Brahma Purana · Chapter 52

āsīt kalpe muniśreṣṭhāḥ saṃpravṛtte mahākṣaye
naṣṭe 'rkacandre pavane naṣṭe sthāvarajaṅgame //

udite pralayāditye pracaṇḍe ghanagarjite
vidyudutpātasaṃghātaiḥ saṃbhagne taruparvate //

loke ca saṃhṛte sarve mahadulkānibarhaṇe
śuṣkeṣu sarvatoyeṣu saraḥsu ca saritsu ca //

tataḥ saṃvartako vahnir vāyunā saha bho dvijāḥ
lokaṃ tu prāviśat sarvam ādityair upaśobhitam //

paścāt sa pṛthivīṃ bhittvā praviśya ca rasātalam
devadānavayakṣāṇāṃ bhayaṃ janayate mahat //

nirdahan nāgalokaṃ ca yac ca kiṃcit kṣitāv iha
adhastān muniśārdūlāḥ sarvaṃ nāśayate kṣaṇāt //

tato yojanaviṃśānāṃ sahasrāṇi śatāni ca
nirdahaty āśugo vāyuḥ sa ca saṃvartako 'nalaḥ //

sadevāsuragandharvaṃ sayakṣoragarākṣasam
tato dahati saṃdīptaḥ sarvam eva jagat prabhuḥ //

pradīpto 'sau mahāraudraḥ kalpāgnir iti saṃśrutaḥ
mahājvālo mahārciṣmān saṃpradīptamahāsvanaḥ //

sūryakoṭipratīkāśo jvalann iva sa tejasā
trailokyaṃ cādahat tūrṇaṃ sasurāsuramānuṣam //

evaṃvidhe mahāghore mahāpralayadāruṇe
ṛṣiḥ paramadharmātmā dhyānayogaparo 'bhavat //

ekaḥ saṃtiṣṭhate viprā mārkaṇḍeyeti viśrutaḥ
mohapāśair nibaddho 'sau kṣuttṛṣṇākulitendriyāḥ //

sa dṛṣṭvā taṃ mahāvahniṃ śuṣkakaṇṭhauṣṭhatālukaḥ
tṛṣṇārtaḥ praskhalan viprās tadāsau bhayavihvalaḥ //

babhrāma pṛthivīṃ sarvāṃ kāṃdiśīko vicetanaḥ
trātāraṃ nādhigacchan vai itaś cetaś ca dhāvati //

na lebhe ca tadā śarma yatra viśrāmyatā dvijāḥ
karomi kiṃ na jānāmi yasyāhaṃ śaraṇaṃ vraje //

kathaṃ paśyāmi taṃ devaṃ puruṣeśaṃ sanātanam
iti saṃcintayan devam ekāgreṇa sanātanam //

prāptavāṃs tat padaṃ divyaṃ mahāpralayakāraṇam
puruṣeśam iti khyātaṃ vaṭarājaṃ sanātanam //

tvarāyukto muniś cāsau nyagrodhasyāntikaṃ yayau
āsādya taṃ muniśreṣṭhās tasya mūle samāviśat //

na kālāgnibhayaṃ tatra na cāṅgārapravarṣaṇam
na saṃvartāgamas tatra na ca vajrāśanis tathā //