Brahma Purana · Chapter 244

sāṃkhyadarśanam etāvad uktaṃ te nṛpasattama
vidyāvidye tv idānīṃ me tvaṃ nibodhānupūrvaśaḥ //

abhedyam āhur avyaktaṃ sargapralayadharmiṇaḥ
sargapralaya ity uktaṃ vidyāvidye ca viṃśakaḥ //

parasparasya vidyā vai tan nibodhānupūrvaśaḥ
yathoktam ṛṣibhis tāta sāṃkhyasyātinidarśanam //

karmendriyāṇāṃ sarveṣāṃ vidyā buddhīndriyaṃ smṛtam
buddhīndriyāṇāṃ ca tathā viśeṣā iti naḥ śrutam //

viṣayāṇāṃ manas teṣāṃ vidyām āhur manīṣiṇaḥ
manasaḥ pañca bhūtāni vidyā ity abhicakṣate //

ahaṃkāras tu bhūtānāṃ pañcānāṃ nātra saṃśayaḥ
ahaṃkāras tathā vidyā buddhir vidyā nareśvara //

buddhyā prakṛtir avyaktaṃ tattvānāṃ parameśvaraḥ
vidyā jñeyā naraśreṣṭha vidhiś ca paramaḥ smṛtaḥ //

avyaktam aparaṃ prāhur vidyā vai pañcaviṃśakaḥ
sarvasya sarvam ity uktaṃ jñeyajñānasya pāragaḥ //

jñānam avyaktam ity uktaṃ jñeyaṃ vai pañcaviṃśakam
tathaiva jñānam avyaktaṃ vijñātā pañcaviṃśakaḥ //

vidyāvidye tu tattvena mayokte vai viśeṣataḥ
akṣaraṃ ca kṣaraṃ caiva yad uktaṃ tan nibodha me //

ubhāv etau kṣarāv uktau ubhāv etāv anakṣarau
kāraṇaṃ tu pravakṣyāmi yathājñānaṃ tu jñānataḥ //

anādinidhanāv etau ubhāv eveśvarau matau
tattvasaṃjñāv ubhāv eva procyete jñānacintakaiḥ //

sargapralayadharmitvād avyaktaṃ prāhur avyayam
tad etad guṇasargāya vikurvāṇaṃ punaḥ punaḥ //

guṇānāṃ mahadādīnām utpadyati parasparam
adhiṣṭhānaṃ kṣetram āhur etad vai pañcaviṃśakam //

yad antarguṇajālaṃ tu tad vyaktātmani saṃkṣipet
tad ahaṃ tad guṇais tais tu pañcaviṃśe vilīyate //

guṇā guṇeṣu līyante tad ekā prakṛtir bhavet
kṣetrajño 'pi tadā tāvat kṣetrajñaḥ saṃpraṇīyate //

yadākṣaraṃ prakṛtir yaṃ gacchate guṇasaṃjñitā
nirguṇatvaṃ ca vai dehe guṇeṣu parivartanāt //

evam eva ca kṣetrajñaḥ kṣetrajñānaparikṣayāt
prakṛtyā nirguṇas tv eṣa ity evam anuśuśruma //

kṣaro bhavaty eṣa yadā guṇavatī guṇeṣv atha
prakṛtiṃ tv atha jānāti nirguṇatvaṃ tathātmanaḥ //

tathā viśuddho bhavati prakṛteḥ parivarjanāt
anyo 'ham anyeyam iti yadā budhyati buddhimān //

tadaiṣo 'vyathatām eti na ca miśratvam āvrajet
prakṛtyā caiṣa rājendra miśro 'nyo 'nyasya dṛśyate //

yadā tu guṇajālaṃ tat prākṛtaṃ vijugupsate
paśyate ca paraṃ paśyaṃs tadā paśyan nu saṃsṛjet //

kiṃ mayā kṛtam etāvad yo 'haṃ kālanimajjanaḥ
yathā matsyo hy abhijñānād anuvartitavāñ jalam //

