Brahma Purana · Chapter 208

śrotum icchāmahe bhūyo balabhadrasya dhīmataḥ
mune parākramaṃ śauryaṃ tan no vyākhyātum arhasi //

yamunākarṣaṇādīni śrutāny asmābhir atra vai
tat kathyatāṃ mahābhāga yad anyat kṛtavān balaḥ //

śṛṇudhvaṃ munayaḥ karma yad rāmeṇābhavat kṛtam
anantenāprameyena śeṣeṇa dharaṇībhṛtā //

duryodhanasya tanayāṃ svayaṃvarakṛtekṣaṇām
balād ādattavān vīraḥ sāmbo jāmbavatīsutaḥ //

tataḥ kruddhā mahāvīryāḥ karṇaduryodhanādayaḥ
bhīṣmadroṇādayaś caiva babandhur yudhi nirjitam //

tac chrutvā yādavāḥ sarve krodhaṃ duryodhanādiṣu
munayaḥ praticakruś ca tān vihantuṃ mahodyamam //

tān nivārya balaḥ prāha madalolākulākṣaram
mokṣyanti te madvacanād yāsyāmy eko hi kauravān //

baladevas tato gatvā nagaraṃ nāgasāhvayam
bāhyopavanamadhye 'bhūn na viveśa ca tat puram //

balam āgatam ājñāya tadā duryodhanādayaḥ
gām argham udakaṃ caiva rāmāya pratyavedayan
gṛhītvā vidhivat sarvaṃ tatas tān āha kauravān //

ājñāpayaty ugrasenaḥ sāmbam āśu vimuñcata //

tatas tadvacanaṃ śrutvā bhīṣmadroṇādayo dvijāḥ
karṇaduryodhanādyāś ca cukrudhur dvijasattamāḥ //

ūcuś ca kupitāḥ sarve bāhlikādyāś ca bhūmipāḥ
arājārhaṃ yador vaṃśam avekṣya muśalāyudham //

bho bhoḥ kim etad bhavatā balabhadreritaṃ vacaḥ
ājñāṃ kurukulotthānāṃ yādavaḥ kaḥ pradāsyati //

ugraseno 'pi yady ājñāṃ kauravāṇāṃ pradāsyati
tad alaṃ pāṇḍuraiś chattrair nṛpayogyair alaṃkṛtaiḥ //

tad gaccha balabhadra tvaṃ sāmbam anyāyaceṣṭitam
vimokṣyāmo na bhavato nograsenasya śāsanāt //

praṇatir yā kṛtāsmākaṃ mānyānāṃ kukurāndhakaiḥ
na nāma sā kṛtā keyam ājñā svāmini bhṛtyataḥ //

garvam āropitā yūyaṃ samānāsanabhojanaiḥ
ko doṣo bhavatāṃ nītir yat prīṇāty anapekṣitā //

asmābhir arcyo bhavatā yo 'yaṃ bala niveditaḥ
premṇaiva na tad asmākaṃ kulād yuṣmatkulocitam //

ity uktvā kuravaḥ sarve nāmuñcanta hareḥ sutam
kṛtaikaniścayāḥ sarve viviśur gajasāhvayam //

mattaḥ kopena cāghūrṇaṃ tato 'dhikṣepajanmanā
utthāya pārṣṇyā vasudhāṃ jaghāna sa halāyudhaḥ //

tato vidāritā pṛthvī pārṣṇighātān mahātmanaḥ
āsphoṭayām āsa tadā diśaḥ śabdena pūrayan
uvāca cātitāmrākṣo bhrukuṭīkuṭilānanaḥ //

aho mahāvalepo 'yam asārāṇāṃ durātmanām
kauravāṇām ādhipatyam asmākaṃ kila kālajam //

ugrasenasya ye nājñāṃ manyante cāpy alaṅghanām
ājñāṃ pratīcched dharmeṇa saha devaiḥ śacīpatiḥ //

sadādhyāste sudharmāṃ tām ugrasenaḥ śacīpateḥ
dhiṅ manuṣyaśatocchiṣṭe tuṣṭir eṣāṃ nṛpāsane //

pārijātataroḥ puṣpa mañjarīr vanitājanaḥ
bibharti yasya bhṛtyānāṃ so 'py eṣāṃ na mahīpatiḥ //

samastabhūbhujāṃ nātha ugrasenaḥ sa tiṣṭhatu
adya niṣkauravām urvīṃ kṛtvā yāsyāmi tāṃ purīm //

karṇaṃ duryodhanaṃ droṇam adya bhīṣmaṃ sabāhlikam
duḥśāsanādīn bhūriṃ ca bhūriśravasam eva ca //

somadattaṃ śalaṃ bhīmam arjunaṃ sayudhiṣṭhiram
yamajau kauravāṃś cānyān hanyāṃ sāśvarathadvipān //

vīram ādāya taṃ sāmbaṃ sapatnīkaṃ tataḥ purīm
dvārakām ugrasenādīn gatvā drakṣyāmi bāndhavān //

athavā kauravādīnāṃ samastaiḥ kurubhiḥ saha
bhārāvataraṇe śīghraṃ devarājena coditaḥ //

bhāgīrathyāṃ kṣipāmy āśu nagaraṃ nāgasāhvayam //

ity uktvā krodharaktākṣas tālāṅko 'dhomukhaṃ halam
prākāravapre vinyasya cakarṣa muśalāyudhaḥ //

āghūrṇitaṃ tat sahasā tato vai hastināpuram
dṛṣṭvā saṃkṣubdhahṛdayāś cukruśuḥ sarvakauravāḥ //

rāma rāma mahābāho kṣamyatāṃ kṣamyatāṃ tvayā
upasaṃhriyatāṃ kopaḥ prasīda muśalāyudha //

eṣa sāmbaḥ sapatnīkas tava niryātito bala
avijñātaprabhāvāṇāṃ kṣamyatām aparādhinām //

tato niryātayām āsuḥ sāmbaṃ patnyā samanvitam
niṣkramya svapurīṃ tūrṇaṃ kauravā munisattamāḥ //

bhīṣmadroṇakṛpādīnāṃ praṇamya vadatāṃ priyam
kṣāntam eva mayety āha balo balavatāṃ varaḥ //

adyāpy āghūrṇitākāraṃ lakṣyate tat puraṃ dvijāḥ
eṣa prabhāvo rāmasya balaśauryavato dvijāḥ //

tatas tu kauravāḥ sāmbaṃ saṃpūjya halinā saha
preṣayām āsur udvāha dhanabhāryāsamanvitam //