Brahma Purana · Chapter 29

śruto 'smābhiḥ suraśreṣṭha bhavatā yad udāhṛtam
bhāskarasya paraṃ kṣetraṃ bhuktimuktiphalapradam //

na tṛptim adhigacchāmaḥ śṛṇvantaḥ sukhadāṃ kathām
tava vaktrodbhavāṃ puṇyām ādityasyāghanāśinīm //

ataḥ paraṃ suraśreṣṭha brūhi no vadatāṃ vara
devapūjāphalaṃ yac ca yac ca dānaphalaṃ prabho //

praṇipāte namaskāre tathā caiva pradakṣiṇe
dīpadhūpapradāne ca saṃmārjanavidhau ca yat //

upavāse ca yat puṇyaṃ yat puṇyaṃ naktabhojane
arghaś ca kīdṛśaḥ proktaḥ kutra vā saṃpradīyate //

kathaṃ ca kriyate bhaktiḥ kathaṃ devaḥ prasīdati
etat sarvaṃ suraśreṣṭha śrotum icchāmahe vayam //

arghyaṃ pūjādikaṃ sarvaṃ bhāskarasya dvijottamāḥ
bhaktiṃ śraddhāṃ samādhiṃ ca kathyamānaṃ nibodhata //

manasā bhāvanā bhaktir iṣṭā śraddhā ca kīrtyate
dhyānaṃ samādhir ity uktaṃ śṛṇudhvaṃ susamāhitāḥ //

tatkathāṃ śrāvayed yas tu tadbhaktān pūjayīta vā
agniśuśrūṣakaś caiva sa vai bhaktaḥ sanātanaḥ //

taccittas tanmanāś caiva devapūjārataḥ sadā
tatkarmakṛd bhaved yas tu sa vai bhaktaḥ sanātanaḥ //

devārthe kriyamāṇāni yaḥ karmāṇy anumanyate
kīrtanād vā paro viprāḥ sa vai bhaktataro naraḥ //

nābhyasūyeta tadbhaktān na nindyāc cānyadevatām
ādityavratacārī ca sa vai bhaktataro naraḥ //

gacchaṃs tiṣṭhan svapañ jighrann unmiṣan nimiṣann api
yaḥ smared bhāskaraṃ nityaṃ sa vai bhaktataro naraḥ //

evaṃvidhā tv iyaṃ bhaktiḥ sadā kāryā vijānatā
bhaktyā samādhinā caiva stavena manasā tathā //

kriyate niyamo yas tu dānaṃ viprāya dīyate
pratigṛhṇanti taṃ devā manuṣyāḥ pitaras tathā //

pattraṃ puṣpaṃ phalaṃ toyaṃ yad bhaktyā samupāhṛtam
pratigṛhṇanti tad devā nāstikān varjayanti ca //

bhāvaśuddhiḥ prayoktavyā niyamācārasaṃyutā
bhāvaśuddhyā kriyate yat tat sarvaṃ saphalaṃ bhavet //

stutijapyopahāreṇa pūjayāpi vivasvataḥ
upavāsena bhaktyā vai sarvapāpaiḥ pramucyate //

praṇidhāya śiro bhūmyāṃ namaskāraṃ karoti yaḥ
tatkṣaṇāt sarvapāpebhyo mucyate nātra saṃśayaḥ //

bhaktiyukto naro yo 'sau raveḥ kuryāt pradakṣiṇām
pradakṣiṇīkṛtā tena saptadvīpā vasuṃdharā //

sūryaṃ manasi yaḥ kṛtvā kuryād vyomapradakṣiṇām
pradakṣiṇīkṛtās tena sarve devā bhavanti hi //

ekāhāro naro bhūtvā ṣaṣṭhyāṃ yo 'rcayate ravim
niyamavratacārī ca bhaved bhaktisamanvitaḥ //

saptamyāṃ vā mahābhāgāḥ so 'śvamedhaphalaṃ labhet
ahorātropavāsena pūjayed yas tu bhāskaram //

saptamyām athavā ṣaṣṭhyāṃ sa yāti paramāṃ gatim
kṛṣṇapakṣasya saptamyāṃ sopavāso jitendriyaḥ //

sarvaratnopahāreṇa pūjayed yas tu bhāskaram
padmaprabheṇa yānena sūryalokaṃ sa gacchati //

śuklapakṣasya saptamyām upavāsaparo naraḥ
sarvaśuklopahāreṇa pūjayed yas tu bhāskaram //

sarvapāpavinirmuktaḥ sūryalokaṃ sa gacchati
arkasaṃpuṭasaṃyuktam udakaṃ prasṛtaṃ pibet //

kramavṛddhyā caturviṃśam ekaikaṃ kṣapayet punaḥ
dvābhyāṃ saṃvatsarābhyāṃ tu samāptaniyamo bhavet //

sarvakāmapradā hy eṣā praśastā hy arkasaptamī
śuklapakṣasya saptamyāṃ yadādityadinaṃ bhavet //

saptamī vijayā nāma tatra dattaṃ mahat phalam
snānaṃ dānaṃ tapo homa upavāsas tathaiva ca //

