Brahma Purana · Chapter 231

āsannaṃ viprakṛṣṭaṃ vā yadi kālaṃ na vidmahe
tato dvāparavidhvaṃsaṃ yugāntaṃ spṛhayāmahe //

prāptā vayaṃ hi tat kālam anayā dharmatṛṣṇayā
ādadyāma paraṃ dharmaṃ sukham alpena karmaṇā //

saṃtrāsodvegajananaṃ yugāntaṃ samupasthitam
pranaṣṭadharmaṃ dharmajña nimittair vaktum arhasi //

arakṣitāro hartāro balibhāgasya pārthivāḥ
yugānte prabhaviṣyanti svarakṣaṇaparāyaṇāḥ //

akṣatriyāś ca rājāno viprāḥ śūdropajīvinaḥ
śūdrāś ca brāhmaṇācārā bhaviṣyanti yugakṣaye //

śrotriyāḥ kāṇḍapṛṣṭhāś ca niṣkarmāṇi havīṃṣi ca
ekapaṅktyām aśiṣyanti yugānte munisattamāḥ //

aśiṣṭavanto 'rthaparā narā madyāmiṣapriyāḥ
mitrabhāryāṃ bhajiṣyanti yugānte puruṣādhamāḥ //

rājavṛttisthitāś caurā rājānaś cauraśīlinaḥ
bhṛtyā hy anirdiṣṭabhujo bhaviṣyanti yugakṣaye //

dhanāni ślāghanīyāni satāṃ vṛttam apūjitam
akutsanā ca patite bhaviṣyati yugakṣaye //

pranaṣṭanāsāḥ puruṣā muktakeśā virūpiṇaḥ
ūnaṣoḍaśavarṣāś ca prasoṣyanti tathā striyaḥ //

aṭṭaśūlā janapadāḥ śivaśūlāś catuṣpathāḥ
pramadāḥ keśaśūlāś ca bhaviṣyanti yugakṣaye //

sarve brahma vadiṣyanti dvijā vājasaneyikāḥ
śūdrābhā vādinaś caiva brāhmaṇāś cāntyavāsinaḥ //

śukladantā jitākṣāś ca muṇḍāḥ kāṣāyavāsasaḥ
śūdrā dharmaṃ vadiṣyanti śāṭhyabuddhyopajīvinaḥ //

śvāpadapracuratvaṃ ca gavāṃ caiva parikṣayaḥ
sādhūnāṃ parivṛttiś ca vidyād antagate yuge //

antyā madhye nivatsyanti madhyāś cāntanivāsinaḥ
nirhrīkāś ca prajāḥ sarvā naṣṭās tatra yugakṣaye //

tapoyajñaphalānāṃ ca vikretāro dvijottamāḥ
ṛtavo viparītāś ca bhaviṣyanti yugakṣaye //

tathā dvihāyanā damyāḥ kalau lāṅgaladhāriṇaḥ
citravarṣī ca parjanyo yuge kṣīṇe bhaviṣyati //

sarve śūrakule jātāḥ kṣamānāthā bhavanti hi
yathā nimnāḥ prajāḥ sarvā bhaviṣyanti yugakṣaye //

pitṛdeyāni dattāni bhaviṣyanti tathā sutāḥ
na ca dharmaṃ cariṣyanti mānavā nirgate yuge //

ūṣarā bahulā bhūmiḥ panthānas taskarāvṛtāḥ
sarve ... vāṇikāś caiva bhaviṣyanti yugakṣaye //

pitṛdāyādadattāni vibhajanti tathā sutāḥ
haraṇe yatnavanto 'pi lobhādibhir virodhinaḥ //

saukumārye tathā rūpe ratne copakṣayaṃ gate
bhaviṣyanti yugasyānte nāryaḥ keśair alaṃkṛtāḥ //

nirvīryasya ratis tatra gṛhasthasya bhaviṣyati
yugānte samanuprāpte nānyā bhāryāsamā ratiḥ //

kuśīlānāryabhūyiṣṭhā vṛthārūpasamanvitāḥ
puruṣālpaṃ bahustrīkaṃ tad yugāntasya lakṣaṇam //

