Brahma Purana · Chapter 216

aho 'tiduḥkhaṃ ghoraṃ ca yamamārge tvayoditam
narakāṇi ca ghorāṇi dvāraṃ yāmyaṃ ca sattama //

asty upāyo na vā brahman yamamārge 'tibhīṣaṇe
brūhi yena narā yānti sukhena yamasādanam //

iha ye dharmasaṃyuktās tv ahiṃsāniratā narāḥ
guruśuśrūṣaṇe yuktā devabrāhmaṇapūjakāḥ //

yasmin manuṣyalokās te sabhāryāḥ sasutās tathā
tam adhvānaṃ ca gacchanti yathā tat kathayāmi vaḥ //

vimānair vividhair divyaiḥ kāñcanadhvajaśobhitaiḥ
dharmarājapuraṃ yānti sevamānāpsarogaṇaiḥ //

brāhmaṇebhyas tu dānāni nānārūpāṇi bhaktitaḥ
ye prayacchanti te yānti sukhenaiva mahāpathe //

annaṃ ye tu prayacchanti brāhmaṇebhyaḥ susaṃkṛtam
śrotriyebhyo viśeṣeṇa bhaktyā paramayā yutāḥ //

taruṇībhir varastrībhiḥ sevyamānāḥ prayatnataḥ
dharmarājapuraṃ yānti vimānair abhyalaṃkṛtaiḥ //

ye ca satyaṃ prabhāṣante bahir antaś ca nirmalāḥ
te 'pi yānty amaraprakhyā vimānair yamamandiram //

godānāni pavitrāṇi viṣṇum uddiśya sādhuṣu
ye prayacchanti dharmajñāḥ kṛśeṣu kṛśavṛttiṣu //

te yānti divyavarṇābhair vimānair maṇicitritaiḥ
dharmarājapuraṃ śrīmān sevyamānāpsarogaṇaiḥ //

upānadyugalaṃ chattraṃ śayyāsanam athāpi vā
ye prayacchanti vastrāṇi tathaivābharaṇāni ca //

te yānty aśvai rathaiś caiva kuñjaraiś cāpy alaṃkṛtāḥ
dharmarājapuraṃ divyaṃ chattraiḥ sauvarṇarājataiḥ //

ye ca bhaktyā prayacchanti guḍapānakam arcitam
odanaṃ ca dvijāgryebhyo viśuddhenāntarātmanā //

te yānti kāñcanair yānair vividhais tu yamālayam
varastrībhir yathākāmaṃ sevyamānāḥ punaḥ punaḥ //

ye ca kṣīraṃ prayacchanti ghṛtaṃ dadhi guḍaṃ madhu
brāhmaṇebhyaḥ prayatnena śuddhyopetaṃ susaṃskṛtam //

cakravākaprayuktaiś ca vimānais tu hiraṇmayaiḥ
yānti gandharvavāditraiḥ sevyamānā yamālayam //

ye phalāni prayacchanti puṣpāṇi surabhīṇi ca
haṃsayuktair vimānais tu yānti dharmapuraṃ narāḥ //

ye tilāṃs tiladhenuṃ ca ghṛtadhenum athāpi vā
śrotriyebhyaḥ prayacchanti viprebhyaḥ śraddhayānvitāḥ //

somamaṇḍalasaṃkāśair yānais te yānti nirmalaiḥ
gandharvair upagīyante pure vaivasvatasya te //

yeṣāṃ vāpyaś ca kūpāś ca taḍāgāni sarāṃsi ca
dīrghikāḥ puṣkariṇyaś ca śītalāś ca jalāśayāḥ //

yānais te hemacandrābhair divyaghaṇṭānināditaiḥ
vyajanais tālavṛntaiś ca vījyamānā mahāprabhāḥ //

yeṣāṃ devakulāny atra citrāṇy āyatanāni ca
ratnaiḥ prasphuramāṇāni manojñāni śubhāni ca //

te yānti lokapālais tu vimānair vātaraṃhasaiḥ
dharmarājapuraṃ divyaṃ nānājanasamākulam //

pānīyaṃ ye prayacchanti sarvaprāṇyupajīvitam
te vitṛṣṇāḥ sukhaṃ yānti vimānais taṃ mahāpatham //

kāṣṭhapādukayānāni pīṭhakāny āsanāni ca
yair dattāni dvijātibhyas te 'dhvānaṃ yānti vai sukham //

sauvarṇamaṇipīṭheṣu pādau kṛtvottameṣu ca
te prayānti vimānais tu apsarogaṇamaṇḍitaiḥ //

