Brahma Purana · Chapter 51

nāhaṃ devo na yakṣo vā na daityo na ca devarāṭ
na brahmā na ca rudro 'haṃ viddhi māṃ puruṣottamam //

artihā sarvalokānām anantabalapauruṣaḥ
ārādhanīyo bhūtānām anto yasya na vidyate //

paṭhyate sarvaśāstreṣu vedānteṣu nigadyate
yam āhur jñānagamyeti vāsudeveti yoginaḥ //

aham eva svayaṃ brahmā ahaṃ viṣṇuḥ śivo 'py aham
indro 'haṃ devarājaś ca jagatsaṃyamano yamaḥ //

pṛthivyādīni bhūtāni tretāgnir hutabhuṅ nṛpa
varuṇo 'pāṃ patiś cāhaṃ dharitrī ca mahīdharaḥ //

yat kiṃcid vāṅmayaṃ loke jagat sthāvarajaṅgamam
carācaraṃ ca yad viśvaṃ madanyan nāsti kiṃcana //

prīto 'haṃ te nṛpaśreṣṭha varaṃ varaya suvrata
yad iṣṭaṃ tat prayacchāmi hṛdi yat te vyavasthitam //

maddarśanam apuṇyānāṃ svapnānte 'pi na jāyate
tvaṃ punar dṛḍhabhaktitvāt pratyakṣaṃ dṛṣṭavān asi //

śrutvaivaṃ vāsudevasya vacanaṃ tasya bho dvijāḥ
romāñcitatanur bhūtvā idaṃ stotraṃ jagau nṛpaḥ //

śriyaḥ kānta namas te 'stu śrīpate pītavāsase
śrīda śrīśa śrīnivāsa namas te śrīniketana //

ādyaṃ puruṣam īśānaṃ sarveśaṃ sarvatomukham
niṣkalaṃ paramaṃ devaṃ praṇato 'smi sanātanam //

śabdātītaṃ guṇātītaṃ bhāvābhāvavivarjitam
nirlepaṃ nirguṇaṃ sūkṣmaṃ sarvajñaṃ sarvabhāvanam //

prāvṛṇmeghapratīkāśaṃ gobrāhmaṇahite ratam
sarveṣām eva goptāraṃ vyāpinaṃ sarvabhāvinam //

śaṅkhacakradharaṃ devaṃ gadāmuśaladhāriṇam
namasye varadaṃ devaṃ nīlotpaladalacchavim //

nāgaparyaṅkaśayanaṃ kṣīrodārṇavaśāyinam
namasye 'haṃ hṛṣīkeśaṃ sarvapāpaharaṃ harim //

punas tvāṃ devadeveśaṃ namasye varadaṃ vibhum
sarvalokeśvaraṃ viṣṇuṃ mokṣakāraṇam avyayam //

evaṃ stutvā tu taṃ devaṃ praṇipatya kṛtāñjaliḥ
uvāca praṇato bhūtvā nipatya dharaṇītale //

prīto 'si yadi me nātha vṛṇomi varam uttamam
devāsurāḥ sagandharvā yakṣarakṣomahoragāḥ //

siddhavidyādharāḥ sādhyāḥ kiṃnarā guhyakās tathā
ṛṣayo ye mahābhāgā nānāśāstraviśāradāḥ //

parivrāḍyogayuktāś ca vedatattvārthacintakāḥ
mokṣamārgavido ye 'nye dhyāyanti paramaṃ padam //

nirguṇaṃ nirmalaṃ śāntaṃ yat paśyanti manīṣinaḥ
tat padaṃ gantum icchāmi tvatprasādāt sudurlabham //

sarvaṃ bhavatu bhadraṃ te yatheṣṭaṃ sarvam āpnuhi
bhaviṣyati yathākāmaṃ matprasādān na saṃśayaḥ //

daśa varṣasahasrāṇi tathā nava śatāni ca
avicchinnaṃ mahārājyaṃ kuru tvaṃ nṛpasattama //

prayāsyasi padaṃ divyaṃ durlabhaṃ yat surāsuraiḥ
pūrṇamanorathaṃ śāntaṃ guhyam avyaktam avyayam //