bahuyācanako loko na dāsyati parasparam
rājacaurāgnidaṇḍādi kṣīṇaḥ kṣayam upaiṣyati //

aphalāni ca sasyāni taruṇā vṛddhaśīlinaḥ
aśīlāḥ sukhino loke bhaviṣyanti yugakṣaye //

varṣāsu paruṣā vātā nīcāḥ śarkaravarṣiṇaḥ
saṃdigdhaḥ paralokaś ca bhaviṣyati yugakṣaye //

vaiśyā iva ca rājanyā dhanadhānyopajīvinaḥ
yugāpakramaṇe pūrvaṃ bhaviṣyanti na bāndhavāḥ //

apravṛttāḥ prapaśyanti samayāḥ śapathās tathā
ṛṇaṃ savinayabhraṃśaṃ yuge kṣīṇe bhaviṣyati //

bhaviṣyaty aphalo harṣaḥ krodhaś ca saphalo nṛṇām
ajāś cāpi nirotsyanti payaso 'rthe yugakṣaye //

aśāstravihito yajña evam eva bhaviṣyati
apramāṇaṃ kariṣyanti narāḥ paṇḍitamāninaḥ //

śāstroktasyāpravaktāro bhaviṣyanti na saṃśayaḥ
sarvaḥ sarvaṃ vijānāti vṛddhān anupasevya vai //

na kaścid akavir nāma yugānte samupasthite
nakṣatrāṇi viyogāni na karmasthā dvijātayaḥ //

cauraprāyāś ca rājāno yugānte samupasthite
kuṇḍīvṛṣā naikṛtikāḥ surāpā brahmavādinaḥ //

aśvamedhena yakṣyante yugānte dvijasattamāḥ
yājayiṣyanty ayājyāṃs tu tathābhakṣyasya bhakṣiṇaḥ //

brāhmaṇā dhanatṛṣṇārtā yugānte samupasthite
bhoḥśabdam abhidhāsyanti na ca kaścit paṭhiṣyati //

ekaśaṅkhās tathā nāryo gavedhukapinaddhakāḥ
nakṣatrāṇi vivarṇāni viparitā diśo daśa //

saṃdhyārāgo vidagdhāṅgo bhaviṣyati yugakṣaye
preṣayanti pitṝn putrā vadhūḥ śvaśrūḥ svakarmasu //

yugeṣv evaṃ nivatsyanti pramadāś ca narās tathā
akṛtvāgrāṇi bhokṣyanti dvijāś caivāhutāgnayaḥ //

bhikṣāṃ balim adattvā ca bhokṣyanti puruṣāḥ svayam
vañcayitvā patīn suptān gamiṣyanti striyo 'nyataḥ //

na vyādhitān nāpy arūpān nodyatān nāpy asūyakān
kṛte na pratikartā ca yuge kṣīṇe bhaviṣyati //

evaṃ vilambite dharme mānuṣāḥ karapīḍitāḥ
kutra deśe nivatsyanti kimāhāravihāriṇaḥ //

kiṃkarmāṇaḥ kimīhantaḥ kiṃpramāṇāḥ kimāyuṣaḥ
kāṃ ca kāṣṭhāṃ samāsādya prapatsyanti kṛtaṃ yugam //

ata ūrdhvaṃ cyute dharme guṇahīnāḥ prajās tathā
śīlavyasanam āsādya prāpsyanti hrāsam āyuṣaḥ //

