Brahma Purana · Chapter 228

ekādaśyām ubhe pakṣe nirāhāraḥ samāhitaḥ
snātvā samyag vidhānena dhautavāsā jitendriyaḥ //

saṃpūjya vidhivad viṣṇuṃ śraddhayā susamāhitaḥ
puṣpair gandhais tathā dīpair dhūpair naivedyakais tathā //

upahārair bahuvidhair japyair homapradakṣiṇaiḥ
stotrair nānāvidhair divyair gītavādyair manoharaiḥ //

daṇḍavatpraṇipātaiś ca jayaśabdais tathottamaiḥ
evaṃ saṃpūjya vidhivad rātrau kṛtvā prajāgaram //

kathāṃ vā gītikāṃ viṣṇor gāyan viṣṇuparāyaṇaḥ
yāti viṣṇoḥ paraṃ sthānaṃ naro nāsty atra saṃśayaḥ //

prajāgare gītikāyāḥ phalaṃ viṣṇor mahāmune
brūhi tac chrotum icchāmaḥ paraṃ kautūhalaṃ hi naḥ //

śṛṇudhvaṃ muniśārdūlāḥ pravakṣyāmy anupūrvaśaḥ
gītikāyāḥ phalaṃ viṣṇor jāgare yad udāhṛtam //

avantī nāma nagarī babhūva bhuvi viśrutā
tatrāste bhagavān viṣṇuḥ śaṅkhacakragadādharaḥ //

tasyā nagaryāḥ paryante cāṇḍālo gītikovidaḥ
sadvṛttyotpāditadhano bhṛtyānāṃ bharaṇe rataḥ //

viṣṇubhaktaḥ sa cāṇḍālo māsi māsi dṛḍhavrataḥ
ekādaśyāṃ samāgamya sopavāso 'tha gāyati //

gītikā viṣṇunāmāṅkāḥ prādurbhāvasamāśritāḥ
gāndhāraṣaḍjanaiṣāda svarapañcamadhaivataiḥ //

rātrijāgaraṇe viṣṇuṃ gāthābhir upagāyati
prabhāte ca praṇamyeśaṃ dvādaśyāṃ gṛham etya ca //

jāmātṛbhāgineyāṃś ca bhojayitvā sakanyakāḥ
tataḥ saparivāras tu paścād bhuṅkte dvijottamāḥ //

evaṃ tasyāsatas tatra kurvato viṣṇuprīṇanam
gītikābhir vicitrābhir vayaḥ pratigataṃ bahu //

ekadā caitramāse tu kṛṣṇaikādaśigocare
viṣṇuśuśrūṣaṇārthāya yayau vanam anuttamam //

vanajātāni puṣpāṇi grahītuṃ bhaktitatparaḥ
kṣiprātaṭe mahāraṇye vibhītakataror adhaḥ //

dṛṣṭaḥ sa rākṣasenātha gṛhītaś cāpi bhakṣitum
cāṇḍālas tam athovāca nādya bhakṣyas tvayā hy aham //

prātar bhokṣyasi kalyāṇa satyam eṣyāmy ahaṃ punaḥ
adya kāryaṃ mama mahat tasmān muñcasva rākṣasa //

śvaḥ satyena sameṣyāmi tataḥ khādasi mām iti
viṣṇuśuśrūṣaṇārthāya rātrijāgaraṇaṃ mayā
kāryaṃ na vratavighnaṃ me kartum arhasi rākṣasa //

taṃ rākṣasaḥ pratyuvāca daśarātram abhojanam
mamābhūd adya ca bhavān mayā labdho mataṅgaja //

na mokṣye bhakṣayiṣyāmi kṣudhayā pīḍito bhṛśam
niśācaravacaḥ śrutvā mātaṅgas tam uvāca ha
sāntvayañ ślakṣṇayā vācā sa satyavacanair dṛḍhaiḥ //

satyamūlaṃ jagat sarvaṃ brahmarākṣasa tac chṛṇu
satyenāhaṃ śapiṣyāmi punarāgamanāya ca //

