Brahma Purana · Chapter 48

brūhi no devadeveśa yat pṛcchāmaḥ purātanam
yathā tāḥ pratimāḥ pūrvam indradyumnena nirmitāḥ //

kena caiva prakāreṇa tuṣṭas tasmai sa mādhavaḥ
tat sarvaṃ vada cāsmākaṃ paraṃ kautūhalaṃ hi naḥ //

śṛṇudhvaṃ muniśārdūlāḥ purāṇaṃ vedasaṃmitam
kathayāmi purā vṛttaṃ pratimānāṃ ca saṃbhavam //

pravṛtte ca mahāyajñe prāsāde caiva nirmite
cintā tasya babhūvātha pratimārtham aharniśam //

na vedmi kena deveśaṃ sarveśaṃ lokapāvanam
sargasthityantakartāraṃ paśyāmi puruṣottamam //

cintāviṣṭas tv abhūd rājā śete rātrau divāpi na
na bhuṅkte vividhān bhogān na ca snānaṃ prasādhanam //

naiva vādyena gandhena gāyanair varṇakair api
na gajair madayuktaiś ca na cānekair hayānvitaiḥ //

nendranīlair mahānīlaiḥ padmarāgamayair na ca
suvarṇarajatādyaiś ca vajrasphaṭikasaṃyutaiḥ //

bahurāgārthakāmair vā na vanyair antarikṣagaiḥ
babhūva tasya nṛpater manasas tuṣṭivardhanam //

śailamṛddārujāteṣu praśastaṃ kiṃ mahītale
viṣṇupratimāyogyaṃ ca sarvalakṣaṇalakṣitam //

etair eva trayāṇāṃ tu dayitaṃ syāt surārcitam
sthāpite prītim abhyeti iti cintāparo 'bhavat //

pañcarātravidhānena saṃpūjya puruṣottamam
cintāviṣṭo mahīpālaḥ saṃstotum upacakrame //