Brahma Purana · Chapter 227

aho kṛṣṇasya māhātmyaṃ śrutam asmābhir adbhutam
sarvapāpaharaṃ puṇyaṃ dhanyaṃ saṃsāranāśanam //

saṃpūjya vidhivad bhaktyā vāsudevaṃ mahāmune
kāṃ gatiṃ yānti manujā vāsudevārcane ratāḥ //

kiṃ prāpnuvanti te mokṣaṃ kiṃ vā svargaṃ mahāmune
athavā kiṃ muniśreṣṭha prāpnuvanty ubhayaṃ phalam //

chettum arhasi sarvajña saṃśayaṃ no hṛdi sthitam
chettā nānyo 'sti loke 'smiṃs tvadṛte munisattama //

sādhu sādhu muniśreṣṭhā bhavadbhir yad udāhṛtam
śṛṇudhvam ānupūrvyeṇa vaiṣṇavānāṃ sukhāvaham //

dīkṣāmātreṇa kṛṣṇasya narā mokṣaṃ vrajanti vai
kiṃ punar ye sadā bhaktyā pūjayanty acyutaṃ dvijāḥ //

na teṣāṃ durlabhaḥ svargo mokṣaś ca munisattamāḥ
labhante vaiṣṇavāḥ kāmān yān yān vāñchanti durlabhān //

ratnaparvatam āruhya naro ratnaṃ yathādadet
svecchayā muniśārdūlās tathā kṛṣṇān manorathān //

kalpavṛkṣaṃ samāsādya phalāni svecchayā yathā
gṛhṇāti puruṣo viprās tathā kṛṣṇān manorathān //

śraddhayā vidhivat pūjya vāsudevaṃ jagadgurum
dharmārthakāmamokṣāṇāṃ prāpnuvanti narāḥ phalam //

ārādhya taṃ jagannāthaṃ viśuddhenāntarātmanā
prāpnuvanti narāḥ kāmān surāṇām api durlabhān //

ye 'rcayanti sadā bhaktyā vāsudevākhyam avyayam
na teṣāṃ durlabhaṃ kiṃcid vidyate bhuvanatraye //

dhanyās te puruṣā loke ye 'rcayanti sadā harim
sarvapāpaharaṃ devaṃ sarvakāmaphalapradam //

brāhmaṇāḥ kṣatriyā vaiśyāḥ striyaḥ śūdrāntyajātayaḥ
saṃpūjya taṃ suravaraṃ prāpnuvanti parāṃ gatim //

tasmāc chṛṇudhvaṃ munayo yat pṛcchata mamānaghāḥ
pravakṣyāmi samāsena gatiṃ teṣāṃ mahātmanām //

tyaktvā mānuṣyakaṃ dehaṃ rogāyatanam adhruvam
jarāmaraṇasaṃyuktaṃ jalabudbudasaṃnibham //

māṃsaśoṇitadurgandhaṃ viṣṭhāmūtrādibhir yutam
asthisthūṇam amedhyaṃ ca snāyucarmaśirānvitam //

kāmagena vimānena divyagandharvanādinā
taruṇādityavarṇena kiṅkiṇījālamālinā //

upagīyamānā gandharvair apsarobhir alaṃkṛtāḥ
vrajanti lokapālānāṃ bhavanaṃ tu pṛthak pṛthak //

manvantarapramāṇaṃ tu bhuktvā kālaṃ pṛthak pṛthak
bhuvanāni pṛthak teṣāṃ sarvabhogair alaṃkṛtāḥ //

tato 'ntarikṣaṃ lokaṃ te yānti sarvasukhapradam
tatra bhuktvā varān bhogān daśamanvantaraṃ dvijāḥ //

tasmād gandharvalokaṃ tu yānti vai vaiṣṇavā dvijāḥ
viṃśanmanvantaraṃ kālaṃ tatra bhuktvā manoramān //

bhogān ādityalokaṃ tu tasmād yānti supūjitāḥ
triṃśanmanvantaraṃ tatra bhogān bhuktvātidaivatān //

tasmād vrajanti te viprāś candralokaṃ sukhapradam
manvantarāṇāṃ te tatra catvāriṃśad guṇānvitam //