ādityaś candramā vahnir vāyur bhūr dyaur jalaṃ manaḥ
ahorātraṃ yamaḥ saṃdhye dve vidur naraceṣṭitam //

paradāreṣu yat pāpaṃ yat paradravyahāriṣu
yac ca brahmahanaḥ pāpaṃ surāpe gurutalpage //

vandhyāpateś ca yat pāpaṃ yat pāpaṃ vṛṣalīpateḥ
yac ca devalake pāpaṃ matsyamāṃsāśinaś ca yat //

kroḍamāṃsāśino yac ca kūrmamāṃsāśinaś ca yat
vṛthā māṃsāśino yac ca pṛṣṭhamāṃsāśinaś ca yat //

kṛtaghne mitraghātake yat pāpaṃ didhiṣūpatau
sūtakasya ca yat pāpaṃ yat pāpaṃ krūrakarmaṇaḥ //

kṛpaṇasya ca yat pāpaṃ yac ca vandhyātither api
amāvāsyāṣṭamī ṣaṣṭhī kṛṣṇaśuklacaturdaśī //

tāsu yad gamanāt pāpaṃ yad vipro vrajati striyam
rajasvalāṃ tathā paścāc chrāddhaṃ kṛtvā striyaṃ vrajet //

sarvasvasnātabhojyānāṃ yat pāpaṃ malabhojane
mitrabhāryāṃ gacchatāṃ ca yat pāpaṃ piśunasya ca //

dambhamāyānurakte ca yat pāpaṃ madhughātinaḥ
brāhmaṇasya pratiśrutya yat pāpaṃ tadayacchataḥ //

yac ca kanyānṛte pāpaṃ yac ca gośvatarānṛte
strībālahantur yat pāpaṃ yac ca mithyābhibhāṣiṇaḥ //

devavedadvijanṛpa putramitrasatīstriyaḥ
yac ca nindayatāṃ pāpaṃ gurumithyāpacārataḥ //

agnityāgiṣu yat pāpam agnidāyiṣu yad vane
gṛheṣṭyā pātake yac ca yad goghne yad dvijādhame //

yat pāpaṃ parivitte ca yat pāpaṃ parivedinaḥ
tayor dātṛgrahītroś ca yat pāpaṃ bhrūṇaghātinaḥ //

kiṃ cātra bahubhiḥ proktaiḥ śapathais tava rākṣasa
śrūyatāṃ śapathaṃ bhīmaṃ durvācyam api kathyate //

svakanyājīvinaḥ pāpaṃ gūḍhasatyena sākṣiṇaḥ
ayājyayājake ṣaṇḍhe yat pāpaṃ śravaṇe 'dhame //

pravrajyāvasite yac ca brahmacāriṇi kāmuke
etais tu pāpair lipye 'haṃ yadi naiṣyāmi te 'ntikam //

mātaṅgavacanaṃ śrutvā vismito brahmarākṣasaḥ
prāha gacchasva satyena samayaṃ caiva pālaya //

ity uktaḥ kuṇapāśena śvapākaḥ kusumāni tu
samādāyāgamac caiva viṣṇoḥ sa nilayaṃ gataḥ //

tāni prādād brāhmaṇāya so 'pi prakṣālya cāmbhasā
viṣṇum abhyarcya nilayaṃ jagāma sa tapodhanāḥ //

so 'pi mātaṅgadāyādaḥ sopavāsas tu tāṃ niśām
gāyan hi bāhyabhūmiṣṭhaḥ prajāgaram upākarot //

prabhātāyāṃ tu śarvaryāṃ snātvā devaṃ namasya ca
satyaṃ sa samayaṃ kartuṃ pratasthe yatra rākṣasaḥ //

taṃ vrajantaṃ pathi naraḥ prāha bhadra kva gacchasi
sa tathākathayat sarvaṃ so 'py enaṃ punar abravīt //

dharmārthakāmamokṣāṇāṃ śarīraṃ sādhanaṃ yataḥ
mahatā tu prayatnena śarīraṃ pālayed budhaḥ //

jīvadharmārthasukhaṃ naras tathāpnoti mokṣagatim agryām
jīvan kīrtim upaiti ca bhavati mṛtasya kā kathā loke

mātaṅgas tad vacaḥ śrutvā pratyuvācātha hetumat //

bhadra satyaṃ puraskṛtya gacchāmi śapathāḥ kṛtāḥ //

taṃ bhūyaḥ pratyuvācātha kim evaṃ mūḍhadhīr bhavān
kiṃ na śrutaṃ tvayā sādho manunā yad udīritam //

gostrīdvijānāṃ parirakṣaṇārthaṃ vivāhakāle surataprasaṅge
prāṇātyaye sarvadhanāpahāre pañcānṛtāny āhur apātakāni

