Brahma Purana · Chapter 209

śṛṇudhvaṃ munayaḥ sarve balasya balaśālinaḥ
kṛtaṃ yad anyad evābhūt tad api śrūyatāṃ dvijāḥ //

narakasyāsurendrasya devapakṣavirodhinaḥ
sakhābhavan mahāvīryo dvivido nāma vānaraḥ //

vairānubandhaṃ balavān sa cakāra surān prati //

narakaṃ hatavān kṛṣṇo baladarpasamanvitam
kariṣye sarvadevānāṃ tasmād eṣa pratikriyām //

yajñavidhvaṃsanaṃ kurvan martyalokakṣayaṃ tathā
tato vidhvaṃsayām āsa yajñān ajñānamohitaḥ //

bibheda sādhumaryādāṃ kṣayaṃ cakre ca dehinām
dadāha capalo deśaṃ puragrāmāntarāṇi ca //

kvacic ca parvatakṣepād grāmādīn samacūrṇayat
śailān utpāṭya toyeṣu mumocāmbunidhau tathā //

punaś cārṇavamadhyasthaḥ kṣobhayām āsa sāgaram
tenātikṣobhitaś cābdhir udvelo jāyate dvijāḥ //

plāvayaṃs tīrajān grāmān purādīn ativegavān
kāmarūpaṃ mahārūpaṃ kṛtvā sasyāny anekaśaḥ //

luṭhan bhramaṇasaṃmardaiḥ saṃcūrṇayati vānaraḥ
tena viprakṛtaṃ sarvaṃ jagad etad durātmanā //

niḥsvādhyāyavaṣaṭkāraṃ dvijāś cāsīt suduḥkhitam
kadācid raivatodyāne papau pānaṃ halāyudhaḥ //

revatī ca mahābhāgā tathaivānyā varastriyaḥ
udgīyamāno vilasal lalanāmaulimadhyagaḥ //

reme yaduvaraśreṣṭhaḥ kubera iva mandare
tataḥ sa vānaro 'bhyetya gṛhītvā sīriṇo halam //

muśalaṃ ca cakārāsya saṃmukhaḥ sa viḍambanām
tathaiva yoṣitāṃ tāsāṃ jahāsābhimukhaṃ kapiḥ //

pānapūrṇāṃś ca karakāṃś cikṣepāhatya vai tadā
tataḥ kopaparītātmā bhartsayām āsa taṃ balam //

tathāpi tam avajñāya cakre kilakilādhvanim
tataḥ samutthāya balo jagṛhe muśalaṃ ruṣā //

so 'pi śailaśilāṃ bhīmāṃ jagrāha plavagottamaḥ
cikṣepa ca sa tāṃ kṣiptāṃ muśalena sahasradhā //

bibheda yādavaśreṣṭhaḥ sā papāta mahītale
apatan muśalaṃ cāsau samullaṅghya plavaṃgamaḥ //

vegenāyamya roṣeṇa balenorasy atāḍayat
tato balena kopena muṣṭinā mūrdhni tāḍitaḥ //

papāta rudhirodgārī dvividaḥ kṣīṇajīvitaḥ
patatā taccharīreṇa gireḥ śṛṅgam aśīryata //

munayaḥ śatadhā vajri vajreṇeva hi tāḍitam
puṣpavṛṣṭiṃ tato devā rāmasyopari cikṣipuḥ //

praśaśaṃsus tadābhyetya sādhv etat te mahat kṛtam
anena duṣṭakapinā daityapakṣopakāriṇā
jagan nirākṛtaṃ vīra diṣṭyā sa kṣayam āgataḥ //

evaṃvidhāny anekāni baladevasya dhīmataḥ
karmāṇy aparimeyāni śeṣasya dharaṇībhṛtaḥ //