Brahma Purana · Chapter 49

vāsudeva namas te 'stu namas te mokṣakāraṇa
trāhi māṃ sarvalokeśa janmasaṃsārasāgarāt //

nirmalāmbarasaṃkāśa namas te puruṣottama
saṃkarṣaṇa namas te 'stu trāhi māṃ dharaṇīdhara //

namas te hemagarbhābha namas te makaradhvaja
ratikānta namas te 'stu trāhi māṃ saṃvarāntaka //

namas te 'ñjanasaṃkāśa namas te bhaktavatsala
aniruddha namas te 'stu trāhi māṃ varado bhava //

namas te vibudhāvāsa namas te vibudhapriya
nārāyaṇa namas te 'stu trāhi māṃ śaraṇāgatam //

namas te balināṃ śreṣṭha namas te lāṅgalāyudha
caturmukha jagaddhāma trāhi māṃ prapitāmaha //

namas te nīlameghābha namas te tridaśārcita
trāhi viṣṇo jagannātha magnaṃ māṃ bhavasāgare //

pralayānalasaṃkāśa namas te ditijāntaka
narasiṃha mahāvīrya trāhi māṃ dīptalocana //

yathā rasātalād urvī tvayā daṃṣṭroddhṛtā purā
tathā mahāvarāhas tvaṃ trāhi māṃ duḥkhasāgarāt //

tavaitā mūrtayaḥ kṛṣṇa varadāḥ saṃstutā mayā
taveme baladevādyāḥ pṛthagrūpeṇa saṃsthitāḥ //

aṅgāni tava deveśa garutmādyās tathā prabho
dikpālāḥ sāyudhāś caiva keśavādyās tathācyuta //

ye cānye tava deveśa bhedāḥ proktā manīṣibhiḥ
te 'pi sarve jagannātha prasannāyatalocana //

mayārcitāḥ stutāḥ sarve tathā yūyaṃ namaskṛtāḥ
prayacchata varaṃ mahyaṃ dharmakāmārthamokṣadam //

bhedās te kīrtitā ye tu hare saṃkarṣaṇādayaḥ
tava pūjārthasaṃbhūtās tatas tvayi samāśritāḥ //

na bhedas tava deveśa vidyate paramārthataḥ
vividhaṃ tava yad rūpam uktaṃ tad upacārataḥ //

advaitaṃ tvāṃ kathaṃ dvaitaṃ vaktuṃ śaknoti mānavaḥ
ekas tvaṃ hi hare vyāpī citsvabhāvo nirañjanaḥ //

paramaṃ tava yad rūpaṃ bhāvābhāvavivarjitam
nirlepaṃ nirguṇaṃ śreṣṭhaṃ kūṭastham acalaṃ dhruvam //

sarvopādhivinirmuktaṃ sattāmātravyavasthitam
tad devāś ca na jānanti kathaṃ jānāmy ahaṃ prabho //

aparaṃ tava yad rūpaṃ pītavastraṃ caturbhujam
śaṅkhacakragadāpāṇi mukuṭāṅgadadhāriṇam //

śrīvatsoraskasaṃyuktaṃ vanamālāvibhūṣitam
tad arcayanti vibudhā ye cānye tava saṃśrayāḥ //

devadeva suraśreṣṭha bhaktānām abhayaprada
trāhi māṃ padmapattrākṣa magnaṃ viṣayasāgare //

nānyaṃ paśyāmi lokeśa yasyāhaṃ śaraṇaṃ vraje
tvām ṛte kamalākānta prasīda madhusūdana //

jarāvyādhiśatair yukto nānāduḥkhair nipīḍitaḥ
harṣaśokānvito mūḍhaḥ karmapāśaiḥ suyantritaḥ //

patito 'haṃ mahāraudre ghore saṃsārasāgare
viṣamodakaduṣpāre rāgadveṣajhaṣākule //

indriyāvartagambhīre tṛṣṇāśokormisaṃkule
nirāśraye nirālambe niḥsāre 'tyantacañcale //

māyayā mohitas tatra bhramāmi suciraṃ prabho
nānājātisahasreṣu jāyamānaḥ punaḥ punaḥ //

