Brahma Purana · Chapter 33

bhūyo 'pi kathayāsmākaṃ kathāṃ sūryasamāśritām
na tṛptim adhigacchāmaḥ śṛṇvantas tāṃ kathāṃ śubhām //

yo 'yaṃ dīpto mahātejā vahnirāśisamaprabhaḥ
etad veditum icchāmaḥ prabhāvo 'sya kutaḥ prabho //

tamobhūteṣu lokeṣu naṣṭe sthāvarajaṅgame
prakṛter guṇahetus tu pūrvaṃ buddhir ajāyata //

ahaṃkāras tato jāto mahābhūtapravartakaḥ
vāyvagnir āpaḥ khaṃ bhūmis tatas tv aṇḍam ajāyata //

tasminn aṇḍe tv ime lokāḥ sapta caiva pratiṣṭhitāḥ
pṛthivī saptabhir dvīpaiḥ samudraiś caiva saptabhiḥ //

tatraivāvasthito hy āsīd ahaṃ viṣṇur maheśvaraḥ
vimūḍhās tāmasāḥ sarve pradhyāyanti tam īśvaram //

tato vai sumahātejāḥ prādurbhūtas tamonudaḥ
dhyānayogena cāsmābhir vijñātaḥ savitā tadā //

jñātvā ca paramātmānaṃ sarva eva pṛthak pṛthak
divyābhiḥ stutibhir devaḥ stuto 'smābhis tadeśvaraḥ //

ādidevo 'si devānām aiśvaryāc ca tvam īśvaraḥ
ādikartāsi bhūtānāṃ devadevo divākaraḥ //

jīvanaḥ sarvabhūtānāṃ devagandharvarakṣasām
munikiṃnarasiddhānāṃ tathaivoragapakṣiṇām //

tvaṃ brahmā tvaṃ mahādevas tvaṃ viṣṇus tvaṃ prajāpatiḥ
vāyur indraś ca somaś ca vivasvān varuṇas tathā //

tvaṃ kālaḥ sṛṣṭikartā ca hartā bhartā tathā prabhuḥ
saritaḥ sāgarāḥ śailā vidyudindradhanūṃṣi ca //

pralayaḥ prabhavaś caiva vyaktāvyaktaḥ sanātanaḥ
īśvarāt parato vidyā vidyāyāḥ parataḥ śivaḥ //

śivāt parataro devas tvam eva parameśvaraḥ
sarvataḥpāṇipādāntaḥ sarvatokṣiśiromukhaḥ //

sahasrāṃśuḥ sahasrāsyaḥ sahasracaraṇekṣaṇaḥ
bhūtādir bhūr bhuvaḥ svaś ca mahaḥ satyaṃ tapo janaḥ //

pradīptaṃ dīpanaṃ divyaṃ sarvalokaprakāśakam
durnirīkṣaṃ surendrāṇāṃ yad rūpaṃ tasya te namaḥ //

surasiddhagaṇair juṣṭaṃ bhṛgvatripulahādibhiḥ
stutaṃ paramam avyaktaṃ yad rūpaṃ tasya te namaḥ //

vedyaṃ vedavidāṃ nityaṃ sarvajñānasamanvitam
sarvadevātidevasya yad rūpaṃ tasya te namaḥ //

viśvakṛd viśvabhūtaṃ ca vaiśvānarasurārcitam
viśvasthitam acintyaṃ ca yad rūpaṃ tasya te namaḥ //

paraṃ yajñāt paraṃ vedāt paraṃ lokāt paraṃ divaḥ
paramātmety abhikhyātaṃ yad rūpaṃ tasya te namaḥ //

avijñeyam anālakṣyam adhyānagatam avyayam
anādinidhanaṃ caiva yad rūpaṃ tasya te namaḥ //

namo namaḥ kāraṇakāraṇāya namo namaḥ pāpavimocanāya
namo namas te ditijārdanāya namo namo rogavimocanāya

namo namaḥ sarvavarapradāya namo namaḥ sarvasukhapradāya
namo namaḥ sarvadhanapradāya namo namaḥ sarvamatipradāya

stutaḥ sa bhagavān evaṃ taijasaṃ rūpam āsthitaḥ
uvāca vācā kalyāṇyā ko varo vaḥ pradīyatām //

tavātitaijasaṃ rūpaṃ na kaścit soḍhum utsahet
sahanīyaṃ tad bhavatu hitāya jagataḥ prabho //