dharmavākyaṃ na ca strīṣu na vivāhe tathā ripau
vañcane cārthahānau ca svanāśe 'nṛtake tathā
evaṃ tad vākyam ākarṇya mātaṅgaḥ pratyuvāca ha //

maivaṃ vadasva bhadraṃ te satyaṃ lokeṣu pūjyate
satyenāvāpyate saukhyaṃ yat kiṃcij jagatīgatam //

satyenārkaḥ pratapati satyenāpo rasātmikāḥ
jvalaty agniś ca satyena vāti satyena mārutaḥ //

dharmārthakāmasaṃprāptir mokṣaprāptiś ca durlabhā
satyena jāyate puṃsāṃ tasmāt satyaṃ na saṃtyajet //

satyaṃ brahma paraṃ loke satyaṃ yajñeṣu cottamam
satyaṃ svargasamāyātaṃ tasmāt satyaṃ na saṃtyajet //

ity uktvā so 'tha mātaṅgas taṃ prakṣipya narottamam
jagāma tatra yatrāste prāṇihā brahmarākṣasaḥ //

tam āgataṃ samīkṣyāsau cāṇḍālaṃ brahmarākṣasaḥ
vismayotphullanayanaḥ śiraḥkampaṃ tam abravīt //

sādhu sādhu mahābhāga satyavākyānupālaka
na mātaṅgam ahaṃ manye bhavantaṃ satyalakṣaṇam //

karmaṇānena manye tvāṃ brāhmaṇaṃ śucim avyayam
yat kiṃcit tvāṃ bhadramukhaṃ pravakṣye dharmasaṃśrayam
kiṃ tatra bhavatā rātrau kṛtaṃ viṣṇugṛhe vada //

tam abhyuvāca mātaṅgaḥ śṛṇu viṣṇugṛhe mayā
yat kṛtaṃ rajanībhāge yathātathyaṃ vadāmi te //

viṣṇor devakulasyādhaḥ sthitenānamramūrtinā
prajāgaraḥ kṛto rātrau gāyatā viṣṇugītikām //

taṃ brahmarākṣasaḥ prāha kiyantaṃ kālam ucyatām
prajāgaro viṣṇugṛhe kṛtaṃ bhaktimatā vada //

tam abhyuvāca prahasan viṃśaty abdāni rākṣasa
ekādaśyāṃ māsi māsi kṛtas tatra prajāgaraḥ
mātaṅgavacanaṃ śrutvā provāca brahmarākṣasaḥ //

yad adya tvāṃ pravakṣyāmi tad bhavān vaktum arhati
ekarātrikṛtaṃ sādho mama dehi prajāgaram //

evaṃ tvāṃ mokṣayiṣyāmi mokṣayiṣyāmi nānyathā
triḥ satyena mahābhāga ity uktvā virarāma ha //

mātaṅgas tam uvācātha mayātmā te niśācara
niveditaḥ kim uktena khādasva svecchayāpi mām //

tam āha rākṣaso bhūyo yāmadvayaprajāgaram
sagītaṃ me prayacchasva kṛpāṃ kartuṃ tvam arhasi //

mātaṅgo rākṣasaṃ prāha kim asaṃbaddham ucyate
khādasva svecchayā māṃ tvaṃ na pradāsye prajāgaram
mātaṅgavacanaṃ śrutvā prāha taṃ brahmarākṣasaḥ //

ko hi duṣṭamatir mando bhavantaṃ draṣṭum utsahet
dharṣayituṃ pīḍayituṃ rakṣitaṃ dharmakarmaṇā //

dīnasya pāpagrastasya viṣayair mohitasya ca
narakārtasya mūḍhasya sādhavaḥ syur dayānvitāḥ //

tan mama tvaṃ mahābhāga kṛpāṃ kṛtvā prajāgaram
yāmasyaikasya me dehi gaccha vā nilayaṃ svakam //

taṃ punaḥ prāha cāṇḍālo na yāsyāmi nijaṃ gṛham
na cāpi tava dāsyāmi kathaṃcid yāmajāgaram
taṃ prahasyātha cāṇḍālaṃ provāca brahmarākṣasaḥ //

rātryavasāne yā gītā gītikā kautukāśrayā
tasyāḥ phalaṃ prayacchasva trāhi pāpāt samuddhara //

evam uccārite tena mātaṅgas tam uvāca ha //

kiṃ pūrvaṃ bhavatā karma vikṛtaṃ kṛtam añjasā
yena tvaṃ doṣajātena saṃbhūto brahmarākṣasaḥ //

tasya tad vākyam ākarṇya mātaṅgaṃ brahmarākṣasaḥ
provāca duḥkhasaṃtaptaḥ saṃsmṛtya svakṛtaṃ kṛtam //