kālaṃ bhuktvā śubhān bhogāñ jarāmaraṇavarjitāḥ
tasmān nakṣatralokaṃ tu vimānaiḥ samalaṃkṛtam //

vrajanti te muniśreṣṭhā guṇaiḥ sarvair alaṃkṛtāḥ
manvantarāṇāṃ pañcāśad bhuktvā bhogān yathepsitān //

tasmād vrajanti te viprā devalokaṃ sudurlabham
ṣaṣṭimanvantaraṃ yāvat tatra bhuktvā sudurlabhān //

bhogān nānāvidhān viprā ṛgdvyaṣṭakasamanvitān
śakralokaṃ punas tasmād gacchanti surapūjitāḥ //

manvantarāṇāṃ tatraiva bhuktvā kālaṃ ca saptatim
bhogān uccāvacān divyān manasaḥ prītivardhanān //

tasmād vrajanti te lokaṃ prājāpatyam anuttamam
bhuktvā tatrepsitān bhogān sarvakāmaguṇānvitān //

manvantaram aśītiṃ ca kālaṃ sarvasukhapradam
tasmāt paitāmahaṃ lokaṃ yānti te vaiṣṇavā dvijāḥ //

manvantarāṇāṃ navati krīḍitvā tatra vai sukham
ihāgatya punas tasmād viprāṇāṃ pravare kule //

jāyante yogino viprā vedaśāstrārthapāragāḥ
evaṃ sarveṣu lokeṣu bhuktvā bhogān yathepsitān //

ihāgatya punar yānti upary upari ca kramāt
saṃbhave saṃbhave te tu śatavarṣaṃ dvijottamāḥ //

bhuktvā yathepsitān bhogān yānti lokāntaraṃ tataḥ
daśajanma yadā teṣāṃ krameṇaivaṃ prapūryate //

tadā lokaṃ harer divyaṃ brahmalokād vrajanti te
gatvā tatrākṣayān bhogān bhuktvā sarvaguṇānvitān //

manvantaraśataṃ yāvaj janmamṛtyuvivarjitāḥ
gacchanti bhuvanaṃ paścād vārāhasya dvijottamāḥ //

divyadehāḥ kuṇḍalino mahākāyā mahābalāḥ
krīḍanti tatra viprendrāḥ kṛtvā rūpaṃ caturbhujam //

daśa koṭisahasrāṇi varṣāṇāṃ dvijasattamāḥ
tiṣṭhanti śāśvate bhāve sarvair devair namaskṛtāḥ //

tato yānti tu te dhīrā narasiṃhagṛhaṃ dvijāḥ
krīḍante tatra muditā varṣakoṭyayutāni ca //

tadante vaiṣṇavaṃ yānti puraṃ siddhaniṣevitam
krīḍante tatra saukhyena varṣāṇām ayutāni ca //

brahmaloke punar viprā gacchanti sādhakottamāḥ
tatra sthitvā ciraṃ kālaṃ varṣakoṭiśatān bahūn //

nārāyaṇapuraṃ yānti tatas te sādhakeśvarāḥ
bhuktvā bhogāṃś ca vividhān varṣakoṭyarbudāni ca //

aniruddhapuraṃ paścād divyarūpā mahābalāḥ
gacchanti sādhakavarāḥ stūyamānāḥ surāsuraiḥ //

tatra koṭisahasrāṇi varṣāṇāṃ ca caturdaśa
tiṣṭhanti vaiṣṇavās tatra jarāmaraṇavarjitāḥ //

pradyumnasya puraṃ paścād gacchanti vigatajvarāḥ
tatra tiṣṭhanti te viprā lakṣakoṭiśatatrayam //

svacchandagāmino hṛṣṭā balaśaktisamanvitāḥ
gacchanti yoginaḥ paścād yatra saṃkarṣaṇaḥ prabhuḥ //

tatroṣitvā ciraṃ kālaṃ bhuktvā bhogān sahasraśaḥ
viśanti vāsudevaiti virūpākhye nirañjane //

vinirmuktāḥ pare tattve jarāmaraṇavarjite
tatra gatvā vimuktās te bhaveyur nātra saṃśayaḥ //

evaṃ krameṇa bhuktiṃ te prāpnuvanti manīṣiṇaḥ
muktiṃ ca muniśārdūlā vāsudevārcane ratāḥ //