Brahma Purana · Chapter 42

viraje virajā mātā brahmāṇī saṃpratiṣṭhitā
yasyāḥ saṃdarśanān martyaḥ punāty āsaptamaṃ kulam //

sakṛd dṛṣṭvā tu tāṃ devīṃ bhaktyāpūjya praṇamya ca
naraḥ svavaṃśam uddhṛtya mama lokaṃ sa gacchati //

anyāś ca tatra tiṣṭhanti viraje lokamātaraḥ
sarvapāpaharā devyo varadā bhaktivatsalāḥ //

āste vaitaraṇī tatra sarvapāpaharā nadī
yasyāṃ snātvā naraśreṣṭhaḥ sarvapāpaiḥ pramucyate //

āste svayaṃbhūs tatraiva kroḍarūpī hariḥ svayam
dṛṣṭvā praṇamya taṃ bhaktyā paraṃ viṣṇuṃ vrajanti te //

kāpile gograhe some tīrthe cālābusaṃjñite
mṛtyuṃjaye kroḍatīrthe vāsuke siddhakeśvare //

tīrtheṣv eteṣu matimān viraje saṃyatendriyaḥ
gatvāṣṭatīrthaṃ vidhivat snātvā devān praṇamya ca //

sarvapāpavinirmukto vimānavaram āsthitaḥ
upagīyamāno gandharvair mama loke mahīyate //

viraje yo mama kṣetre piṇḍadānaṃ karoti vai
sa karoty akṣayāṃ tṛptiṃ pitṝṇāṃ nātra saṃśayaḥ //

mama kṣetre muniśreṣṭhā viraje ye kalevaram
parityajanti puruṣās te mokṣaṃ prāpnuvanti vai //

snātvā yaḥ sāgare martyo dṛṣṭvā ca kapilaṃ harim
paśyed devīṃ ca vārāhīṃ sa yāti tridaśālayam //

santi cānyāni tīrthāni puṇyāny āyatanāni ca
tatkāle tu muniśreṣṭhā veditavyāni tāni vai //

samudrasyottare tīre tasmin deśe dvijottamāḥ
āste guhyaṃ paraṃ kṣetraṃ muktidaṃ pāpanāśanam //

sarvatra vālukākīrṇaṃ pavitraṃ sarvakāmadam
daśayojanavistīrṇaṃ kṣetraṃ paramadurlabham //

aśokārjunapuṃnāgair bakulaiḥ saraladrumaiḥ
panasair nārikelaiś ca śālais tālaiḥ kapitthakaiḥ //

campakaiḥ karṇikāraiś ca cūtabilvaiḥ sapāṭalaiḥ
kadambaiḥ kovidāraiś ca lakucair nāgakesaraiḥ //

prācīnāmalakair lodhrair nāraṅgair dhavakhādiraiḥ
sarjabhūrjāśvakarṇaiś ca tamālair devadārubhiḥ //

mandāraiḥ pārijātaiś ca nyagrodhāgurucandanaiḥ
kharjūrāmrātakaiḥ siddhair mucukundaiḥ sakiṃśukaiḥ //

aśvatthaiḥ saptaparṇaiś ca madhudhāraśubhāñjanaiḥ
śiṃśapāmalakair nīpair nimbatinduvibhītakaiḥ //

sarvartuphalagandhāḍhyaiḥ sarvartukusumojjvalaiḥ
manohlādakaraiḥ śubhrair nānāvihaganāditaiḥ //

śrotraramyaiḥ sumadhurair balanirmadaneritaiḥ
manasaḥ prītijanakaiḥ śabdaiḥ khagamukheritaiḥ //

cakoraiḥ śatapattraiś ca bhṛṅgarājais tathā śukaiḥ
kokilaiḥ kalaviṅkaiś ca hārītair jīvajīvakaiḥ //

priyaputraiś cātakaiś ca tathānyair madhurasvaraiḥ
śrotraramyaiḥ priyakaraiḥ kūjadbhiś cārvadhiṣṭhitaiḥ //

ketakīvanakhaṇḍaiś ca atimuktaiḥ sakubjakaiḥ
mālatīkundabāṇaiś ca karavīraiḥ sitetaraiḥ //