śrūyatāṃ yo 'ham āsaṃ vai pūrvaṃ yac ca mayā kṛtam
yasmin kṛte pāpayoniṃ gatavān asmi rākṣasīm //

somaśarma iti khyātaḥ pūrvam āsam ahaṃ dvijaḥ
putro 'dhyayanaśīlasya devaśarmasya yajvanaḥ //

kasyacid yajamānasya sūtramantrabahiṣkṛtaḥ
nṛpasya karmasaktena yūpakarmasuniṣṭhitaḥ //

āgnīdhraṃ cākarod yajñe lobhamohaprapīḍitaḥ
tasmin parisamāpte tu maurkhyād dambham anuṣṭhitaḥ //

yaṣṭum ārabdhavān asmi dvādaśāhaṃ mahākratum
pravartamāne tasmiṃs tu kukṣiśūlo 'bhavan mama //

saṃpūrṇe daśarātre tu na samāpte tathā kratau
virūpākṣasya dīyantyām āhutyāṃ rākṣase kṣaṇe //

mṛto 'haṃ tena doṣeṇa saṃbhūto brahmarākṣasaḥ
mūrkheṇa mantrahīnena sūtrasvaravivarjitam //

ajānatā yajñavidyāṃ yad iṣṭaṃ yājitaṃ ca yat
tena karmavipākena saṃbhūto brahmarākṣasaḥ //

tan māṃ pāpamahāmbhodhau nimagnaṃ tvaṃ samuddhara
prajāgare gītikaikāṃ paścimāṃ dātum arhasi //

tam uvācātha cāṇḍālo yadi prāṇivadhād bhavān
nivṛttiṃ kurute dadyāṃ tataḥ paścimagītikām //

bāḍham ity avadat so 'pi mātaṅgo 'pi dadau tadā
gītikāphalam āmantrya muhūrtārdhaprajāgaram //

tasmin gītiphale datte mātaṅgaṃ brahmarākṣasaḥ
praṇamya prayayau hṛṣṭas tīrthavaryaṃ pṛthūdakam //

tatrānaśanasaṃkalpaṃ kṛtvā prāṇāñ jahau dvijāḥ
rākṣasatvād vinirmukto gītikāphalabṛṃhitaḥ //

pṛthūdakaprabhāvāc ca brahmalokaṃ ca durlabham
daśa varṣasahasrāṇi nirātaṅko 'vasat tataḥ //

tasyānte brāhmaṇo jāto babhūva smṛtimān vaśī
tasyāhaṃ caritaṃ bhūyaḥ kathayiṣyāmi bho dvijāḥ //

mātaṅgasya kathāśeṣaṃ śṛṇudhvaṃ gadato mama
rākṣase tu gate dhīmān gṛham etya yatātmavān //

tadvipracaritaṃ smṛtvā nirviṇṇaḥ śucir apy asau
putreṣu bhāryāṃ nikṣipya dadau bhūmyāḥ pradakṣiṇām //

kokāmukhāt samārabhya yāvad vai skandadarśanam
dṛṣṭvā skandaṃ yayau dhārā cakre cāpi pradakṣiṇam //

tato 'drivaram āgamya vindhyam uccaśiloccayam
pāpapramocanaṃ tīrtham āsasāda sa tu dvijāḥ //

snānaṃ pāpaharaṃ cakre sa tu cāṇḍālavaṃśajaḥ
vimuktapāpaḥ sasmāra pūrvajātīr anekaśaḥ //

sa pūrvajanmany abhavad bhikṣuḥ saṃyatavāṅmanāḥ
yatakāyaś ca matimān vedavedāṅgapāragaḥ //

ekadā goṣu nagarād dhriyamāṇāsu taskaraiḥ
bhikṣāvadhūtā rajasā muktā tenātha bhikṣuṇā //

sa tenādharmadoṣeṇa cāṇḍālīṃ yonim āgataḥ
pāpapramocane snātaḥ sa mṛto narmadātaṭe //

mūrkho 'bhūd brāhmaṇavaro vārāṇasyāṃ ca bho dvijāḥ
tatrāsya vasato 'bdais tu triṃśadbhiḥ siddhapūruṣaḥ //

