Brahma Purana · Chapter 53

tato gajakulaprakhyās taḍinmālāvibhūṣitāḥ
samuttasthur mahāmeghā nabhasy adbhutadarśanāḥ //

kecin nīlotpalaśyāmāḥ kecit kumudasaṃnibhāḥ
kecit kiñjalkasaṃkāśāḥ kecit pītāḥ payodharāḥ //

kecid dharitasaṃkāśāḥ kākāṇḍasaṃnibhās tathā
kecit kamalapattrābhāḥ kecid dhiṅgulasaṃnibhāḥ //

kecit puravarākārāḥ kecid girivaropamāḥ
kecid añjanasaṃkāśāḥ kecin marakataprabhāḥ //

vidyunmālāpinaddhāṅgāḥ samuttasthur mahāghanāḥ
ghorarūpā mahābhāgā ghorasvananināditāḥ //

tato jaladharāḥ sarve samāvṛṇvan nabhastalam
tair iyaṃ pṛthivī sarvā saparvatavanākarā //

āpūritā diśaḥ sarvāḥ salilaughapariplutāḥ
tatas te jaladā ghorā vāriṇā munisattamāḥ //

sarvataḥ plāvayām āsuś coditāḥ parameṣṭhinā
varṣamāṇā mahātoyaṃ pūrayanto vasuṃdharām //

sughoram aśivaṃ raudraṃ nāśayanti sma pāvakam
tato dvādaśa varṣāṇi payodāḥ samupaplave //

dhārābhiḥ pūrayanto vai codyamānā mahātmanā
tataḥ samudrāḥ svāṃ velām atikrāmanti bho dvijāḥ //

parvatāś ca vyaśīryanta mahī cāpsu nimajjati
sarvataḥ sumahābhrāntās te payodā nabhastalam //

saṃveṣṭayitvā naśyanti vāyuvegasamāhatāḥ
tatas taṃ mārutaṃ ghoraṃ sa viṣṇur munisattamāḥ //

ādipadmālayo devaḥ pītvā svapiti bho dvijāḥ
tasminn ekārṇave ghore naṣṭe sthāvarajaṅgame //

naṣṭe devāsuranare yakṣarākṣasavarjite
tato muniḥ sa viśrānto dhyātvā ca puruṣottamam //

dadarśa cakṣur unmīlya jalapūrṇāṃ vasuṃdharām
nāpaśyat taṃ vaṭaṃ norvīṃ na digādi na bhāskaram //

na candrārkāgnipavanaṃ na devāsurapannagam
tasminn ekārṇave ghore tamobhūte nirāśraye //

nimajjan sa tadā viprāḥ saṃtartum upacakrame
babhrāmāsau muniś cārta itaś cetaś ca saṃplavan //

nimamajja tadā viprās trātāraṃ nādhigacchati
evaṃ taṃ vihvalaṃ dṛṣṭvā kṛpayā puruṣottamaḥ
provāca muniśārdūlās tadā dhyānena toṣitaḥ //

vatsa śrānto 'si bālas tvaṃ bhaktatra mama suvrata
āgacchāgaccha śīghraṃ tvaṃ mārkaṇḍeya mamāntikam //

mā tvayaiva ca bhetavyaṃ saṃprāpto 'si mamāgrataḥ
mārkaṇḍeya mune dhīra bālas tvaṃ śramapīḍitaḥ //

tasya tad vacanaṃ śrutvā muniḥ paramakopitaḥ
uvāca sa tadā viprā vismitaś cābhavan muhuḥ //

ko 'yaṃ nāmnā kīrtayati tapaḥ paribhavann iva
bahuvarṣasahasrākhyaṃ dharṣayann iva me vapuḥ //

na hy eṣa samudācāro deveṣv api samāhitaḥ
māṃ brahmā sa ca deveśo dīrghāyur iti bhāṣate //

kas tapo ghoraśiraso mamādya tyaktajīvitaḥ
mārkaṇḍeyeti coktvā man mṛtyuṃ gantum ihecchati //

evam uktvā tadā viprāś cintāviṣṭo 'bhavan muniḥ
kiṃ svapno 'yaṃ mayā dṛṣṭaḥ kiṃ vā moho 'yam āgataḥ //

itthaṃ cintayatas tasya utpannā duḥkhahā matiḥ
vrajāmi śaraṇaṃ devaṃ bhaktyāhaṃ puruṣottamam //

sa gatvā śaraṇaṃ devaṃ munis tadgatamānasaḥ
dadarśa taṃ vaṭaṃ bhūyo viśālaṃ salilopari //

śākhāyāṃ tasya sauvarṇaṃ vistīrṇāyāṃ mahādbhutam
ruciraṃ divyaparyaṅkaṃ racitaṃ viśvakarmaṇā //

vajravaidūryaracitaṃ maṇividrumaśobhitam
padmarāgādibhir juṣṭaṃ ratnair anyair alaṃkṛtam //

nānāstaraṇasaṃvītaṃ nānāratnopaśobhitam
nānāścaryasamāyuktaṃ prabhāmaṇḍalamaṇḍitam //

tasyopari sthitaṃ devaṃ kṛṣṇaṃ bālavapurdharam
sūryakoṭipratīkāśaṃ dīpyamānaṃ suvarcasam //

caturbhujaṃ sundarāṅgaṃ padmapattrāyatekṣaṇam
śrīvatsavakṣasaṃ devaṃ śaṅkhacakragadādharam //

vanamālāvṛtoraskaṃ divyakuṇḍaladhāriṇam
hārabhārārpitagrīvaṃ divyaratnavibhūṣitam //

dṛṣṭvā tadā munir devaṃ vismayotphullalocanaḥ
romāñcitatanur devaṃ praṇipatyedam abravīt //

aho caikārṇave ghore vinaṣṭe sacarācare
katham eko hy ayaṃ bālas tiṣṭhaty atra sunirbhayaḥ //

bhūtaṃ bhavyaṃ bhaviṣyaṃ ca jānann api mahāmuniḥ
na bubodha tadā devaṃ māyayā tasya mohitaḥ
yadā na bubudhe cainaṃ tadā khedād uvāca ha //

vṛthā me tapaso vīryaṃ vṛthā jñānaṃ vṛthā kriyā
vṛthā me jīvitaṃ dīrghaṃ vṛthā mānuṣyam eva ca //

yo 'haṃ suptaṃ na jānāmi paryaṅke divyabālakam //

evaṃ saṃcintayan vipraḥ plavamāno vicetanaḥ
trāṇārthaṃ vihvalaś cāsau nirvedaṃ gatavāṃs tadā //

tato bālārkasaṃkāśaṃ svamahimnā vyavasthitam
sarvatejomayaṃ viprā na śaśākābhivīkṣitum //

dṛṣṭvā taṃ munim āyāntaṃ sa bālaḥ prahasann iva
provāca muniśārdūlās tadā meghaughanisvanaḥ //

vatsa jānāmi śrāntaṃ tvāṃ trāṇārthaṃ mām upasthitam
śarīraṃ viśa me kṣipraṃ viśrāmas te mayoditaḥ //

śrutvā sa vacanaṃ tasya kiṃcin novāca mohitaḥ
viveśa vadanaṃ tasya vivṛtaṃ cāvaśo muniḥ //