mayā janmāny anekāni sahasrāṇy ayutāni ca
vividhāny anubhūtāni saṃsāre 'smiñ janārdana //

vedāḥ sāṅgā mayādhītāḥ śāstrāṇi vividhāni ca
itihāsapurāṇāni tathā śilpāny anekaśaḥ //

asaṃtoṣāś ca saṃtoṣāḥ saṃcayāpacayā vyayāḥ
mayā prāptā jagannātha kṣayavṛddhyakṣayetarāḥ //

bhāryārimitrabandhūnāṃ viyogāḥ saṃgamās tathā
pitaro vividhā dṛṣṭā mātaraś ca tathā mayā //

duḥkhāni cānubhūtāni yāni saukhyāny anekaśaḥ
prāptāś ca bāndhavāḥ putrā bhrātaro jñātayas tathā //

mayoṣitaṃ tathā strīṇāṃ koṣṭhe viṇmūtrapicchale
garbhavāse mahāduḥkham anubhūtaṃ tathā prabho //

duḥkhāni yāny anekāni bālyayauvanagocare
vārdhake ca hṛṣīkeśa tāni prāptāni vai mayā //

maraṇe yāni duḥkhāni yamamārge yamālaye
mayā tāny anubhūtāni narake yātanās tathā //

kṛmikīṭadrumāṇāṃ ca hastyaśvamṛgapakṣiṇām
mahiṣoṣṭragavāṃ caiva tathānyeṣāṃ vanaukasām //

dvijātīnāṃ ca sarveṣāṃ śūdrāṇāṃ caiva yoniṣu
dhanināṃ kṣatriyāṇāṃ ca daridrāṇāṃ tapasvinām //

nṛpāṇāṃ nṛpabhṛtyānāṃ tathānyeṣāṃ ca dehinām
gṛheṣu teṣām utpanno deva cāhaṃ punaḥ punaḥ //

gato 'smi dāsatāṃ nātha bhṛtyānāṃ bahuśo nṛṇām
daridratvaṃ ceśvaratvaṃ svāmitvaṃ ca tathā gataḥ //

hato mayā hatāś cānye ghātito ghātitās tathā
dattaṃ mamānyair anyebhyo mayā dattam anekaśaḥ //

pitṛmātṛsuhṛdbhrātṛ kalatrāṇāṃ kṛtena ca
dhanināṃ śrotriyāṇāṃ ca daridrāṇāṃ tapasvinām //

uktaṃ dainyaṃ ca vividhaṃ tyaktvā lajjāṃ janārdana
devatiryaṅmanuṣyeṣu sthāvareṣu careṣu ca //

na vidyate tathā sthānaṃ yatrāhaṃ na gataḥ prabho
kadā me narake vāsaḥ kadā svarge jagatpate //

kadā manuṣyalokeṣu kadā tiryaggateṣu ca
jalayantre yathā cakre ghaṭī rajjunibandhanā //

yāti cordhvam adhaś caiva kadā madhye ca tiṣṭhati
tathā cāhaṃ suraśreṣṭha karmarajjusamāvṛtaḥ //

adhaś cordhvaṃ tathā madhye bhraman gacchāmi yogataḥ
evaṃ saṃsāracakre 'smin bhairave romaharṣaṇe //

bhramāmi suciraṃ kālaṃ nāntaṃ paśyāmi karhicit
na jāne kiṃ karomy adya hare vyākulitendriyaḥ //

śokatṛṣṇābhibhūto 'haṃ kāṃdiśīko vicetanaḥ
idānīṃ tvām ahaṃ deva vihvalaḥ śaraṇaṃ gataḥ //

trāhi māṃ duḥkhitaṃ kṛṣṇa magnaṃ saṃsārasāgare
kṛpāṃ kuru jagannātha bhaktaṃ māṃ yadi manyase //

tvadṛte nāsti me bandhur yo 'sau cintāṃ kariṣyati
deva tvāṃ nātham āsādya na bhayaṃ me 'sti kutracit //

jīvite maraṇe caiva yogakṣeme 'thavā prabho
ye tu tvāṃ vidhivad deva nārcayanti narādhamāḥ //