ārāmāṇi vicitrāṇi puṣpāḍhyānīha mānavāḥ
ropayanti phalāḍhyāni narāṇām upakāriṇaḥ //

vṛkṣacchāyāsu ramyāsu śītalāsu svalaṃkṛtāḥ
varastrīgītavādyaiś ca sevyamānā vrajanti te //

suvarṇaṃ rajataṃ vāpi vidrumaṃ mauktikaṃ tathā
ye prayacchanti te yānti vimānaiḥ kanakojjvalaiḥ //

bhūmidā dīpyamānāś ca sarvakāmais tu tarpitāḥ
uditādityasaṃkāśair vimānair bhṛśanāditaiḥ //

kanyāṃ tu ye prayacchanti brahmadeyām alaṃkṛtām
divyakanyāvṛtā yānti vimānais te yamālayam //

sugandhāgurukarpūrān puṣpadhūpān dvijottamāḥ
prayacchanti dvijātibhyo bhaktyā paramayānvitāḥ //

te sugandhāḥ suveśāś ca suprabhāḥ suvibhūṣitāḥ
yānti dharmapuraṃ yānair vicitrair abhyalaṃkṛtāḥ //

dīpadā yānti yānaiś ca dīpayanto diśo daśa
ādityasadṛśair yānair dīpyamānā yathāgnayaḥ //

gṛhāvasathadātāro gṛhaiḥ kāñcanamaṇḍitaiḥ
vrajanti bālārkanibhair dharmarājagṛhaṃ narāḥ //

jalabhājanadātāraḥ kuṇḍikākarakapradāḥ
pūjamānāpsarobhiś ca yānti dṛptā mahāgajaiḥ //

pādābhyaṅgaṃ śirobhyaṅgaṃ snānapānodakaṃ tathā
ye prayacchanti viprebhyas te yānty aśvair yamālayam //

viśrāmayanti ye viprāñ śrāntān adhvani karśitān
cakravākaprayuktena yānti yānena te sukham //

svāgatena ca yo vipraṃ pūjayed āsanena ca
sa gacchati tam adhvānaṃ sukhaṃ paramanirvṛtaḥ //

namo brahmaṇyadeveti yo hariṃ cābhivādayet
gāṃ ca pāpaharety uktvā sukhaṃ yānti ca tat patham //

anantarāśino ye ca dambhānṛtavivarjitāḥ
te 'pi sārasayuktais tu yānti yānaiś ca tat patham //

vartante hy ekabhaktena śāṭhyadambhavivarjitāḥ
haṃsayuktair vimānais tu sukhaṃ yānti yamālayam //

caturthenaikabhaktena vartante ye jitendriyāḥ
te yānti dharmanagaraṃ yānair barhiṇayojitaiḥ //

tṛtīye divase ye tu bhuñjate niyatavratāḥ
te 'pi hastirathair divyair yānti yānaiś ca tat padam //

ṣaṣṭhe 'nnabhakṣako yas tu śaucanityo jitendriyaḥ
sa yāti kuñjarasthas tu śacīpatir iva svayam //

dharmarājapuraṃ divyaṃ nānāmaṇivibhūṣitam
nānāsvarasamāyuktaṃ jayaśabdaravair yutam //

pakṣopavāsino yānti yānaiḥ śārdūlayojitaiḥ
puraṃ tad dharmarājasya sevyamānāḥ surāsuraiḥ //

ye ca māsopavāsaṃ tu kurvate saṃyatendriyāḥ
te 'pi sūryapradīptais tu yānti yānair yamālayam //

mahāprasthānam ekāgro yaḥ prayāti dṛḍhavrataḥ
sevyamānas tu gandharvair yāti yānair yamālayam //

śarīraṃ sādhayed yas tu vaiṣṇavenāntarātmanā
sa rathenāgnivarṇena yātīha tridaśālayam //

agnipraveśaṃ yaḥ kuryān nārāyaṇaparāyaṇaḥ
sa yāty agniprakāśena vimānena yamālayam //

prāṇāṃs tyajati yo martyaḥ smaran viṣṇuṃ sanātanam
yānenārkaprakāśena yāti dharmapuraṃ naraḥ //

praviṣṭo 'ntar jalaṃ yas tu prāṇāṃs tyajati mānavaḥ
somamaṇḍalakalpena yāti yānena vai sukham //

svaśarīraṃ hi gṛdhrebhyo vaiṣṇavo yaḥ prayacchati
sa yāti rathamukhyena kāñcanena yamālayam //

strīgrahe gograhe vāpi yuddhe mṛtyum upaiti yaḥ
sa yāty amarakanyābhiḥ sevyamāno raviprabhaḥ //

vaiṣṇavā ye ca kurvanti tīrthayātrāṃ jitendriyāḥ
tat pathaṃ yānti te ghoraṃ sukhayānair alaṃkṛtāḥ //

ye yajanti dvijaśreṣṭhāḥ kratubhir bhūridakṣiṇaiḥ
taptahāṭakasaṃkāśair vimānair yānti te sukham //

parapīḍām akurvanto bhṛtyānāṃ bharaṇādikam
kurvanti te sukhaṃ yānti vimānaiḥ kanakojjvalaiḥ //

ye kṣāntāḥ sarvabhūteṣu prāṇinām abhayapradāḥ
krodhamohavinirmuktā nirmadāḥ saṃyatendriyāḥ //

