Brahma Purana · Chapter 54

sa praviśyodare tasya bālasya munisattamaḥ
dadarśa pṛthivīṃ kṛtsnāṃ nānājanapadair vṛtām //

lavaṇekṣusurāsarpir dadhidugdhajalodadhīn
dadarśa tān samudrāṃś ca jambu plakṣaṃ ca śālmalam //

kuśaṃ krauñcaṃ ca śākaṃ ca puṣkaraṃ ca dadarśa saḥ
bhāratādīni varṣāṇi tathā sarvāṃś ca parvatān //

meruṃ ca sarvaratnāḍhyaṃ apaśyat kanakācalam
nānāratnānvitaiḥ śṛṅgair bhūṣitaṃ bahukandaram //

nānāmunijanākīrṇaṃ nānāvṛkṣavanākulam
nānāsattvasamāyuktaṃ nānāścaryasamanvitam //

vyāghraiḥ siṃhair varāhaiś ca cāmarair mahiṣair gajaiḥ
mṛgaiḥ śākhāmṛgaiś cānyair bhūṣitaṃ sumanoharam //

śakrādyair vividhair devaiḥ siddhacāraṇapannagaiḥ
muniyakṣāpsarobhiś ca vṛtaiś cānyaiḥ surālayaiḥ //

evaṃ sumeruṃ śrīmantam apaśyan munisattamaḥ
paryaṭan sa tadā vipras tasya bālasya codare //

himavantaṃ hemakūṭaṃ niṣadhaṃ gandhamādanam
śvetaṃ ca durdharaṃ nīlaṃ kailāsaṃ mandaraṃ girim //

mahendraṃ malayaṃ vindhyaṃ pāriyātraṃ tathārbudam
sahyaṃ ca śuktimantaṃ ca mainākaṃ vakraparvatam //

etāś cānyāś ca bahavo yāvantaḥ pṛthivīdharāḥ
tatas tāṃs tu muniśreṣṭhāḥ so 'paśyad ratnabhūṣitān //

kurukṣetraṃ ca pāñcālān matsyān madrān sakekayān
bāhlīkān śūrasenāṃś ca kāśmīrāṃs taṅgaṇān khasān //

pārvatīyān kirātāṃś ca karṇaprāvaraṇān marūn
antyajān antyajātīṃś ca so 'paśyat tasya codare //

mṛgāñ śākhāmṛgān siṃhān varāhān sṛmarāñ śaśān
gajāṃś cānyāṃs tathā sattvān so 'paśyat tasya codare //

pṛthivyāṃ yāni tīrthāni grāmāś ca nagarāṇi ca
kṛṣigorakṣavāṇijyaṃ krayavikrayaṇaṃ tathā //

śakrādīn vibudhāñ śreṣṭhāṃs tathānyāṃś ca divaukasaḥ
gandharvāpsaraso yakṣān ṛṣīṃś caiva sanātanān //

daityadānavasaṃghāṃś ca nāgāṃś ca munisattamāḥ
siṃhikātanayāṃś caiva ye cānye suraśatravaḥ //

yat kiṃcit tena loke 'smin dṛṣṭapūrvaṃ carācaram
apaśyat sa tadā sarvaṃ tasya kukṣau dvijottamāḥ //

athavā kiṃ bahūktena kīrtitena punaḥ punaḥ
brahmādistambaparyantaṃ yat kiṃcit sacarācaram //

bhūrlokaṃ ca bhuvarlokaṃ svarlokaṃ ca dvijottamāḥ
mahar janas tapaḥ satyam atalaṃ vitalaṃ tathā //

pātālaṃ sutalaṃ caiva vitalaṃ ca rasātalam
mahātalaṃ ca brahmāṇḍam apaśyat tasya codare //

avyāhatā gatis tasya tadābhūd dvijasattamāḥ
prasādāt tasya devasya smṛtilopaś ca nābhavat //

bhramamāṇas tadā kukṣau kṛtsnaṃ jagad idaṃ dvijāḥ
nāntaṃ jagāma dehasya tasya viṣṇoḥ kadācana //

yadāsau nāgataś cāntaṃ tasya dehasya bho dvijāḥ
tadā taṃ varadaṃ devaṃ śaraṇaṃ gatavān muniḥ //

tato 'sau sahasā viprā vāyuvegena niḥsṛtaḥ
mahātmano mukhāt tasya vivṛtāt puruṣasya saḥ //