virūparūpī babhrāma yogamālābalānvitaḥ
taṃ dṛṣṭvā sopahāsārtham abhivādyābhyuvāca ha //

kuśalaṃ siddhapuruṣaṃ kutas tv āgamyate tvayā //

evaṃ saṃbhāṣitas tena jñāto 'ham iti cintya tu
pratyuvācātha vandyas taṃ svargalokād upāgataḥ //

taṃ siddhaṃ prāha mūrkho 'sau kiṃ tvaṃ vetsi triviṣṭape
nārāyaṇoruprabhavām urvaśīm apsarovarām //

siddhas tam āha tāṃ vedmi śakracāmaradhāriṇīm
svargasyābharaṇaṃ mukhyam urvaśīṃ sādhusaṃbhavām //

vipraḥ siddham uvācātha ṛjumārgavivarjitaḥ
tan mitra matkṛte vārttām urvaśyā bhavatādarāt //

kathanīyā yac ca sā te brūyād ākhyāsyate bhavān
bāḍham ity abravīt siddhaḥ so 'pi vipro mudānvitaḥ //

babhūva siddho 'pi yayau merupṛṣṭhaṃ surālayam
sametya corvaśīṃ prāha yad ukto 'sau dvijena tu //

sā prāha taṃ siddhavaraṃ nāhaṃ kāśipatiṃ dvijam
jānāmi satyam uktaṃ te na cetasi mama sthitam //

ity uktaḥ prayayau so 'pi kālena bahunā punaḥ
vārāṇasīṃ yayau siddho dṛṣṭo mūrkheṇa vai punaḥ //

dṛṣṭaḥ pṛṣṭaḥ kila bhūyaḥ kim āhorubhavā tava
siddho 'bravīn na jānāmi mām uvācorvaśī svayam //

siddhavākyaṃ tataḥ śrutvā smitabhinnauṣṭhasaṃpuṭaḥ
punaḥ prāha kathaṃ vetsīty evaṃ vācyā tvayorvaśī //

bāḍham evaṃ kariṣyāmīty uktvā siddho divaṃ gataḥ
dadarśa śakrabhavanān niṣkrāmantīm athorvaśīm //

provāca tāṃ siddhavaraḥ sā ca taṃ siddham abravīt
niyamaṃ kaṃcid api hi karotu dvijasattamaḥ //

yenāhaṃ karmaṇā siddha taṃ jānāmi na cānyathā
tad urvaśīvaco 'bhyetya tasmai mūrkhadvijāya tu //

kathayām āsa siddhas tu so 'pīmaṃ niyamaṃ jagau
tavāgre siddhapuruṣa niyamo 'yaṃ kṛto mayā //

na bhokṣye 'dyaprabhṛti vai śakaṭaṃ satyam īritam
ity uktaḥ prayayau siddhaḥ svarge dṛṣṭvorvaśīm atha //

prāhāsau śakaṭaṃ bhokṣye nādyaprabhṛti karhicit
taṃ siddham urvaśī prāha jñāto 'sau sāṃprataṃ mayā //

niyamagrahaṇād eva mūrkho mām upahāsakaḥ
ity uktvā prayayau śīghraṃ vāsaṃ nārāyaṇātmajā //

siddho 'pi vicacārāsau kāmacārī mahītalam
urvaśy api varārohā gatvā vārāṇasīṃ purīm //

matsyodarījale snānaṃ cakre divyavapurdharā
athāsāv api mūrkhas tu nadīṃ matsyodarīṃ mune //

jagāmātha dadarśāsau snāyamānām athorvaśīm
tāṃ dṛṣṭvā vavṛdhe 'thāsya manmathaḥ kṣobhakṛd dṛḍham //

cakāra mūrkhaś ceṣṭāś ca taṃ vivedorvaśī svayam
taṃ mūrkhaṃ siddhagaditaṃ jñātvā sasmitam āha tam //

kim icchasi mahābhāga mattaḥ śīghram ihocyatām
kariṣyāmi vacas tubhyaṃ tvaṃ viśrabdhaṃ kariṣyasi //

