Brahma Purana · Chapter 37

atha vṛtte vivāhe tu bhavasyāmitatejasaḥ
praharṣam atulaṃ gatvā devāḥ śakrapurogamāḥ
tuṣṭuvur vāgbhir ādyābhiḥ praṇemus te maheśvaram //

namaḥ parvataliṅgāya parvateśāya vai namaḥ
namaḥ pavanavegāya virūpāyājitāya ca
namaḥ kleśavināśāya dātre ca śubhasaṃpadām //

namo nīlaśikhaṇḍāya ambikāpataye namaḥ
namaḥ pavanarūpāya śatarūpāya vai namaḥ //

namo bhairavarūpāya virūpanayanāya ca
namaḥ sahasranetrāya sahasracaraṇāya ca //

namo devavayasyāya vedāṅgāya namo namaḥ
viṣṭambhanāya śakrasya bāhvor vedāṅkurāya ca //

carācarādhipataye śamanāya namo namaḥ
salilāśayaliṅgāya yugāntāya namo namaḥ //

namaḥ kapālamālāya kapālasūtradhāriṇe
namaḥ kapālahastāya daṇḍine gadine namaḥ //

namas trailokyanāthāya paśulokaratāya ca
namaḥ khaṭvāṅgahastāya pramathārtiharāya ca //

namo yajñaśirohantre kṛṣṇakeśāpahāriṇe
bhaganetranipātāya pūṣṇo dantaharāya ca //

namaḥ pinākaśūlāsi khaḍgamudgaradhāriṇe
namo 'stu kālakālāya tṛtīyanayanāya ca //

antakāntakṛte caiva namaḥ parvatavāsine
suvarṇaretase caiva namaḥ kuṇḍaladhāriṇe //

daityānāṃ yoganāśāya yogināṃ gurave namaḥ
śaśāṅkādityanetrāya lalāṭanayanāya ca //

namaḥ śmaśānarataye śmaśānavaradāya ca
namo daivatanāthāya tryambakāya namo namaḥ //

gṛhasthasādhave nityaṃ jaṭile brahmacāriṇe
namo muṇḍārdhamuṇḍāya paśūnāṃ pataye namaḥ //

salile tapyamānāya yogaiśvaryapradāya ca
namaḥ śāntāya dāntāya pralayotpattikāriṇe //

namo 'nugrahakartre ca sthitikartre namo namaḥ
namo rudrāya vasava ādityāyāśvine namaḥ //

namaḥ pitre 'tha sāṃkhyāya viśvedevāya vai namaḥ
namaḥ śarvāya ugrāya śivāya varadāya ca //

namo bhīmāya senānye paśūnāṃ pataye namaḥ
śucaye vairihānāya sadyojātāya vai namaḥ //

mahādevāya citrāya vicitrāya ca vai namaḥ
pradhānāyāprameyāya kāryāya kāraṇāya ca //

puruṣāya namas te 'stu puruṣecchākarāya ca
namaḥ puruṣasaṃyoga pradhānaguṇakāriṇe //

pravartakāya prakṛteḥ puruṣasya ca sarvaśaḥ
kṛtākṛtasya satkartre phalasaṃyogadāya ca //

kālajñāya ca sarveṣāṃ namo niyamakāriṇe
namo vaiṣamyakartre ca guṇānāṃ vṛttidāya ca //

namas te devadeveśa namas te bhūtabhāvana
śiva saumyamukho draṣṭuṃ bhava saumyo hi naḥ prabho //

evaṃ sa bhagavān devo jagatpatir umāpatiḥ
stūyamānaḥ suraiḥ sarvair amarān idam abravīt //

draṣṭuṃ sukhaś ca saumyaś ca devānām asmi bhoḥ surāḥ
varaṃ varayata kṣipraṃ dātāsmi tam asaṃśayam //

tatas te praṇatāḥ sarve surā ūcus trilocanam //

tavaiva bhagavan haste vara eṣo 'vatiṣṭhatām
yadā kāryaṃ tadā nas tvaṃ dāsyase varam īpsitam //

evam astv iti tān uktvā visṛjya ca surān haraḥ
lokāṃś ca pramathaiḥ sārdhaṃ viveśa bhavanaṃ svakam //

yas tu harotsavam adbhutam enaṃ gāyati daivataviprasamakṣam
so 'pratirūpagaṇeśasamāno dehaviparyayam etya sukhī syāt

vipravaryāḥ stavaṃ hīmaṃ śṛṇuyād vā paṭhec ca yaḥ
sa sarvalokago devaiḥ pūjyate 'mararāḍ iva //