aham eva hi saṃmohād anyam anyaṃ janāj janam
matsyo yathodakajñānād anuvartitavān iha //

matsyo 'nyatvam athājñānād udakān nābhimanyate
ātmānaṃ tad avajñānād anyaṃ caiva na vedmy aham //

mamāstu dhik kubuddhasya yo 'haṃ magna imaṃ punaḥ
anuvartitavān mohād anyam anyaṃ janāj janam //

ayam anubhaved bandhur anena saha me kṣayam
sāmyam ekatvatāṃ yāto yādṛśas tādṛśas tv aham //

tulyatām iha paśyāmi sadṛśo 'ham anena vai
ayaṃ hi vimalo vyaktam aham īdṛśakas tadā //

yo 'ham ajñānasaṃmohād ajñayā saṃpravṛttavān
saṃsargād atisaṃsargāt sthitaḥ kālam imaṃ tv aham //

so 'ham evaṃ vaśībhūtaḥ kālam etaṃ na buddhavān
uttamādhamamadhyānāṃ tām ahaṃ katham āvase //

samānamāyayā ceha sahavāsam ahaṃ katham
gacchāmy abuddhabhāvatvād ihedānīṃ sthiro bhava //

sahavāsaṃ na yāsyāmi kālam etaṃ vivañcanāt
vañcito hy anayā yad dhi nirvikāro vikārayā //

na tat tadaparāddhaṃ syād aparādho hy ayaṃ mama
yo 'ham atrābhavaṃ saktaḥ parāṅmukham upasthitaḥ //

tato 'smin bahurūpo 'tha sthito mūrtir amūrtimān
amūrtiś cāpy amūrtātmā mamatvena pradharṣitaḥ //

prakṛtyā ca tayā tena tāsu tāsv iha yoniṣu
nirmamasya mamatvena vikṛtaṃ tāsu tāsu ca //

yoniṣu vartamānena naṣṭasaṃjñena cetasā
samatā na mayā kācid ahaṃkāre kṛtā mayā //

ātmānaṃ bahudhā kṛtvā so 'yaṃ bhūyo yunakti mām
idānīm avabuddho 'smi nirmamo nirahaṃkṛtaḥ //

mamatvaṃ manasā nityam ahaṃkārakṛtātmakam
apalagnām imāṃ hitvā saṃśrayiṣye nirāmayam //

anena sāmyaṃ yāsyāmi nānayāham acetasā
kṣemaṃ mama sahānena naivaikam anayā saha //

evaṃ paramasaṃbodhāt pañcaviṃśo 'nubuddhavān
akṣaratvaṃ nigacchati tyaktvā kṣaram anāmayam //

avyaktaṃ vyaktadharmāṇaṃ saguṇaṃ nirguṇaṃ tathā
nirguṇaṃ prathamaṃ dṛṣṭvā tādṛg bhavati maithila //

akṣarakṣarayor etad uktaṃ tava nidarśanam
mayeha jñānasaṃpannaṃ yathā śrutinidarśanāt //

niḥsaṃdigdhaṃ ca sūkṣmaṃ ca viśuddhaṃ vimalaṃ tathā
pravakṣyāmi tu te bhūyas tan nibodha yathāśrutam //

sāṃkhyayogo mayā proktaḥ śāstradvayanidarśanāt
yad eva sāṃkhyaśāstroktaṃ yogadarśanam eva tat //

prabodhanaparaṃ jñānaṃ sāṃkhyānām avanīpate
vispaṣṭaṃ procyate tatra śiṣyāṇāṃ hitakāmyayā //

bṛhac caivam idaṃ śāstram ity āhur viduṣo janāḥ
asmiṃś ca śāstre yogānāṃ punarbhavapuraḥsaram //

pañcaviṃśāt paraṃ tattvaṃ paṭhyate ca narādhipa
sāṃkhyānāṃ tu paraṃ tattvaṃ yathāvad anuvarṇitam //

buddham apratibuddhaṃ ca budhyamānaṃ ca tattvataḥ
budhyamānaṃ ca buddhatvaṃ prāhur yoganidarśanam //