ātmapradānena mama prāṇān rakṣa śucismite //

taṃ prāhāthorvaśī vipraṃ niyamasthāsmi sāṃpratam
tvaṃ tiṣṭhasva kṣaṇam atha pratīkṣasvāgataṃ mama //

sthito 'smīty abravīd vipraḥ sāpi svargaṃ jagāma ha
māsamātreṇa sāyātā dadarśa taṃ kṛśaṃ dvijam //

sthitaṃ māsaṃ nadītīre nirāhāraṃ surāṅganā
taṃ dṛṣṭvā niścayayutaṃ bhūtvā vṛddhavapus tataḥ //

sā cakāra nadītīre śakaṭaṃ śarkarāvṛtam
ghṛtena madhunā caiva nadīṃ matsyodarīṃ gatā //

snātvātha bhūmau vasantī śakaṭaṃ ca yathārthataḥ
taṃ brāhmaṇaṃ samāhūya vākyam āha sulocanā //

mayā tīvraṃ vrataṃ vipra cīrṇaṃ saubhāgyakāraṇāt
vratānte niṣkṛtiṃ dadyāṃ pratigṛhṇīṣva bho dvija //

sa prāha kim idaṃ loke dīyate śarkarāvṛtam
kṣutkṣāmakaṇṭhaḥ pṛcchāmi sādhu bhadre samīraya //

sā prāha śakaṭo vipra śarkarāpiṣṭasaṃyutaḥ
imaṃ tvaṃ samupādāya prāṇaṃ tarpaya mā ciram //

sa tac chrutvātha saṃsmṛtya kṣudhayā pīḍito 'pi san
prāha bhadre na gṛhṇāmi niyamo hi kṛto mayā //

purataḥ siddhavargasya na bhokṣye śakaṭaṃ tv iti
parijñānārtham urvaśyā dadasvānyasya kasyacit //

sābravīn niyamo bhadra kṛtaḥ kāṣṭhamaye tvayā
nāsau kāṣṭhamayo bhuṅkṣva kṣudhayā cātipīḍitaḥ //

tāṃ brāhmaṇaḥ pratyuvāca na mayā tad viśeṣaṇam
kṛtaṃ bhadre 'tha niyamaḥ sāmānyenaiva me kṛtaḥ //

taṃ bhūyaḥ prāha sā tanvī na ced bhokṣyasi brāhmaṇa
gṛhaṃ gṛhītvā gacchasva kuṭumbaṃ tava bhokṣyati //

sa tām uvāca sudati na tāvad yāmi mandiram
ihāyātā varārohā trailokye 'py adhikā guṇaiḥ //

sā mayā madanārtena prārthitāśvāsitas tayā
sthīyatāṃ kṣaṇam ity evaṃ sthāsyāmīti mayoditam //

māsamātraṃ gatāyās tu tasyā bhadre sthitasya ca
mama satyānuraktasya saṃgamāya dhṛtavrate //

tasya sā vacanaṃ śrutvā kṛtvā svaṃ rūpam uttamam
vihasya bhāvagambhīram urvaśī prāha taṃ dvijam //

sādhu satyaṃ tvayā vipra vrataṃ niṣṭhitacetasā
niṣpāditaṃ haṭhād eva mama darśanam icchatā //

aham evorvaśī vipra tvāṃ jijñāsārtham āgatā
parīkṣito niścitavān bhavān satyatapā ṛṣiḥ //

gaccha śūkaravoddeśaṃ rūpatīrtheti viśrutam
siddhiṃ yāsyasi viprendra tatas tvaṃ mām avāpsyasi //

ity uktvā divam utpatya sā jagāmorvaśī dvijāḥ
sa ca satyatapā vipro rūpatīrthaṃ jagāma ha //

tatra śāntiparo bhūtvā niyamavratadhṛk śuciḥ
dehotsarge jagāmāsau gāndharvaṃ lokam uttamam //

tatra manvantaraśataṃ bhogān bhuktvā yathārthataḥ
babhūva sukule rājā prajārañjanatatparaḥ //

sa yajvā vividhair yajñaiḥ samāptavaradakṣiṇaiḥ
putreṣu rājyaṃ nikṣipya yayau śaukaravaṃ punaḥ //

rūpatīrthe mṛto bhūyaḥ śakralokam upāgataḥ
tatra manvantaraśataṃ bhogān bhuktvā tataś cyutaḥ //

pratiṣṭhāne puravare budhaputraḥ purūravāḥ
babhūva tatra corvaśyāḥ saṃgamāya tapodhanāḥ //

evaṃ purā satyatapā dvijātis tīrthe prasiddhe sa hi rūpasaṃjñe
ārādhya janmany atha cārcya viṣṇum avāpya bhogān atha muktim eti