Brahma Purana · Chapter 235

idānīṃ brūhi yogaṃ ca duḥkhasaṃyogabheṣajam
yaṃ viditvāvyayaṃ tatra yuñjāmaḥ puruṣottamam //

śrutvā sa vacanaṃ teṣāṃ kṛṣṇadvaipāyanas tadā
abravīt paramaprīto yogī yogavidāṃ varaḥ //

yogaṃ vakṣyāmi bho viprāḥ śṛṇudhvaṃ bhavanāśanam
yam abhyasyāpnuyād yogī mokṣaṃ paramadurlabham //

śrutvādau yogaśāstrāṇi gurum ārādhya bhaktitaḥ
itihāsaṃ purāṇaṃ ca vedāṃś caiva vicakṣaṇaḥ //

āhāraṃ yogadoṣāṃś ca deśakālaṃ ca buddhimān
jñātvā samabhyased yogaṃ nirdvaṃdvo niṣparigrahaḥ //

bhuñjan saktuṃ yavāgūṃ ca takramūlaphalaṃ payaḥ
yāvakaṃ kaṇapiṇyākam āhāraṃ yogasādhanam //

na manovikale dhmāte na śrānte kṣudhite tathā
na dvaṃdve na ca śīte ca na coṣṇe nānilātmake //

saśabde na jalābhyāse jīrṇagoṣṭhe catuṣpathe
sarīsṛpe śmaśāne ca na nadyante 'gnisaṃnidhau //

na caitye na ca valmīke sabhaye kūpasaṃnidhau
na śuṣkaparṇanicaye yogaṃ yuñjīta karhicit //

deśān etān anādṛtya mūḍhatvād yo yunakti vai
pravakṣye tasya ye doṣā jāyante vighnakārakāḥ //

bādhiryaṃ jaḍatā lopaḥ smṛter mūkatvam andhatā
jvaraś ca jāyate sadyas tadvad ajñānasaṃbhavaḥ //

tasmāt sarvātmanā kāryā rakṣā yogavidā sadā
dharmārthakāmamokṣāṇāṃ śarīraṃ sādhanaṃ yataḥ //

āśrame vijane guhye niḥśabde nirbhaye nage
śūnyāgāre śucau ramye caikānte devatālaye //

rajanyāḥ paścime yāme pūrve ca susamāhitaḥ
pūrvāhṇe madhyame cāhni yuktāhāro jitendriyaḥ //

āsīnaḥ prāṅmukho ramya āsane sukhaniścale
nātinīce na cocchrite niḥspṛhaḥ satyavāk śuciḥ //

yuktanidro jitakrodhaḥ sarvabhūtahite rataḥ
sarvadvaṃdvasaho dhīraḥ samakāyāṅghrimastakaḥ //

nābhau nidhāya hastau dvau śāntaḥ padmāsane sthitaḥ
saṃsthāpya dṛṣṭiṃ nāsāgre prāṇān āyamya vāgyataḥ //

samāhṛtyendriyagrāmaṃ manasā hṛdaye muniḥ
praṇavaṃ dīrgham udyamya saṃvṛtāsyaḥ suniścalaḥ //

rajasā tamaso vṛttiṃ sattvena rajasas tathā
saṃchādya nirmale śānte sthitaḥ saṃvṛtalocanaḥ //

hṛtpadmakoṭare līnaṃ sarvavyāpi nirañjanam
yuñjīta satataṃ yogī muktidaṃ puruṣottamam //

karaṇendriyabhūtāni kṣetrajñe prathamaṃ nyaset
kṣetrajñaś ca pare yojyas tato yuñjati yogavit //

mano yasyāntam abhyeti paramātmani cañcalam
saṃtyajya viṣayāṃs tasya yogasiddhiḥ prakāśitā //

yadā nirviṣayaṃ cittaṃ pare brahmaṇi līyate
samādhau yogayuktasya tadābhyeti paraṃ padam //

asaṃsaktaṃ yadā cittaṃ yoginaḥ sarvakarmasu
bhavaty ānandam āsādya tadā nirvāṇam ṛcchati //

śuddhaṃ dhāmatrayātītaṃ turyākhyaṃ puruṣottamam
prāpya yogabalād yogī mucyate nātra saṃśayaḥ //

niḥspṛhaḥ sarvakāmebhyaḥ sarvatra priyadarśanaḥ
sarvatrānityabuddhis tu yogī mucyeta nānyathā //

indriyāṇi na seveta vairāgyeṇa ca yogavit
sadā cābhyāsayogena mucyate nātra saṃśayaḥ //

na ca padmāsanād yogo na nāsāgranirīkṣaṇāt
manasaś cendriyāṇāṃ ca saṃyogo yoga ucyate //

evaṃ mayā muniśreṣṭhā yogaḥ prokto vimuktidaḥ
saṃsāramokṣahetuś ca kim anyac chrotum icchatha //

śrutvā te vacanaṃ tasya sādhu sādhv iti cābruvan
vyāsaṃ praśasya saṃpūjya punaḥ praṣṭuṃ samudyatāḥ //