evam astv iti so 'py uktvā bhagavān ādikṛt prabhuḥ
lokānāṃ kāryasiddhyarthaṃ gharmavarṣahimapradaḥ //

tataḥ sāṃkhyāś ca yogāś ca ye cānye mokṣakāṅkṣiṇaḥ
dhyāyanti dhyāyino devaṃ hṛdayasthaṃ divākaram //

sarvalakṣaṇahīno 'pi yukto vā sarvapātakaiḥ
sarvaṃ ca tarate pāpaṃ devam arkaṃ samāśritaḥ //

agnihotraṃ ca vedāś ca yajñāś ca bahudakṣiṇāḥ
bhānor bhaktinamaskāra kalāṃ nārhanti ṣoḍaśīm //

tīrthānāṃ paramaṃ tīrthaṃ maṅgalānāṃ ca maṅgalam
pavitraṃ ca pavitrāṇāṃ prapadyante divākaram //

śakrādyaiḥ saṃstutaṃ devaṃ ye namasyanti bhāskaram
sarvakilbiṣanirmuktāḥ sūryalokaṃ vrajanti te //

cirāt prabhṛti no brahmañ śrotum icchā pravartate
nāmnām aṣṭaśataṃ brūhi yat tvayoktaṃ purā raveḥ //

aṣṭottaraśataṃ nāmnāṃ śṛṇudhvaṃ gadato mama
bhāskarasya paraṃ guhyaṃ svargamokṣapradaṃ dvijāḥ //

oṃ sūryo 'ryamā bhagas tvaṣṭā pūṣārkaḥ savitā raviḥ
gabhastimān ajaḥ kālo mṛtyur dhātā prabhākaraḥ //

pṛthivy āpaś ca tejaś ca khaṃ vāyuś ca parāyaṇam
somo bṛhaspatiḥ śukro budho 'ṅgāraka eva ca //

indro vivasvān dīptāṃśuḥ śuciḥ śauriḥ śanaiścaraḥ
brahmā viṣṇuś ca rudraś ca skando vaiśravaṇo yamaḥ //

vaidyuto jāṭharaś cāgnir aindhanas tejasāṃ patiḥ
dharmadhvajo vedakartā vedāṅgo vedavāhanaḥ //

kṛtaṃ tretā dvāparaś ca kaliḥ sarvāmarāśrayaḥ
kalākāṣṭhāmuhūrtāś ca kṣapā yāmās tathā kṣaṇāḥ //

saṃvatsarakaro 'śvatthaḥ kālacakro vibhāvasuḥ
puruṣaḥ śāśvato yogī vyaktāvyaktaḥ sanātanaḥ //

kālādhyakṣaḥ prajādhyakṣo viśvakarmā tamonudaḥ
varuṇaḥ sāgaro 'ṃśaś ca jīmūto jivano 'rihā //

bhūtāśrayo bhūtapatiḥ sarvalokanamaskṛtaḥ
sraṣṭā saṃvartako vahniḥ sarvasyādir alolupaḥ //

anantaḥ kapilo bhānuḥ kāmadaḥ sarvatomukhaḥ
jayo viśālo varadaḥ sarvabhūtaniṣevitaḥ //

manaḥ suparṇo bhūtādiḥ śīghragaḥ prāṇadhāraṇaḥ
dhanvantarir dhūmaketur ādidevo 'diteḥ sutaḥ //

dvādaśātmā ravir dakṣaḥ pitā mātā pitāmahaḥ
svargadvāraṃ prajādvāraṃ mokṣadvāraṃ triviṣṭapam //

dehakartā praśāntātmā viśvātmā viśvatomukhaḥ
carācarātmā sūkṣmātmā maitreyaḥ karuṇānvitaḥ //

etad vai kīrtanīyasya sūryasyāmitatejasaḥ
nāmnām aṣṭaśataṃ ramyaṃ mayā proktaṃ dvijottamāḥ //

suragaṇapitṛyakṣasevitaṃ hy asuraniśākarasiddhavanditam
varakanakahutāśanaprabhaṃ praṇipatito 'smi hitāya bhāskaram

sūryodaye yaḥ susamāhitaḥ paṭhet sa putradārān dhanaratnasaṃcayān
labheta jātismaratāṃ naraḥ sa tu smṛtiṃ ca medhāṃ ca sa vindate parām

imaṃ stavaṃ devavarasya yo naraḥ prakīrtayec chuddhamanāḥ samāhitaḥ
vimucyate śokadavāgnisāgarāl labheta kāmān manasā yathepsitān