Brahma Purana · Chapter 46

śrotum icchāmahe deva kathāśeṣaṃ mahīpateḥ
tasmin kṣetravare gatvā kiṃ cakāra narādhipaḥ //

śṛṇudhvaṃ muniśārdūlāḥ pravakṣyāmi samāsataḥ
kṣetrasaṃdarśanaṃ caiva kṛtyaṃ tasya ca bhūpateḥ //

gatvā tatra mahīpālaḥ kṣetre trailokyaviśrute
dadarśa ramaṇīyāni sthānāni saritas tathā //

nadī tatra mahāpuṇyā vindhyapādavinirgatā
svittropaleti vikhyātā sarvapāpaharā śivā //

gaṅgātulyā mahāsrotā dakṣiṇārṇavagāminī
mahānadīti nāmnā sā puṇyatoyā saridvarā //

dakṣiṇasyodadher garbhaṃ gatāvartātiśobhitā
ubhayos taṭayor yasyā grāmāś ca nagarāṇi ca //

dṛśyante muniśārdūlāḥ susasyāḥ sumanoharāḥ
hṛṣṭapuṣṭajanākīrṇā vastrālaṃkārabhūṣitāḥ //

brāhmaṇāḥ kṣatriyā vaiśyāḥ śūdrās tatra pṛthak pṛthak
svadharmaniratāḥ śāntā dṛśyante śubhalakṣaṇāḥ //

tāmbūlapūrṇavadanā mālādāmavibhūṣitāḥ
vedapūrṇamukhā viprāḥ saṣaḍaṅgapadakramāḥ //

agnihotraratāḥ kecit kecid aupāsanakriyāḥ
sarvaśāstrārthakuśalā yajvāno bhūridakṣiṇāḥ //

catvāre rājamārgeṣu vaneṣūpavaneṣu ca
sabhāmaṇḍalaharmyeṣu devatāyataneṣu ca //

itihāsapurāṇāni vedāḥ sāṅgāḥ sulakṣaṇāḥ
kāvyaśāstrakathās tatra śrūyante ca mahājanaiḥ //

striyas taddeśavāsinyo rūpayauvanagarvitāḥ
saṃpūrṇalakṣaṇopetā vistīrṇaśroṇimaṇḍalāḥ //

saroruhamukhāḥ śyāmāḥ śaraccandranibhānanāḥ
pīnonnatastanāḥ sarvāḥ samṛddhyā cārudarśanāḥ //

sauvarṇavalayākrāntā divyair vastrair alaṃkṛtāḥ
kadalīgarbhasaṃkāśāḥ padmakiñjalkasaprabhāḥ //

bimbādharapuṭāḥ kāntāḥ karṇāntāyatalocanāḥ
sumukhāś cārukeśāś ca hāvabhāvāvanāmitāḥ //

kāścit padmapalāśākṣyaḥ kāścid indīvarekṣaṇāḥ
vidyudvispaṣṭadaśanās tanvaṅgyaś ca tathāparāḥ //

kuṭilālakasaṃyuktāḥ sīmantena virājitāḥ
grīvābharaṇasaṃyuktā mālyadāmavibhūṣitāḥ //

kuṇḍalai ratnasaṃyuktaiḥ karṇapūrair manoharaiḥ
devayoṣitpratīkāśā dṛśyante śubhalakṣaṇāḥ //

divyagītavarair dhanyaiḥ krīḍamānā varāṅganāḥ
vīṇāveṇumṛdaṅgaiś ca paṇavaiś caiva gomukhaiḥ //

śaṅkhadundubhinirghoṣair nānāvādyair manoharaiḥ
krīḍantyas tāḥ sadā hṛṣṭā vilāsinyaḥ parasparam //

evamādi tathāneka gītavādyaviśāradāḥ
divā rātrau samāyuktāḥ kāmonmattā varāṅganāḥ //

bhikṣuvaikhānasaiḥ siddhaiḥ snātakair brahmacāribhiḥ
mantrasiddhais tapaḥsiddhair yajñasiddhair niṣevitam //

ity evaṃ dadṛśe rājā kṣetraṃ paramaśobhanam
atraivārādhayiṣyāmi bhagavantaṃ sanātanam //

jagadguruṃ paraṃ devaṃ paraṃ pāraṃ paraṃ padam
sarveśvareśvaraṃ viṣṇum anantam aparājitam //

idaṃ tanmānasaṃ tīrthaṃ jñātaṃ me puruṣottamam
kalpavṛkṣo mahākāyo nyagrodho yatra tiṣṭhati //

pratimā cendranīlākhyā svayaṃ devena gopitā
na cātra dṛśyate cānyā pratimā vaiṣṇavī śubhā //

tathā yatnaṃ kariṣyāmi yathā devo jagatpatiḥ
pratyakṣaṃ mama cābhyeti viṣṇuḥ satyaparākramaḥ //

yajñair dānais tapobhiś ca homair dhyānais tathārcanaiḥ
upavāsaiś ca vidhivac careyaṃ vratam uttamam //

ananyamanasā caiva tanmanā nānyamānasaḥ
viṣṇvāyatanavinyāse prārambhaṃ ca karomy aham //