pūrṇacandraprakāśena vimānena mahāprabhāḥ
yānti vaivasvatapuraṃ devagandharvasevitāḥ //

ekabhāvena ye viṣṇuṃ brahmāṇaṃ tryambakaṃ ravim
pūjayanti hi te yānti vimānair bhāskaraprabhaiḥ //

ye ca māṃsaṃ na khādanti satyaśaucasamanvitāḥ
te 'pi yānti sukhenaiva dharmarājapuraṃ narāḥ //

māṃsān miṣṭataraṃ nāsti bhakṣyabhojyādikeṣu ca
tasmān māṃsaṃ na bhuñjīta nāsti miṣṭaiḥ sukhodayaḥ //

gosahasraṃ tu yo dadyād yas tu māṃsaṃ na bhakṣayet
samāv etau purā prāha brahmā vedavidāṃ varaḥ //

sarvatīrtheṣu yat puṇyaṃ sarvayajñeṣu yat phalam
amāṃsabhakṣaṇe viprās tac ca tac ca ca tatsamam //

evaṃ sukhena te yānti yamalokaṃ ca dhārmikāḥ
dānavrataparā yānair yatra devo raveḥ sutaḥ //

dṛṣṭvā tān dhārmikān devaḥ svayaṃ saṃmānayed yamaḥ
svāgatāsanadānena pādyārghyeṇa priyeṇa tu //

dhanyā yūyaṃ mahātmāna ātmano hitakāriṇaḥ
yena divyasukhārthāya bhavadbhiḥ sukṛtaṃ kṛtam //

idaṃ vimānam āruhya divyastrībhogabhūṣitāḥ
svargaṃ gacchadhvam atulaṃ sarvakāmasamanvitam //

tatra bhuktvā mahābhogān ante puṇyaparikṣayāt
yat kiṃcid alpam aśubhaṃ phalaṃ tad iha bhokṣyatha //

ye tu taṃ dharmarājānaṃ narāḥ puṇyānubhāvataḥ
paśyanti saumyamanasaṃ pitṛbhūtam ivātmanaḥ //

tasmād dharmaḥ sevitavyaḥ sadā muktiphalapradaḥ
dharmād arthas tathā kāmo mokṣaś ca parikīrtyate //

dharmo mātā pitā bhrātā dharmo nāthaḥ suhṛt tathā
dharmaḥ svāmī sakhā goptā tathā dhātā ca poṣakaḥ //

dharmād artho 'rthataḥ kāmaḥ kāmād bhogaḥ sukhāni ca
dharmād aiśvaryam ekāgryaṃ dharmāt svargagatiḥ parā //

dharmas tu sevito viprās trāyate mahato bhayāt
devatvaṃ ca dvijatvaṃ ca dharmāt prāpnoty asaṃśayam //

yadā ca kṣīyate pāpaṃ narāṇāṃ pūrvasaṃcitam
tadaiṣāṃ bhajate buddhir dharmaṃ cātra dvijottamāḥ //

janmāntarasahasreṣu mānuṣyaṃ prāpya durlabham
yo hi nācarate dharmaṃ bhavet sa khalu vañcitaḥ //

kutsitā ye daridrāś ca virūpā vyādhitās tathā
parapreṣyāś ca mūrkhāś ca jñeyā dharmavivarjitāḥ //

ye hi dīrghāyuṣaḥ śūrāḥ paṇḍitā bhogino 'rthinaḥ
arogā rūpavantaś ca tais tu dharmaḥ purā kṛtaḥ //

evaṃ dharmaratā viprā gacchanti gatim uttamām
adharmaṃ sevamānās tu tiryagyoniṃ vrajanti te //

ye narā narakadhvaṃsi vāsudevam anuvratāḥ
te svapne 'pi na paśyanti yamaṃ vā narakāṇi vā //

anādinidhanaṃ devaṃ daityadānavadāraṇam
ye namanti narā nityaṃ nahi paśyanti te yamam //

karmaṇā manasā vācā ye 'cyutaṃ śaraṇaṃ gatāḥ
na samartho yamas teṣāṃ te muktiphalabhāginaḥ //

ye janā jagatāṃ nāthaṃ nityaṃ nārāyaṇaṃ dvijāḥ
namanti nahi te viṣṇoḥ sthānād anyatra gāminaḥ //

na te dūtān na tan mārgaṃ na yamaṃ na ca tāṃ purīm
praṇamya viṣṇuṃ paśyanti narakāṇi kathaṃcana //

kṛtvāpi bahuśaḥ pāpaṃ narā mohasamanvitāḥ
na yānti narakaṃ natvā sarvapāpaharaṃ harim //

śāṭhyenāpi narā nityaṃ ye smaranti janārdanam
te 'pi yānti tanuṃ tyaktvā viṣṇulokam anāmayam //

atyantakrodhasakto 'pi kadācit kīrtayed dharim
so 'pi doṣakṣayān muktiṃ labhec cedipatir yathā //