sugatis tu kathaṃ teṣāṃ bhavet saṃsārabandhanāt
kiṃ teṣāṃ kulaśīlena vidyayā jīvitena ca //

yeṣāṃ na jāyate bhaktir jagaddhātari keśave
prakṛtiṃ tv āsurīṃ prāpya ye tvāṃ nindanti mohitāḥ //

patanti narake ghore jāyamānāḥ punaḥ punaḥ
na teṣāṃ niṣkṛtis tasmād vidyate narakārṇavāt //

ye dūṣayanti durvṛttās tvāṃ deva puruṣādhamāḥ
yatra yatra bhavej janma mama karmanibandhanāt //

tatra tatra hare bhaktis tvayi cāstu dṛḍhā sadā
ārādhya tvāṃ surā daityā narāś cānye 'pi saṃyatāḥ //

avāpuḥ paramāṃ siddhiṃ kas tvāṃ deva na pūjayet
na śaknuvanti brahmādyāḥ stotuṃ tvāṃ tridaśā hare //

kathaṃ mānuṣabuddhyāhaṃ staumi tvāṃ prakṛteḥ param
tathā cājñānabhāvena saṃstuto 'si mayā prabho //

tat kṣamasvāparādhaṃ me yadi te 'sti dayā mayi
kṛtāparādhe 'pi hare kṣamāṃ kurvanti sādhavaḥ //

tasmāt prasīda deveśa bhaktasnehaṃ samāśritaḥ
stuto 'si yan mayā deva bhaktibhāvena cetasā
sāṅgaṃ bhavatu tat sarvaṃ vāsudeva namo 'stu te //

itthaṃ stutas tadā tena prasanno garuḍadhvajaḥ
dadau tasmai muniśreṣṭhāḥ sakalaṃ manasepsitam //

yaḥ saṃpūjya jagannāthaṃ pratyahaṃ stauti mānavaḥ
stotreṇānena matimān sa mokṣaṃ labhate dhruvam //

trisaṃdhyaṃ yo japed vidvān idaṃ stotravaraṃ śuciḥ
dharmaṃ cārthaṃ ca kāmaṃ ca mokṣaṃ ca labhate naraḥ //

yaḥ paṭhec chṛṇuyād vāpi śrāvayed vā samāhitaḥ
sa lokaṃ śāśvataṃ viṣṇor yāti nirdhūtakalmaṣaḥ //

dhanyaṃ pāpaharaṃ cedaṃ bhuktimuktipradaṃ śivam
guhyaṃ sudurlabhaṃ puṇyaṃ na deyaṃ yasya kasyacit //

na nāstikāya mūrkhāya na kṛtaghnāya mānine
na duṣṭamataye dadyān nābhaktāya kadācana //

dātavyaṃ bhaktiyuktāya guṇaśīlānvitāya ca
viṣṇubhaktāya śāntāya śraddhānuṣṭhānaśāline //

idaṃ samastāghavināśahetuḥ kāruṇyasaṃjñaṃ sukhamokṣadaṃ ca
aśeṣavāñchāphaladaṃ variṣṭhaṃ stotraṃ mayoktaṃ puruṣottamasya

ye taṃ susūkṣmaṃ vimalā murāriṃ dhyāyanti nityaṃ puruṣaṃ purāṇam
te muktibhājaḥ praviśanti viṣṇuṃ mantrair yathājyaṃ hutam adhvarāgnau

ekaḥ sa devo bhavaduḥkhahantā paraḥ pareṣāṃ na tato 'sti cānyat
draṣṭā sa pātā sa tu nāśakartā viṣṇuḥ samastākhilasārabhūtaḥ

kiṃ vidyayā kiṃ svaguṇaiś ca teṣāṃ yajñaiś ca dānaiś ca tapobhir ugraiḥ
yeṣāṃ na bhaktir bhavatīha kṛṣṇe jagadgurau mokṣasukhaprade ca

loke sa dhanyaḥ sa śuciḥ sa vidvān makhais tapobhiḥ sa guṇair variṣṭhaḥ
jñātā sa dātā sa tu satyavaktā yasyāsti bhaktiḥ puruṣottamākhye