Brahma Purana · Chapter 26

pṛthivyām uttamāṃ bhūmiṃ dharmakāmārthamokṣadām
tīrthānām uttamaṃ tīrthaṃ brūhi no vadatāṃ vara //

imaṃ praśnaṃ mama guruṃ papracchur munayaḥ purā
tam ahaṃ saṃpravakṣyāmi yat pṛcchadhvaṃ dvijottamāḥ //

svāśrame sumahāpuṇye nānāpuṣpopaśobhite
nānādrumalatākīrṇe nānāmṛgagaṇair yute //

puṃnāgaiḥ karṇikāraiś ca saralair devadārubhiḥ
śālais tālais tamālaiś ca panasair dhavakhādiraiḥ //

pāṭalāśokabakulaiḥ karavīraiḥ sacampakaiḥ
anyaiś ca vividhair vṛkṣair nānāpuṣpopaśobhitaiḥ //

kurukṣetre samāsīnaṃ vyāsaṃ matimatāṃ varam
mahābhāratakartāraṃ sarvaśāstraviśāradam //

adhyātmaniṣṭhaṃ sarvajñaṃ sarvabhūtahite ratam
purāṇāgamavaktāraṃ vedavedāṅgapāragam //

parāśarasutaṃ śāntaṃ padmapattrāyatekṣaṇam
draṣṭum abhyāyayuḥ prītyā munayaḥ saṃśitavratāḥ //

kaśyapo jamadagniś ca bharadvājo 'tha gautamaḥ
vasiṣṭho jaiminir dhaumyo mārkaṇḍeyo 'tha vālmikiḥ //

viśvāmitraḥ śatānando vātsyo gārgyo 'tha āsuriḥ
sumantur bhārgavo nāma kaṇvo medhātithir guruḥ //

māṇḍavyaś cyavano dhūmro hy asito devalas tathā
maudgalyas tṛṇayajñaś ca pippalādo 'kṛtavraṇaḥ //

saṃvartaḥ kauśiko raibhyo maitreyo haritas tathā
śāṇḍilyaś ca vibhāṇḍaś ca durvāsā lomaśas tathā //

nāradaḥ parvataś caiva vaiśaṃpāyanagālavau
bhāskariḥ pūraṇaḥ sūtaḥ pulastyaḥ kapilas tathā //

ulūkaḥ pulaho vāyur devasthānaś caturbhujaḥ
sanatkumāraḥ pailaś ca kṛṣṇaḥ kṛṣṇānubhautikaḥ //

etair munivaraiś cānyair vṛtaḥ satyavatīsutaḥ
rarāja sa muniḥ śrīmān nakṣatrair iva candramāḥ //

tān āgatān munīn sarvān pūjayām āsa vedavit
te 'pi taṃ pratipūjyaiva kathāṃ cakruḥ parasparam //

kathānte te muniśreṣṭhāḥ kṛṣṇaṃ satyavatīsutam
papracchuḥ saṃśayaṃ sarve tapovananivāsinaḥ //

mune vedāṃś ca śāstrāṇi purāṇāgamabhāratam
bhūtaṃ bhavyaṃ bhaviṣyaṃ ca sarvaṃ jānāsi vāṅmayam //

kaṣṭe 'smin duḥkhabahule niḥsāre bhavasāgare
rāgagrāhākule raudre viṣayodakasaṃplave //

indriyāvartakalile dṛṣṭormiśatasaṃkule
mohapaṅkāvile durge lobhagambhīradustare //

nimajjaj jagad ālokya nirālambam acetanam
pṛcchāmas tvāṃ mahābhāgaṃ brūhi no munisattama //

śreyaḥ kim atra saṃsāre bhairave lomaharṣaṇe
upadeśapradānena lokān uddhartum arhasi //

durlabhaṃ paramaṃ kṣetraṃ vaktum arhasi mokṣadam
pṛthivyāṃ karmabhūmiṃ ca śrotum icchāmahe vayam //

kṛtvā kila naraḥ samyak karma bhūmau yathoditam
prāpnoti paramāṃ siddhiṃ narakaṃ ca vikarmataḥ //

mokṣakṣetre tathā mokṣaṃ prāpnoti puruṣaḥ sudhīḥ
tasmād brūhi mahāprājña yat pṛṣṭo 'si dvijottama //

śrutvā tu vacanaṃ teṣāṃ munīnāṃ bhāvitātmanām
vyāsaḥ provāca bhagavān bhūtabhavyabhaviṣyavit //

śṛṇudhvaṃ munayaḥ sarve vakṣyāmi yadi pṛcchatha
yaḥ saṃvādo 'bhavat pūrvam ṛṣīṇāṃ brahmaṇā saha //

merupṛṣṭhe tu vistīrṇe nānāratnavibhūṣite
nānādrumalatākīrṇe nānāpuṣpopaśobhite //

nānāpakṣirute ramye nānāprasavanākule
nānāsattvasamākīrṇe nānāścaryasamanvite //

nānāvarṇaśilākīrṇe nānādhātuvibhūṣite
nānāmunijanākīrṇe nānāśramasamanvite //

tatrāsīnaṃ jagannāthaṃ jagadyoniṃ caturmukham
jagatpatiṃ jagadvandyaṃ jagadādhāram īśvaram //

devadānavagandharvair yakṣavidyādharoragaiḥ
munisiddhāpsarobhiś ca vṛtam anyair divālayaiḥ //

kecit stuvanti taṃ devaṃ kecid gāyanti cāgrataḥ
kecid vādyāni vādyante kecin nṛtyanti cāpare //

evaṃ pramudite kāle sarvabhūtasamāgame
nānākusumagandhāḍhye dakṣiṇānilasevite //

bhṛgvādyās taṃ tadā devaṃ praṇipatya pitāmaham
imam artham ṛṣivarāḥ papracchuḥ pitaraṃ dvijāḥ //

bhagavañ śrotum icchāmaḥ karmabhūmiṃ mahītale
vaktum arhasi deveśa mokṣakṣetraṃ ca durlabham //

teṣāṃ vacanam ākarṇya prāha brahmā sureśvaraḥ
papracchus te yathā praśnaṃ tat sarvaṃ munisattamāḥ //