āyurhānyā balagnānir balagnānyā vivarṇatā
vaivarṇyād vyādhisaṃpīḍā nirvedo vyādhipīḍanāt //

nirvedād ātmasaṃbodhaḥ saṃbodhād dharmaśīlatā
evaṃ gatvā parāṃ kāṣṭhāṃ prapatsyanti kṛtaṃ yugam //

uddeśato dharmaśīlāḥ kecin madhyasthatāṃ gatāḥ
kiṃdharmaśīlāḥ kecit tu kecid atra kutūhalāḥ //

pratyakṣam anumānaṃ ca pramāṇam iti niścitāḥ
apramāṇaṃ kariṣyanti sarvam ity apare janāḥ //

nāstikyaparatāś cāpi kecid dharmavilopakāḥ
bhaviṣyanti narā mūḍhā dvijāḥ paṇḍitamāninaḥ //

tadātvamātraśraddheyā śāstrajñānabahiṣkṛtāḥ
dāmbhikās te bhaviṣyanti narā jñānavilopitāḥ //

tathā vilulite dharme janāḥ śreṣṭhapuraskṛtāḥ
śubhān samācariṣyanti dānaśīlaparāyaṇāḥ //

sarvabhakṣāḥ svayaṃguptā nirghṛṇā nirapatrapāḥ
bhaviṣyanti tadā loke tat kaṣāyasya lakṣaṇam //

kaṣāyopaplave kāle jñānaniṣṭhāpraṇāśane
siddhim alpena kālena prāpsyanti nirupaskṛtāḥ //

viprāṇāṃ śāśvatīṃ vṛttiṃ yadā varṇāvare janāḥ
saṃśrayiṣyanti bho viprās tat kaṣāyasya lakṣaṇam //

mahāyuddhaṃ mahāvarṣaṃ mahāvātaṃ mahātapaḥ
bhaviṣyati yuge kṣīṇe tat kaṣāyasya lakṣaṇam //

viprarūpeṇa yakṣāṃsi rājānaḥ karṇavedinaḥ
pṛthivīm upabhokṣyanti yugānte samupasthite //

niḥsvādhyāyavaṣaṭkārāḥ kunetāro 'bhimāninaḥ
kravyādā brahmarūpeṇa sarvabhakṣyā vṛthāvratāḥ //

mūrkhāś cārthaparā lubdhāḥ kṣudrāḥ kṣudraparicchadāḥ
vyavahāropavṛttāś ca cyutā dharmāś ca śāśvatāt //

hartāraḥ pararatnānāṃ paradārapradharṣakāḥ
kāmātmāno durātmānaḥ sopadhāḥ priyasāhasāḥ //

teṣu prabhavamāṇeṣu janeṣv api ca sarvaśaḥ
abhāvino bhaviṣyanti munayo bahurūpiṇaḥ //

kalau yuge samutpannāḥ pradhānapuruṣāś ca ye
kathāyogena tān sarvān pūjayiṣyanti mānavāḥ //

sasyacaurā bhaviṣyanti tathā cailāpahāriṇaḥ
bhokṣyabhojyaharāś caiva karaṇḍānāṃ ca hāriṇaḥ //

caurāś caurasya hartāro hantā hantur bhaviṣyati
cauraiś caurakṣaye cāpi kṛte kṣemaṃ bhaviṣyati //

niḥsāre kṣubhite kāle niṣkriye saṃvyavasthite
narā vanaṃ śrayiṣyanti karabhāraprapīḍitāḥ //

yajñakarmaṇy uparate rakṣāṃsi śvāpadāni ca
kīṭamūṣikasarpāś ca dharṣayiṣyanti mānavān //

kṣemaṃ subhikṣam ārogyaṃ sāmagryaṃ caiva bandhuṣu
uddeśeṣu narāḥ śreṣṭhā bhaviṣyanti yugakṣaye //

svayaṃpālāḥ svayaṃ caurāḥ plavasaṃbhārasaṃbhṛtāḥ
maṇḍalaiḥ saṃbhaviṣyanti deśe deśe pṛthak pṛthak //

svadeśebhyaḥ paribhraṣṭā niḥsārāḥ saha bandhubhiḥ
narāḥ sarve bhaviṣyanti tadā kālaparikṣayāt //

tataḥ sarve samādāya kumārān pradrutā bhayāt
kauśikīṃ saṃtariṣyanti narāḥ kṣudbhayapīḍitāḥ //

aṅgān vaṅgān kaliṅgāṃś ca kāśmīrān atha kośalān
ṛṣikāntagiridroṇīḥ saṃśrayiṣyanti mānavāḥ //

