ahaṃkāra eva ca
tvaṃ buddhiḥ prakṛtiś caiva sattvādyās tvaṃ jagatpate //

puruṣas tvaṃ jagadvyāpī puruṣād api cottamaḥ
tvam indriyāṇi sarvāṇi śabdādyā viṣayāḥ prabho //

tvaṃ dikpālāś ca dharmāś ca vedā yajñāḥ sadakṣiṇāḥ
tvam indras tvaṃ śivo devas tvaṃ havis tvaṃ hutāśanaḥ //

tvaṃ yamaḥ pitṛrāṭ deva tvaṃ rakṣodhipatiḥ svayam
varuṇas tvam apāṃ nātha tvaṃ vāyus tvaṃ dhaneśvaraḥ //

tvam īśānas tvam anantas tvaṃ gaṇeśaś ca ṣaṇmukhaḥ
vasavas tvaṃ tathā rudrās tvam ādityāś ca khecarāḥ //

dānavās tvaṃ tathā yakṣās tvaṃ daityāḥ samarudgaṇāḥ
siddhāś cāpsaraso nāgā gandharvās tvaṃ sacāraṇāḥ //

pitaro vālakhilyāś ca prajānāṃ patayo 'cyuta
munayas tvam ṛṣigaṇās tvam aśvinau niśācarāḥ //

anyāś ca jātayas tvaṃ hi yat kiṃcij jīvasaṃjñitam
kiṃ cātra bahunoktena brahmādistambagocaram //

bhūtaṃ bhavyaṃ bhaviṣyaṃ ca tvaṃ jagat sacarācaram
yat te rūpaṃ paraṃ deva kūṭastham acalaṃ dhruvam //

brahmādyās tan na jānanti katham anye 'lpamedhasaḥ
deva śuddhasvabhāvo 'si nityas tvaṃ prakṛteḥ paraḥ //

avyaktaḥ śāśvato 'nantaḥ sarvavyāpī maheśvaraḥ
tvam ākāśaḥ paraḥ śānto ajas tvaṃ vibhur avyayaḥ //

evaṃ tvāṃ nirguṇaṃ stotuṃ kaḥ śaknoti nirañjanam
stuto 'si yan mayā deva vikalenālpacetasā
tat sarvaṃ devadeveśa kṣantum arhasi cāvyaya //