Brahma Purana · Chapter 211

ity ukto dārukaḥ kṛṣṇaṃ praṇipatya punaḥ punaḥ
pradakṣiṇaṃ ca bahuśaḥ kṛtvā prāyād yathoditam //

sa ca gatvā tathā cakre dvārakāyāṃ tathārjunam
ānināya mahābuddhiṃ vajraṃ cakre tathā nṛpam //

bhagavān api govindo vāsudevātmakaṃ param
brahmātmani samāropya sarvabhūteṣv adhārayat //

sa mānayan dvijavaco durvāsā yad uvāca ha
yogayukto 'bhavat pādaṃ kṛtvā jānuni sattamāḥ //

saṃprāpto vai jarā nāma tadā tatra sa lubdhakaḥ
muśalaśeṣalohasya sāyakaṃ dhārayan param //

sa tatpādaṃ mṛgākāraṃ samavekṣya vyavasthitaḥ
tato vivyādha tenaiva tomareṇa dvijottamāḥ //

gataś ca dadṛśe tatra caturbāhudharaṃ naram
praṇipatyāha caivainaṃ prasīdeti punaḥ punaḥ //

ajānatā kṛtam idaṃ mayā hariṇaśaṅkayā
kṣamyatām ātmapāpena dagdhaṃ mā dagdhum arhasi //

tatas taṃ bhagavān āha nāsti te bhayam aṇv api
gaccha tvaṃ matprasādena lubdha svargeśvarāspadam //

vimānam āgataṃ sadyas tadvākyasamanantaram
āruhya prayayau svargaṃ lubdhakas tatprasādataḥ //

gate tasmin sa bhagavān saṃyojyātmānam ātmani
brahmabhūte 'vyaye 'cintye vāsudevamaye 'male //

ajanmany ajare 'nāśiny aprameye 'khilātmani
tyaktvā sa mānuṣaṃ deham avāpa trividhāṃ gatim //