kṛtsnaṃ ca himavatpārśvaṃ kūlaṃ ca lavaṇāmbhasaḥ
vividhaṃ jīrṇapattraṃ ca valkalāny ajināni ca //

svayaṃ kṛtvā nivatsyanti tasmin bhūte yugakṣaye
araṇyeṣu ca vatsyanti narā mlecchagaṇaiḥ saha //

naiva śūnyā navāraṇyā bhaviṣyati vasuṃdharā
agoptāraś ca goptāro bhaviṣyanti narādhipāḥ //

mṛgair matsyair vihaṃgaiś ca śvāpadaiḥ sarpakīṭakaiḥ
madhuśākaphalair mūlair vartayiṣyanti mānavāḥ //

śīrṇaparṇaphalāhārā valkalāny ajināni ca
svayaṃ kṛtvā nivatsyanti yathā munijanas tathā //

bījānām akṛtasnehā āhatāḥ kāṣṭhaśaṅkubhiḥ
ajaiḍakaṃ kharoṣṭraṃ ca pālayiṣyanti nityaśaḥ //

nadīsrotāṃsi rotsyanti toyārthaṃ kūlam āśritāḥ
pakvānnavyavahāreṇa vipaṇantaḥ parasparam //

tanūruhair yathājātaiḥ samalāntarasaṃbhṛtaiḥ
bahvapatyāḥ prajāhīnāḥ kulaśīlavivarjitāḥ //

evaṃ bhaviṣyanti tadā narāś cādharmajīvinaḥ
hīnā hīnaṃ tathā dharmaṃ prajā samanuvatsyati //

āyus tatra ca martyānāṃ paraṃ triṃśad bhaviṣyati
durbalā viṣayaglānā jarāśokair abhiplutāḥ //

bhaviṣyanti tadā teṣāṃ rogair indriyasaṃkṣayaḥ
āyuḥpratyayasaṃrodhād viṣayād uparaṃsyate //

śuśrūṣavo bhaviṣyanti sādhūnāṃ darśane ratāḥ
satyaṃ ca pratipatsyanti vyavahāropasaṃkṣayāt //

bhaviṣyanti ca kāmānām alābhād dharmaśīlinaḥ
kariṣyanti ca saṃskāraṃ svayaṃ ca kṣayapīḍitāḥ //

evaṃ śuśrūṣavo dāne satye prāṇyabhirakṣaṇe
tataḥ pādapravṛtte tu dharme śreyo nipatsyate //

teṣāṃ labdhānumānānāṃ guṇeṣu parivartatām
svādu kiṃ tv iti vijñāya dharma eva ca dṛśyate //

yathā hānikramaṃ prāptās tathā ṛddhikramaṃ gatāḥ
pragṛhīte tato dharme prapaśyanti kṛtaṃ yugam //

sādhuvṛttiḥ kṛtayuge kaṣāye hānir ucyate
eka eva tu kālo 'yaṃ hīnavarṇo yathā śaśī //

channaś ca tamasā somo yathā kaliyugaṃ tathā
muktaś ca tamasā soma evaṃ kṛtayugaṃ ca tat //

arthavādaḥ paraṃ brahma vedārtha iti taṃ viduḥ
aviviktam avijñātaṃ dāyādyam iha dhāryate //

iṣṭavādas tapo nāma tapo hi sthavirīkṛtaḥ
guṇaiḥ karmābhinirvṛttir guṇāḥ śudhyanti karmaṇā //

āśīs tu puruṣaṃ dṛṣṭvā deśakālānuvartinī
yuge yuge yathākālam ṛṣibhiḥ samudāhṛtā //

dharmārthakāmamokṣāṇāṃ devānāṃ ca pratikriyā
āśiṣaś ca śivāḥ puṇyās tathaivāyur yuge yuge //

tathā yugānāṃ parivartanāni cirapravṛttāni vidhisvabhāvāt
kṣaṇaṃ na saṃtiṣṭhati jīvalokaḥ kṣayodayābhyāṃ parivartamānaḥ