parāt parataraṃ sūkṣmaṃ nirlepaṃ niṣkalaṃ dhruvam
cintāśokavinirmuktaṃ kriyākāraṇavarjitam //

tad ahaṃ darśayiṣyāmi jñeyākhyaṃ paramaṃ padam
yaṃ prāpya paramānandaṃ prāpsyasi paramāṃ gatim //

kīrtiś ca tava rājendra bhavaty atra mahītale
yāvad ghanā nabho yāvad yāvac candrārkatārakam //

yāvat samudrāḥ saptaiva yāvan mervādiparvatāḥ
tiṣṭhanti divi devāś ca tāvat sarvatra cāvyayā //

indradyumnasaro nāma tīrthaṃ yajñāṅgasaṃbhavam
yatra snātvā sakṛl lokaḥ śakralokam avāpnuyāt //

dāpayiṣyati yaḥ piṇḍāṃs taṭe 'smin sarasaḥ śubhe
kulaikaviṃśam uddhṛtya śakralokaṃ gamiṣyati //

pūjyamāno 'psarobhiś ca gandharvair gītanisvanaiḥ
vimānena vaset tatra yāvad indrāś caturdaśa //

saraso dakṣiṇe bhāge nairṛtyāṃ tu samāśrite
nyagrodhas tiṣṭhate tatra tatsamīpe tu maṇḍapaḥ //

ketakīvanasaṃchanno nānāpādapasaṃkulaḥ
nārikelair asaṃkhyeyaiś campakair bakulāvṛtaiḥ //

aśokaiḥ karṇikāraiś ca puṃnāgair nāgakesaraiḥ
pāṭalāmrātasaralaiś candanair devadārubhiḥ //

nyagrodhāśvatthakhadiraiḥ pārijātaiḥ sahārjunaiḥ
hintālaiś caiva tālaiś ca śiṃśapair badarais tathā //

karañjair lakucaiḥ plakṣaiḥ panasair bilvadhātukaiḥ
anyair bahuvidhair vṛkṣaiḥ śobhitaḥ samalaṃkṛtaḥ //

āṣāḍhasya site pakṣe pañcamyāṃ pitṛdaivate
ṛkṣe neṣyanti nas tatra nītvā sapta dināni vai //

maṇḍape sthāpayiṣyanti suveśyābhiḥ suśobhanaiḥ
krīḍāviśeṣabahulair nṛtyagītamanoharaiḥ //

cāmaraiḥ svarṇadaṇḍaiś ca vyajanai ratnabhūṣaṇaiḥ
vījayantas tathāsmabhyaṃ sthāpayiṣyanti maṅgalāḥ //

brahmacārī yatiś caiva snātakāś ca dvijottamāḥ
vānaprasthā gṛhasthāś ca siddhāś cānye ca brāhmaṇāḥ //

nānāvarṇapadaiḥ stotrair ṛgyajuḥsāmanisvanaiḥ
kariṣyanti stutiṃ rājan rāmakeśavayoḥ punaḥ //

tataḥ stutvā ca dṛṣṭvā ca saṃpraṇamya ca bhaktitaḥ
naro varṣāyutaṃ divyaṃ śrīmaddharipure vaset //

pūjyamāno 'psarobhiś ca gandharvair gītanisvanaiḥ
harer anucaras tatra krīḍate keśavena vai //

vimānenārkavarṇena ratnahāreṇa bhrājatā
sarvakāmair mahābhogais tiṣṭhate bhuvanottame //

tapaḥkṣayādihāgatya manuṣyo brāhmaṇo bhavet
koṭīdhanapatiḥ śrīmāṃś caturvedī bhaved dhruvam //

evaṃ tasmai varaṃ dattvā kṛtvā ca samayaṃ hariḥ
jagāmādarśanaṃ viprāḥ sahito viśvakarmaṇā //

sa tu rājā tadā hṛṣṭo romāñcitatanūruhaḥ
kṛtakṛtyam ivātmānaṃ mene saṃdarśanād dhareḥ //