sarvaṃ vijayasaptamyāṃ mahāpātakanāśanam
ye cādityadine prāpte śrāddhaṃ kurvanti mānavāḥ //

yajanti ca mahāśvetaṃ te labhante yathepsitam
yeṣāṃ dharmyāḥ kriyāḥ sarvāḥ sadaivoddiśya bhāskaram //

na kule jāyate teṣāṃ daridro vyādhito 'pi vā
śvetayā raktayā vāpi pītamṛttikayāpi vā //

upalepanakartā tu cintitaṃ labhate phalam
citrabhānuṃ vicitrais tu kusumaiś ca sugandhibhiḥ //

pūjayet sopavāso yaḥ sa kāmān īpsitāṃl labhet
ghṛtena dīpaṃ prajvālya tilatailena vā punaḥ //

ādityaṃ pūjayed yas tu cakṣuṣā na sa hīyate
dīpadātā naro nityaṃ jñānadīpena dīpyate //

tilāḥ pavitraṃ tailaṃ vā tilagodānam uttamam
agnikārye ca dīpe ca mahāpātakanāśanam //

dīpaṃ dadāti yo nityaṃ devatāyataneṣu ca
catuṣpatheṣu rathyāsu rūpavān subhago bhavet //

havirbhiḥ prathamaḥ kalpo dvitīyaś cauṣadhīrasaiḥ
vasāmedosthiniryāsair na tu deyaḥ kathaṃcana //

bhaved ūrdhvagatir dīpo na kadācid adhogatiḥ
dātā dīpyati cāpy evaṃ na tiryaggatim āpnuyāt //

jvalamānaṃ sadā dīpaṃ na haren nāpi nāśayet
dīpahartā naro bandhaṃ nāśaṃ krodhaṃ tamo vrajet //

dīpadātā svargaloke dīpamāleva rājate
yaḥ samālabhate nityaṃ kuṅkumāgurucandanaiḥ //

saṃpadyate naraḥ pretya dhanena yaśasā śriyā
raktacandanasaṃmiśrai raktapuṣpaiḥ śucir naraḥ //

udaye 'rghyaṃ sadā dattvā siddhiṃ saṃvatsarāl labhet
udayāt parivarteta yāvad astamane sthitaḥ //

japann abhimukhaḥ kiṃcin mantraṃ stotram athāpi vā
ādityavratam etat tu mahāpātakanāśanam //

arghyeṇa sahitaṃ caiva sarve sāṅgaṃ pradāpayet
udaye śraddhayā yuktaḥ sarvapāpaiḥ pramucyate //

suvarṇadhenuanaḍvāha vasudhāvastrasaṃyutam
arghyapradātā labhate saptajanmānugaṃ phalam //

agnau toye 'ntarikṣe ca śucau bhūmyāṃ tathaiva ca
pratimāyāṃ tathā piṇḍyāṃ deyam arghyaṃ prayatnataḥ //

nāpasavyaṃ na savyaṃ ca dadyād abhimukhaḥ sadā
saghṛtaṃ guggulaṃ vāpi raver bhaktisamanvitaḥ //

tatkṣaṇāt sarvapāpebhyo mucyate nātra saṃśayaḥ
śrīvāsaṃ caturasraṃ ca devadāruṃ tathaiva ca //

karpūrāgarudhūpāni dattvā vai svargagāminaḥ
ayane tūttare sūryam athavā dakṣiṇāyane //

pūjayitvā viśeṣeṇa sarvapāpaiḥ pramucyate
viṣuveṣūparāgeṣu ṣaḍaśītimukheṣu ca //

pūjayitvā viśeṣeṇa sarvapāpaiḥ pramucyate
evaṃ velāsu sarvāsu sarvakālaṃ ca mānavaḥ //

bhaktyā pūjayate yo 'rkaṃ so 'rkaloke mahīyate
kṛsaraiḥ pāyasaiḥ pūpaiḥ phalamūlaghṛtaudanaiḥ //

baliṃ kṛtvā tu sūryāya sarvān kāmān avāpnuyāt
ghṛtena tarpaṇaṃ kṛtvā sarvasiddho bhaven naraḥ //

kṣīreṇa tarpaṇaṃ kṛtvā manas tāpair na yujyate
dadhnā tu tarpaṇaṃ kṛtvā kāryasiddhiṃ labhen naraḥ //

snānārtham āhared yas tu jalaṃ bhānoḥ samāhitaḥ
tīrtheṣu śucitāpannaḥ sa yāti paramāṃ gatim //

chattraṃ dhvajaṃ vitānaṃ vā patākāṃ cāmarāṇi ca
śraddhayā bhānave dattvā gatim iṣṭām avāpnuyāt //

yad yad dravyaṃ naro bhaktyā ādityāya prayacchati
tat tasya śatasāhasram utpādayati bhāskaraḥ //

mānasaṃ vācikaṃ vāpi kāyajaṃ yac ca duṣkṛtam
sarvaṃ sūryaprasādena tad aśeṣaṃ vyapohati //

ekāhenāpi yad bhānoḥ pūjāyāḥ prāpyate phalam
yathoktadakṣiṇair viprair na tat kratuśatair api //