jambīrakaruṇāṅkolair dāḍimair bījapūrakaiḥ
mātuluṅgaiḥ pūgaphalair hintālaiḥ kadalīvanaiḥ //

anyaiś ca vividhair vṛkṣaiḥ puṣpaiś cānyair manoharaiḥ
latāvitānagulmaiś ca vividhaiś ca jalāśayaiḥ //

dīrghikābhis taḍāgaiś ca puṣkariṇībhiś ca vāpibhiḥ
nānājalāśayaiḥ puṇyaiḥ padminīkhaṇḍamaṇḍitaiḥ //

sarāṃsi ca manojñāni prasannasalilāni ca
kumudaiḥ puṇḍarīkaiś ca tathā nīlotpalaiḥ śubhaiḥ //

kahlāraiḥ kamalaiś cāpi ācitāni samantataḥ
kādambaiś cakravākaiś ca tathaiva jalakukkuṭaiḥ //

kāraṇḍavaiḥ plavair haṃsaiḥ kūrmair matsyaiś ca madgubhiḥ
dātyūhasārasākīrṇaiḥ koyaṣṭibakaśobhitaiḥ //

etaiś cānyaiś ca kūjadbhiḥ samantāj jalacāribhiḥ
khagair jalacaraiś cānyaiḥ kusumaiś ca jalodbhavaiḥ //

evaṃ nānāvidhair vṛkṣaiḥ puṣpaiḥ sthalajalodbhavaiḥ
brahmacārigṛhasthaiś ca vānaprasthaiś ca bhikṣubhiḥ //

svadharmaniratair varṇais tathānyaiḥ samalaṃkṛtam
hṛṣṭapuṣṭajanākīrṇaṃ naranārīsamākulam //

aśeṣavidyānilayaṃ sarvadharmaguṇākaram
evaṃ sarvaguṇopetaṃ kṣetraṃ paramadurlabham //

āste tatra muniśreṣṭhā vikhyātaḥ puruṣottamaḥ
yāvad utkalamaryādā dik krameṇa prakīrtitā //

tāvat kṛṣṇaprasādena deśaḥ puṇyatamo hi saḥ
yatra tiṣṭhati viśvātmā deśe sa puruṣottamaḥ //

jagadvyāpī jagannāthas tatra sarvaṃ pratiṣṭhitam
ahaṃ rudraś ca śakraś ca devāś cāgnipurogamāḥ //

nivasāmo muniśreṣṭhās tasmin deśe sadā vayam
gandharvāpsarasaḥ sarvāḥ pitaro devamānuṣāḥ //

yakṣā vidyādharāḥ siddhā munayaḥ saṃśitavratāḥ
ṛṣayo vālakhilyāś ca kaśyapādyāḥ prajeśvarāḥ //

suparṇāḥ kiṃnarā nāgās tathānye svargavāsinaḥ
sāṅgāś ca caturo vedāḥ śāstrāṇi vividhāni ca //

itihāsapurāṇāni yajñāś ca varadakṣiṇāḥ
nadyaś ca vividhāḥ puṇyās tīrthāny āyatanāni ca //

sāgarāś ca tathā śailās tasmin deśe vyavasthitāḥ
evaṃ puṇyatame deśe devarṣipitṛsevite //

sarvopabhogasahite vāsaḥ kasya na rocate
śreṣṭhatvaṃ kasya deśasya kiṃ cānyad adhikaṃ tataḥ //

āste yatra svayaṃ devo muktidaḥ puruṣottamaḥ
dhanyās te vibudhaprakhyā ye vasanty utkale narāḥ //

tīrtharājajale snātvā paśyanti puruṣottamam
svarge vasanti te martyā na te yānti yamālaye //

ye vasanty utkale kṣetre puṇye śrīpuruṣottame
saphalaṃ jīvitaṃ teṣām utkalānāṃ sumedhasām //

ye paśyanti suraśreṣṭhaṃ prasannāyatalocanam
cārubhrūkeśamukuṭaṃ cārukarṇāvataṃsakam //

cārusmitaṃ cārudantaṃ cārukuṇḍalamaṇḍitam
sunāsaṃ sukapolaṃ ca sulalāṭaṃ sulakṣaṇam //

trailokyānandajananaṃ kṛṣṇasya mukhapaṅkajam //