tataḥ kṛṣṇaṃ ca rāmaṃ ca subhadrāṃ ca varapradām
rathair vimānasaṃkāśair maṇikāñcanacitritaiḥ //

saṃvāhya tās tadā rājā mahāmaṅgalaniḥsvanaiḥ
ānayām āsa matimān sāmātyaḥ sapurohitaḥ //

nānāvāditranirghoṣair nānāvedasvanaiḥ śubhaiḥ
saṃsthāpya ca śubhe deśe pavitre sumanohare //

tataḥ śubhatithau kāle nakṣatre śubhalakṣaṇe
pratiṣṭhāṃ kārayām āsa sumuhūrte dvijaiḥ saha //

yathoktena vidhānena vidhidṛṣṭena karmaṇā
ācāryānumatenaiva sarvaṃ kṛtvā mahīpatiḥ //

ācāryāya tadā dattvā dakṣiṇāṃ vidhivat prabhuḥ
ṛtvigbhyaś ca vidhānena tathānyebhyo dhanaṃ dadau //

kṛtvā pratiṣṭhāṃ vidhivat prāsāde bhavanottame
sthāpayām āsa tān sarvān vidhidṛṣṭena karmaṇā //

tataḥ saṃpūjya vidhinā nānāpuṣpaiḥ sugandhibhiḥ
suvarṇamaṇimuktādyair nānāvastraiḥ suśobhanaiḥ //

ratnaiś ca vividhair divyair āsanair grāmapattanaiḥ
dadau cānyān sa viṣayān purāṇi nagarāṇi ca //

evaṃ bahuvidhaṃ dattvā rājyaṃ kṛtvā yathocitam
iṣṭvā ca vividhair yajñair dattvā dānāny anekaśaḥ //

kṛtakṛtyas tato rājā tyaktasarvaparigrahaḥ
jagāma paramaṃ sthānaṃ tad viṣṇoḥ paramaṃ padam //

evaṃ mayā muniśreṣṭhāḥ kathito vo nṛpottamaḥ
kṣetrasya caiva māhātmyaṃ kim anyac chrotum icchatha //

śrutvaivaṃ vacanaṃ tasya brahmaṇo 'vyaktajanmanaḥ
āścaryaṃ menire viprāḥ papracchuś ca punar mudā //

kasmin kāle suraśreṣṭha gantavyaṃ puruṣottamam
vidhinā kena kartavyaṃ pañcatīrtham iti prabho //

ekaikasya ca tīrthasya snānadānasya yat phalam
devatāprekṣaṇe caiva brūhi sarvaṃ pṛthak pṛthak //

nirāhāraḥ kurukṣetre pādenaikena yas tapet
jitendriyo jitakrodhaḥ saptasaṃvatsarāyutam //

dṛṣṭvā sadā jyeṣṭhaśukla dvādaśyāṃ puruṣottamam
kṛtopavāsaḥ prāpnoti tato 'dhikataraṃ phalam //

tasmāj jyeṣṭhe muniśreṣṭhāḥ prayatnena susaṃyataiḥ
svargalokepsuviprādyair draṣṭavyaḥ puruṣottamaḥ //

pañcatīrthaṃ tu vidhivat kṛtvā jyeṣṭhe narottamaḥ
śuklapakṣasya dvādaśyāṃ paśyet taṃ puruṣottamam //

ye paśyanty avyayaṃ devaṃ dvādaśyāṃ puruṣottamam
te viṣṇulokam āsādya na cyavante kadācana //

tasmāj jyeṣṭhe prayatnena gantavyaṃ bho dvijottamāḥ
kṛtvā tasmin pañcatīrthaṃ draṣṭavyaḥ puruṣottamaḥ //

sudūrastho 'pi yo bhaktyā kīrtayet puruṣottamam
ahany ahani śuddhātmā so 'pi viṣṇupuraṃ vrajet //

yātrāṃ karoti kṛṣṇasya śraddhayā yaḥ samāhitaḥ
sarvapāpavinirmukto viṣṇulokaṃ vrajen naraḥ //

cakraṃ dṛṣṭvā harer dūrāt prāsādopari saṃsthitam
sahasā mucyate pāpān naro bhaktyā praṇamya tat //